Езра 5:1—17
5 Яһуда мен Иерусалимдегі яһудилерге Хагей пайғамбар+ мен Иддоның+ немересі Зәкәрия пайғамбар+ Исраилге жар болған Құдайдың атынан пайғамбарлық етті.
2 Осы кезде Салател ұлы Зоробабел+ мен Ехосадық ұлы Ешуа+ Иерусалимдегі Құдай үйінің құрылысына қайта кірісті+. Құдайдың пайғамбарлары олармен бірге болып, қолдау көрсетті+.
3 Сол уақытта Евфраттың батыс өлкесінің әміршісі Татенай және Шетар-Бозенай әріптестерімен бірге оларға келіп: “Бұл үйді салып, құрылысты жалғастыруға сендерге кім бұйрық берді?”— деп сұрады.
4 Сондай-ақ олардан: “Осы ғимаратты соғып жатқан кісілердің есімдері кім?”— деп сұрады.
5 Құдай яһуди ақсақалдарына көз қырын салып, қамқор болғандықтан+, әлгілер Дарий патшаға осы мәселеге қатысты хат жіберіп, оның ресми жауабын алмайынша, яһудилердің ісін тоқтатпады.
6 Бұл — Евфраттың батыс өлкесінің әміршісі Татенайдың, Шетар-Бозенай мен олардың әріптестерінің, яғни Евфраттың батыс өлкесіндегі кіші әміршілердің, Дарий патшаға жіберген хатының көшірмесі.
7 Олар патшаға былай деп мәлімдеді:
“Патша ағзам Дарийге.
Сізге амандық пен тыныштық тілейміз!
8 Патшамызды мына жайттан хабардар еткіміз келеді: біз Яһуда аймағындағы Ұлы Құдайдың үйіне бардық. Бұл үй үлкен-үлкен тастардан соғылып, қабырғаларына бөренелер қойылуда екен. Жұмыс зор ынтамен істелініп, алға басып жатыр.
9 Біз ақсақалдарынан: —Бұл үйді салып, құрылысты жалғастыруға сендерге кім бұйрық берді?— деп сұрадық+.
10 Сондай-ақ өзіңізге жазып жіберу үшін басшыларының да аттарын сұрадық.
11 Ал олардың жауабы мынау болды: “Біз көк пен жердің Құдайының қызметшілеріміз. Біз осыдан көп жыл бұрын Исраилдің ұлы патшасы салған үйді+ қайтадан тұрғызып жатырмыз.
12 Алайда ата-бабаларымыз көктегі Құдайды қаһарландырды+. Сондықтан Құдай оларды Бабыл патшасы халдейлік Навуходоносордың қолына берді+. Ол бұл үйді қиратып+, халқын Бабылға жер аударды+.
13 Ал Кир патша Бабылға билік еткен бірінші жылында Құдайдың үйін қайта тұрғызу туралы жарлық шығарды+.
14 Сондай-ақ Кир патша Навуходоносордың Иерусалимдегі Құдай үйінен әкетіп, Бабылдағы ғибадатханаға қойғызған алтын-күміс ыдыстарды+ шығартты да, өзі әмірші етіп тағайындаған Шешбасардың*+ қолына табыстады+.
15 Сөйтіп, Кир оған: “Мына ыдыстарды алып, Иерусалимдегі ғибадатханаға апарып қой. Құдайдың үйі бұрынғы орнына қайта тұрғызылсын”,— деп тапсырды+.
16 Шешбасар келіп, Иерусалимдегі Құдай үйінің іргетасын орнатты+. Міне, сол уақыттан бері бұл үй салынып келе жатыр, бірақ әлі біткен жоқ+”.
17 Сондықтан егер патша ағзам мақұл көрсе, патшаның Бабылдағы қазына қоймасынан іздестіріп, Кир патша Иерусалимдегі Құдай үйін қайта соғу туралы жарлық шығарған-шығармағанын анықтап берсе екен+. Сосын патша осы жайтқа қатысты шешімін бізге білдірсе екен”.