Еремия 28:1—17
-
Еремия және жалған пайғамбар Хананиях (1—17)
28 Сол жылы, Яһуда патшасы Седекияның+ билігінің басында, төртінші жылының бесінші айында, Гибеоннан+ шыққан Азур ұлы Хананиях пайғамбар Ехобаның үйінде, діни қызметкерлер мен бүкіл халықтың алдында маған мынаны айтты:
2 “Әскербасы Ехоба, Исраилдің Құдайы былай дейді: —Мен Бабыл патшасының мойынағашын сындырамын+.
3 Бабыл патшасы Навуходоносордың осы жерден алып, Бабылға әкеткен Ехобаның үйінің бар бұйымын+ екі жылдың ішінде осында қайтып әкелемін.
4 Мен Яһуданың патшасы Ехоякімнің+ ұлы Ехонияны+ және Яһудадан Бабылға жер аударылғандардың бәрін+ осында қайтарамын. Себебі мен Бабыл патшасының мойынағашын сындырамын,— дейді Ехоба”.
5 Сонда Еремия пайғамбар Ехобаның үйінде жиналған діни қызметкерлер мен бүкіл жұрттың алдында Хананиях пайғамбарға тіл қатып,
6 былай деді: “Аумин! Ехоба осылай істесін! Сен айтқан осы пайғамбарлық сөздерді Ехоба жүзеге асырып, Ехобаның үйінің ыдыс-аяқтары мен жер аударылған халықты түгелімен Бабылдан осы жерге қайтарсын.
7 Алайда саған және осында жиналған барша жұртқа айтатын сөзімді тыңдашы.
8 Маған және саған дейін өмір сүрген ертедегі пайғамбарлар көптеген елдер мен ұлы патшалықтарға қатысты соғыс, апат, індет жайлы пайғамбарлық етіп жүрді.
9 Егер бір пайғамбар тыныштық жайлы пайғамбарлық етіп, бұнысы орындалса ғана, сол пайғамбарды шынымен Ехобаның жібергені белгілі болатын”.
10 Сонда Хананиях пайғамбар Еремия пайғамбардың мойнындағы мойынағашты алып, сындырып тастады да+,
11 бүкіл жұрттың алдында мынаны айтты: “Ехоба: —Мен тура осылай Бабылдың патшасы Навуходоносордың барлық халықтарға салған мойынағашын екі жылдың ішінде сындырып тастаймын,— дейді”+. Осыдан кейін Еремия пайғамбар өз жөніне кетті.
12 Хананиях пайғамбар Еремия пайғамбардың мойнындағы мойынағашты сындырып тастағаннан кейін, Ехоба Еремияға келесі хабарды айтты:
13 “Бар да, Хананияхқа Ехоба мынаны айтады де: —Сен ағаштан жасалған мойынағашты сындырып тастадың+, енді оның орнына темірден мойынағаш жасайсың.
14 Өйткені Әскербасы Ехоба, Исраилдің Құдайы былай дейді: —Мен осы халықтарды Бабыл патшасы Навуходоносорға қызмет еткізу үшін, мойындарына темірден жасалған мойынағаш кигіземін, олар оған қызмет ететін болады+. Оған тіпті даладағы жабайы аңдарды да бағындырамын+”.
15 Еремия пайғамбар Хананиях+ пайғамбарға былай деді: “Уа, Хананиях, тыңдашы! Ехоба сені жіберген жоқ. Сонда да мына халықты жалған нәрсеге иландырып қойдың+.
16 Сондықтан Ехоба саған былай дейді: —Міне, мен сені жер бетінен жоқ қыламын. Халықты Ехобаға қарсы көтергенің үшін сен осы жылы өлесің+”.
17 Айтқандай-ақ, Хананиях пайғамбар сол жылдың жетінші айында көз жұмды.