Еремия 32:1—44
32 Яһуда патшасы Седекияның билігінің оныншы жылы, Навуходоносордың+ билігінің он сегізінші жылы, Ехоба Еремияға сөзін арнады.
2 Сол уақытта Бабыл патшасының әскері Иерусалимді қоршап тұрған еді. Ал Еремия пайғамбар Яһуда патшасының сарайындағы Күзетші ауласында+ тұтқында отырған.
3 Яһуда патшасы Седекия оған мына сөздерді айтып, қамап қойған еді+: “Неге бұлай пайғамбарлық етесің? Сен Ехоба мынаны айтады деп жүр екенсің: —Мен бұл қаланы Бабыл патшасының қолына беремін, ол оны басып алады+.
4 Яһуда патшасы Седекия халдейлерден қашып құтыла алмайды, ол міндетті түрде Бабыл патшасының қолына түсіп, оны өз көзімен көріп, бетпе-бет сөйлесетін болады+.
5 Ол Седекияны Бабылға алып кетеді. Мен оған назарымды салғанша, сонда болады. Халдейлермен қанша соғыссаңдар да, жеңіске жетпейсіңдер+,— дейді Ехоба”.
6 Еремия былай деді: “Ехоба маған сөзін арнап мынаны айтты:
7 —Саған әкеңнің бауыры Шалумның ұлы Ханамел келіп: “Менің Анатоттағы+ танабымды сатып алыңыз, өйткені оны сатып алу құқы бірінші кезекте сіздікі+”,— дейтін болады”.
8 Ехоба айтқандай, ағамның ұлы Ханамел Күзетші ауласына келіп, маған: “Бениямин жерінде орналасқан Анатоттағы танабымды сатып алыңызшы, өйткені сізде оны иелену де, сатып алу да құқы бар. Сондықтан өзіңізге сатып алыңыз”,— деді. Сонда мұның Ехобаның сөзіне сай болып жатқанын ұқтым.
9 Сөйтіп, мен ағамның ұлы Ханамелден Анатоттағы танабын сатып алдым. Мен оған жеті шекел* және он күміс шекел өлшеп бердім+.
10 Содан сатып алу құжатын жасап+, мөр басып, куәгерлер шақырып+, ақшаны таразыға өлшедім.
11 Сосын сатып алу құжатын, заңға және талаптарға сәйкес мөрленгенін, сондай-ақ мөрленбеген құжатты қолыма алдым.
12 Сосын сатып алу құжатын ағамның ұлы Ханамелдің, осы құжатқа қол қойған куәгерлердің және Күзетші ауласында+ отырған яһудилердің бәрінің көзінше Махсеяхтың немересі, Нерияхтың+ ұлы Барухқа+ бердім.
13 Солардың алдында Барухқа мынаны бұйырдым:
14 “Әскербасы Ехоба, Исраилдің Құдайы былай дейді: —Мына құжаттарды — мөрленген сатып алу құжаты мен мөрленбеген құжатты алып, ұзақ уақыт сақталу үшін қыш құмыраға салып қой.
15 Өйткені Әскербасы Ехоба, Исраилдің Құдайы: —Бұл елде үйлер, танаптар мен жүзімдіктер қайтадан сатып алынатын кез келеді+,— дейді”.
16 Нериях ұлы Барухқа сатып алу құжатын берген соң, Ехобаға былай деп дұға еттім:
17 “Уа, Әлемнің Әміршісі Ехоба! Зор күшіңмен және құдіретті қолыңмен аспан мен жерді жараттың+. Сенің қолыңнан келмейтін еш нәрсе жоқ.
18 Мыңдағандарға* айнымас сүйіспеншілік танытасың, бірақ әкелері жасаған күнәнің салдарын балаларына тартқызасың*+. Сен ұлы да құдіретті, шынайы Құдайсың, есімің — Әскербасы Ехоба.
19 Сенің ой-ниетің ұлы, істерің құдіретті+. Сенің жанарың адам баласының жолын бақылайды+, әрқайсысына жүрген жолы мен істеген ісіне сай қарымтасын қайтарасың+.
