Езекиел 35:1—15
-
Сейір таулары туралы пайғамбарлық (1—15)
35 Ехоба тағы да маған сөзін арнап былай деді:
2 “Адам ұлы, жүзіңді Сейірдің+ таулы өңіріне бұр да, оған қарсы пайғамбарлық етіп+,
3 хабарымды жеткіз! Әлемнің Әміршісі Ехоба мынаны айтады: —Ей, Сейірдің таулы өңірі, мен саған қарсы шығамын! Қолымды созамын да, сені қаңыраған елсіз далаға айналдырамын+.
4 Қалаларыңды жермен-жексен еткенімде, қаңыраған елсіз далаға айналасың+. Сонда менің Ехоба екенімді білетін боласың.
5 Өйткені ежелден бері исраилдіктермен өштесуіңді қоймадың+, сондай-ақ апатқа ұшырап, біржола жазаланған кездерінде сен оларды семсермен қырдың+.
6 Сондықтан Әлемнің Әміршісі Ехоба былай дейді: —Өз атыммен ант етемін*, мен сенің қаның төгіледі деп шешіп қойдым; қантөгіс сенің қыр соңыңнан қалмайтын болады+. Қанды жек көріп едің, енді ол сенің қыр соңыңнан қалмайды+.
7 Мен таулы өңіріңді қаңыраған елсіз далаға айналдырамын+, сен арқылы ешкім әрі де өтпейді, кері де қайтпайтын болады.
8 Тау-төбелеріңді өліктерге толтырамын. Қыр-қырқаларың, жазықтарың мен сай-салаларыңда семсерден өлгендер сұлап жататын болады.
9 Мен сені мәңгілікке қаңыратып бос қалдырамын, қалаларың да елсіз қалады+. Сонда менің Ехоба екенімді білетін боласың.
10 Мен, Ехоба, Исраил мен Яһуда халқының арасында болғаныма қарамай, сен: “Мына екі халық та, ел де менікі болады, біз екеуін де иемденеміз”+,— деген едің.
11 Сол үшін Әлемнің Әміршісі Ехоба мынаны айтады: —Оларды жек көріп, бойыңды ашу мен қызғаныш билеген еді+, сондықтан өз атыммен ант етемін*, мен де саған қарсы солай әрекет етемін. Сені соттаған кезімде, олар менің кім екенімді білетін болады.
12 Сонда Исраилдің тауларына қатысты: “Олар қаңырап бос қалып, бізге жалмап қоюға берілді!”— деп, менменси айтқан сөздеріңнің бәрін мен, Ехоба, естігенімді білетін боласың.
13 Мұнымен қоймай, маған қарсы паңдана сөйлеп, әбден бөстің+. Мен бұны да естідім.
14 Әлемнің Әміршісі Ехоба былай дейді: —Сені қаңыраған елсіз далаға айналдырғанымда, бүкіл жер шат-шадыман болады.
15 Исраил үйінің иелігіндегі жер қаңырап бос қалғанда қуанғаның үшін, солардың күйін сенің басыңа келтіремін+. Ей, Сейірдің таулы өңірі, иә, күллі Едом+ жері, сен үйіндіге айналып, қаңырап бос қаласың. Сонда жұрт менің Ехоба екенімді білетін болады.
Сілтемелер
^ Немесе “Өзімнің тірі екенімдей хақ сөзім”.
^ Немесе “өзімнің тірі екенімдей хақ сөзім”.
