Езекиел 10:1—22
10 Мен қарап тұрғанымда, керубтердің төбе жағында төселіп жатқан тақтаның үстінде тұрған жақұт тасы сияқты бірдеңені көрдім, ол таққа ұқсайтын+.
2 Құдай зығыр киім киген кісіге+: “Керубтердің астында айналып тұрған дөңгелектердің+ арасына кіріп, сондағы қызып тұрған шоқтан+ қос уысыңды толтыра алып шық та, қаланың үстіне шашып жібер+”,— деді. Мен қарап тұрғанда, ол сонда кірді.
3 Ол кіргенде, керубтер киелі үйдің солтүстігінде тұрған болатын, ал ішкі ауланы бұлт жайлаған еді.
4 Ехобаның салтанаты+ керубтердің төбе жағынан көтеріліп, киелі үйдің босағасына қарай жылжыды. Сонда киелі үйдің ішін бұлт жайлап+, аула Ехобаның нұрлы салтанатына кенелді.
5 Керубтердің қанаттарының шуылы сыртқы аулада естіліп тұрды, әрі ол Құдіреті шексіз Құдайдың сөйлегендегі даусына ұқсайтын+.
6 Сол кезде Құдай зығыр киім киген кісіге: “Керубтердің астында айналып тұрған дөңгелектердің арасындағы оттан ал!”— деді. Ол кіріп, дөңгелектің қасына барып тұрды.
7 Керубтердің+ бірі араларындағы отқа қарай қолын созып, одан от алды да, зығыр киім киген кісінің+ қос уысына салып берді. Ол отты алып, шығып кетті.
8 Керубтердің қанаттарының астынан адамдардікіндей қолдары көрініп тұрды+.
9 Мен қарап тұрғанымда, төрт керубті көрдім. Олардың әрқайсысының қасында бір-бір дөңгелектен бар екен. Дөңгелектер хризолиттей жалтырап тұрды+.
10 Төртеуінің де пішіні бірдей еді: бір дөңгелектің ішінде тағы бір дөңгелек орналасқандай көрінетін.
11 Қозғалғанда олар бұрылмай-ақ төрт бағыттың біріне қарай жүре беретін, өйткені олар керубтер бет алған жаққа бұрылмай-ақ жылжи алатын.
12 Керубтердің денелері, арқалары, қолдары мен қанаттары және қастарындағы төрт дөңгелек те көздерге толы еді+.
13 Мен біреудің: “Айналып тұрған дөңгелектер!”— деп дөңгелектерді шақырғанын естідім.
14 Әр керубтің төрт беті болды: біреуі керубтікіндей, екіншісі адамдікіндей, үшіншісі арыстандікіндей, ал төртіншісі бүркіттікіндей+.
15 Керубтер жоғары көтерілгенде (бұл Кебар өзенінің+ бойында өзім көрген тіршілік иелері еді)
16 не қозғалғанда, қастарындағы дөңгелектер де бірге қозғалатын. Жерден көтерілу үшін қанаттарын жайғанда, дөңгелектер қастарында тұра беретін, ешқайда бұрылмайтын да, жылжымайтын да+.
17 Керубтер бір орында тұрса, дөңгелектер де тұратын, ал жерден көтерілсе, бірге көтерілетін, себебі тіршілік иелеріндегі рух дөңгелектерде де болды.
18 Ехобаның салтанаты+ киелі үйдің босағасынан көтеріліп, керубтердің төбе жағына барып тұрды+.
19 Керубтер менің көз алдымда қанаттарын жайып, жерден көтерілді, қастарындағы дөңгелектер де бірге жылжыды. Олар Ехобаның киелі үйінің шығыс қақпасының алдына тоқтады, ал төбе жақтарында Исраил Құдайының салтанаты тұрды+.
20 Мен Кебар өзенінің бойында болғанымда, осы тіршілік иелерінің Исраил Құдайының тағының астында тұрғанын көрген едім+. Сондықтан олардың керуб екенін білетінмін.
21 Әрқайсысының төрт беті және төрт қанаты, ал қанаттарының астында адамдікіндей қолдары болды+.
22 Керубтердің бет әлпеті өзім Кебар өзенінің бойында көрген тіршілік иелерінікіндей еді+. Олардың әрқайсысы тура жүретін+.
