Билер 10:1—18
10 Әбумәліктен кейін Исраилді құтқару үшін исахар руынан Ефрем таулы өңіріндегі Шамирде тұратын Тола шықты+. Ол Пуаның ұлы, Додоның немересі еді.
2 Тола 23 жыл Исраилдің биі болған соң дүние салып, сүйегі Шамирге қойылды.
3 Одан кейін ғалақаттық Жайыр шығып, Исраилде 22 жыл би болды.
4 Оның 30 есекке мініп жүретін 30 ұлы болатын. Олардың Ғалақатта 30 қаласы бар еді. Бұл қалалар әлі күнге дейін Хауот-Жайыр+ деп аталады.
5 Жайыр қайтыс болып, денесі Камонда жерленді.
6 Исраилдіктер қайтадан Ехобаға ұнамсыз істер жасап+, Бағалдарға+, Аштар мүсіндеріне, сондай-ақ Арам*, Сидон, Моаб құдайларына+ және аммондықтар+ мен філістірлердің құдайларына+ табына бастады. Олар Ехобадан безіп, оған қызмет етпейтін болды.
7 Бұған Ехобаның қаһары лаулап, исраилдіктерді філістірлер мен аммондықтардың қолына берді+.
8 Олар сол жылы исраилдіктерді езіп-жаншып, қатты қанады. Осылай Иорданның арғы бетінде, Ғалақаттағы аморлықтардың жерінде, тұратын исраилдіктердің бәрі 18 жыл бойы солардың езгісінде болды.
9 Аммондықтар Иорданнан өтіп, тіпті яһуда, бениямин, ефрем руларымен де соғысуға келетін. Исраилдің басына өте ауыр күндер туды.
10 Сонда олар Ехобадан көмек сұрап+: “Құдайымыз, біз саған қарсы күнә жасадық, өйткені сенен безіп, Бағалдарға қызмет еттік+”,— деді.
11 Бірақ Ехоба исраилдіктерге былай деді: “Сендер мысырлықтар+, аморлықтар+, аммондықтар, філістірлер+,
12 сидондықтар, амалектіктер мен мадияндықтардың қысымына түсіп, жалбарынған сайын мен сендерді құтқарып отырмап па едім?
13 Сендер болсаңдар менен безіп, басқа құдайларға табынып кеттіңдер+. Сондықтан енді мен сендерді құтқармаймын+.
14 Барып, өздерің таңдаған құдайларыңа жалбарынып көмек сұраңдар+. Бастарыңа күн туғанда, сендерді солар құтқарсын+”.
15 Бірақ исраилдіктер Ехобадан: “Біз күнәға баттық. Енді бізге не істесең де, өз еркің. Тек бүгін бізді құтқара көр”,— деп өтінді.
16 Олар бөтен құдайлардан арылып, Ехобаға қызмет ететін болды+. Сонда Исраилдің қиналып жатқанына оның жаны шыдап тұра алмады+.
17 Біраз уақыттан соң аммондықтар+ жиналып, Ғалақатта қос тікті. Исраилдіктер де бас қосып, Миспада қос тікті.
18 Ғалақат халқы мен бекзадалары: “Аммондықтармен соғысуға жұртты кім бастап алып барса+, сол адам бүкіл Ғалақат тұрғындарының басы болсын”,— десті.
Сілтемелер
^ Немесе “Сирия”.
