Билер 1:1—36
1 Ешуа қайтыс болған соң+, исраилдіктер Ехобадан*: “Қанахандықтармен соғысуға бірінші болып кім барсын?”— деп сұрады+.
2 Ехоба: “Яһуда барсын+. Мен оны жеңіске жеткіземін”,— деп жауап берді.
3 Сонда Яһуда бауыры Шимонға былай деді: “Үлесіме тиген жерді+ жаулап алу үшін қанахандықтармен соғысуға көмектесші, кейін мен де саған үлесіңе тиген жерді жаулап алуға көмектесемін”. Шимон бұған келісті.
4 Сөйтіп, Яһуда соғысқа аттанды. Ехоба қанахандықтар мен перездіктерді оның аяғына жығып беріп+, олар Безекте 10 000 адамды қырып салды.
5 Сол жерде олар Адони-Безекпен ұшырасты да, онымен шайқасып, қанахандықтар+ мен перездіктерді+ тас-талқан етіп жеңді.
6 Адони-Безек қаша жөнелгенде, исраилдіктер оның соңына түсіп, ұстап алды. Олар оның қол-аяғының бас бармақтарын кесіп тастады.
7 Сонда ол: “Қол-аяқтарының бас бармақтары кесілген 70 патша менің дастарқанымнан түскен нанды теріп жеп жүретін еді. Соларға істегенімді Құдай енді өз басыма келтірді”,— деді. Олар Адони-Безекті Иерусалимге+ әкеліп, ол сол жерде өлді.
8 Яһудалықтар Иерусалимге аттанып+, оны жаулап алды да, ондағыларды семсермен қырып салып, қаланы өртеп жіберді.
9 Бұдан кейін олар таулы өңірде және Негев пен Шефелада тұратын қанахандықтармен шайқасты+.
10 Осылай Яһуда Хебронда (Хеброн бұрын Кирият-Арба деп аталатын) тұратын қанахандықтармен соғысқанда, Шешайды, Ахиман мен Талмайды өлтірді+.
11 Сол жерден олар Дебирге (Дебир бұрын Кирият-Сефер деп аталатын+) қарай аттанғанда+,
12 Халеп+: “Кімде-кім Кирият-Сеферді басып алса, мен оған қызым Ахсаны әйелдікке беремін”,— деді+.
13 Сонда Халептің інісі Кеназдың+ ұлы Отниел+ қаланы басып алды. Халеп болса оған қызын берді.
14 Ахса қайын жұртына кетіп бара жатқанда, күйеуін қайын атасы Халептен танап сұрауға көндірді. Ахса есегінен түскенде*, әкесі одан: “Не қалайсың?”— деп сұрады.
15 Ол: “Батаңызды бере көріңіз. Сіз маған оңтүстіктен жер* берген едіңіз, енді Ғылот-Маимді* де берсеңіз екен”,— деді. Әкесі оған Жоғарғы Ғылот пен Төменгі Ғылотты берді.
16 Мұсаның кендік+ қайын атасының+ ұрпақтары яһудалықтармен бірге пальма ағаштары өсетін қаладан+ шығып, Араттың+ оңтүстігіндегі Яһуда шөліне келді. Олар сол жердегі халықтың арасына қоныс тепті+.
17 Бірақ Яһуда мен бауыры Шимон Сепатта тұратын қанахандықтарға қарсы аттанып, оларды тас-талқан етті де, қаланы жойып жіберді+. Сондықтан бұл қаланы Хорма*+ деп атады.
18 Бұдан кейін яһуда руы Газа+, Ашкелон+, Екрон+ қалаларын айналасындағы жерлерімен қоса жаулап алды.
19 Ехоба Яһудаға жар болып, ол таулы өңірді иемденді. Бірақ жазықта тұратындардың жерін тартып ала алмады, себебі олардың орақты соғыс арбалары бар еді+.
20 Халеп Мұсаның уәдесіне сай+, Хебронды алып, сол жерден Енактың үш ұлын қуып жіберді+.
21 Бенияминдіктер болса Иерусалимде тұратын ебустіктерді қуып жібере алмады. Олар әлі де бенияминдіктермен бірге Иерусалимде өмір сүруде+.
22 Сол уақытта Жүсіптің ұрпақтары+ Бетелге қарсы соғысқа шықты. Ехоба оларға жар болды+.
23 Олар Бетелді (бұл қала бұрын Лұз деп аталатын+) сырттай бақылай бастады.
24 Тыңшылар қаладан шығып келе жатқан бір кісіні көріп, оған: “Қалаға қалай кіруге болатынын көрсетші, сонда саған мейірім* танытамыз”,— деді.
25 Ол Жүсіптің ұрпақтарына кіретін жолды көрсетті. Содан олар қаладағылардың бәрін семсермен қырып салды, ал әлгі кісіні бүкіл отбасымен бірге босатып жіберді+.
26 Ол хеттіктердің жеріне барып, сонда қала соғып, оны Лұз деп атады. Қала әлі күнге дейін осылай аталады.
27 Ал Манаса Бет-Шеған мен Танақты+ және олардың қарамағындағы қалашықтарды, сондай-ақ Дор, Иблеғам, Мегиддо тұрғындарын және олардың қарамағындағы қалашықтарды жаулап ала алмады+. Қанахандықтар осы жерлерде тұра берді.
28 Исраил күшейіп алғанда, қанахандықтарды өздеріне басыбайлы қызметші етті+. Бірақ оларды түгелімен қуып шыға алмады+.
29 Ефрем де Гезерде тұратын қанахандықтарды қуып шыға алмады. Олар ефремдіктердің арасында өмір сүре берді+.
30 Забулон да Китрон мен Нахалолдың+ тұрғындарын қуып шықпады. Қанахандықтар олардың арасында өмір сүріп, басыбайлы қызметшілерге айналды+.
31 Ашир де Аққо, Сидон+, Ақлаб, Ақзип+, Хелба, Афик+ және Рехоб+ тұрғындарын қуып шыққан жоқ.
32 Сөйтіп, аширліктер сол жердегі қанахандықтардың арасында өмір сүре берді, өйткені оларды қуып шықпады.
33 Нафталим де Бет-Шамиш пен Бет-Анат+ тұрғындарын қуып шықпағандықтан, қанахандықтардың арасында өмір сүре берді+. Бет-Шамиш пен Бет-Анат тұрғындары олардың басыбайлы қызметшісіне айналды.
34 Ал дандықтарды аморлықтар таулы өңірге қарай ығыстырып, жазыққа түсірмеді+.
35 Өздері болса Харкерес тауында, Аялонда+ және Шағалбимде+ өмір сүре берді. Алайда Жүсіптің ұрпақтары күшейіп алған соң, оларды ауыр жұмысқа салып қойды.
36 Аморлықтардың жері Акраб асуынан+, Селадан жоғары қарай созылып жатты.
Сілтемелер
^ Бұл — Құдайдың есімі. Түсіндірмені қараңыз.
^ Мүмкін: “есегінде отырып шапалақ қаққанда”.
^ Немесе “Негевті”.
^ Мағынасы “су айдыны”.
^ Мағынасы “жойылған жер”.
^ Сөзбе-сөз “айнымас сүйіспеншілік”.