20 Мысыр елінде белгілер мен кереметтер жасадың (бұл әлі күнге дейін әйгілі), осылай Исраил мен бүкіл адамзатқа атыңды шығардың+, қазір де бұл солай.
21 Халқың Исраилді Мысыр елінен белгілермен, кереметтермен, қуатты да құдіретті қолыңмен, үрей тудыратын істермен алып шықтың+.
22 Кейінірек сен оларға ата-бабаларына уәде еткен+ осы ағы мен балы ағыл-тегіл мол жерді бердің+.
23 Олар осы елге келіп, оны иемденді, бірақ сенің айтқаныңа мойынсұнбады, заңыңа сай жүрмеді. Бұйырғандарыңның бірін де орындамады, сондықтан да бастарына осы апаттың бәрін жібердің+.
24 Міне, адамдар келіп, қаланы басып алу үшін үйінді жасап жатыр+. Семсерден+, аштық пен індеттен+ зардап шеккен қала өзіне шабуыл жасап жатқан халдейлердің қолына беріледі. Өзің көріп тұрғандай, айтқандарыңның бәрі орындалуда.
25 Уа, Әлемнің Әміршісі Ехоба, бұл қала халдейлердің қолына берілетініне қарамастан, сен маған: —Ақшаға танап сатып ал, бұған куәгерлер шақыр,— деп айттың”.
26 Сонда Ехоба Еремияға сөзін арнап былай деді:
27 “Мен Ехобамын, бүкіл адамзаттың Құдайымын. Менің қолымнан келмейтін нәрсе бар ма?
28 Сондықтан Ехоба былай дейді: —Міне, мына қаланы халдейлердің және Бабыл патшасы Навуходоносордың қолына бермекпін. Ол қаланы жаулап алады+.
29 Қалаға шабуыл жасап жатқан халдейлер ішке кіріп, оған от қояды да, үйлерімен қоса өртеп жібереді+. Халық осы үйлердің төбелерінде Бағалға құрбандықтар шалып, өзге тәңірлерге сұйық тартулар төгіп, мені қорлаған еді+.
30 Исраил мен Яһуда халқы жастайынан менің көз алдымда тек жаман істер жасап келеді+. Исраил халқы іс-әрекеттерімен мені қорлауын қояр емес,— дейді Ехоба.—
31 Мына қала соғылған күнінен бастап бүгінге дейін тек ашуым мен қаһарымды туғызып келеді+, сондықтан ол менің көз алдымнан құруға тиіс+.
32 Исраил мен Яһуда халқы мені қорлап, жасаған бар зұлым істері үшін өздері де, патшалары да+, әміршілері де+, діни қызметкерлері де, пайғамбарлары да+, Яһуда жұрты мен Иерусалим тұрғындары да жойылу керек.
33 Олар менен бет бұрып, теріс айналды+. Оларға қайта-қайта* тәлім бердім, бірақ бірде-біреуі оны қабыл алып, жөнге салуыма көнбеді+.
34 Менің есіміммен аталатын үйге жиіркенішті пұттарын қойып, оны арамдады+.
35 Сонымен қатар Бен-Хенном* аңғарында+ Бағалға ғибадат ететін төбелер жасап, сол жерде ұл-қыздарын өртеп, Молекке құрбан етті+. Мен мұны бұйырған да емеспін+, мұндай жиіркенішті іс ойыма* да келген емес. Осылай Яһуда ауыр күнәға батты.
36 Сондықтан сендер семсерден, аштық пен індеттен зардап шегіп, Бабыл патшасының қолына беріледі деп жүрген қала жайлы Исраилдің Құдайы Ехоба былай дейді:
37 —Ашумен, ызамен, зор қаһармен бытыратып жіберген халықты барлық елдерден қайта жинап+, осы жерге әкелемін, олар қауіп-қатерсіз өмір кешеді+.
38 Олар менің халқым, ал мен олардың Құдайы боламын+.
39 Мен оларға бір жүрек+, бір жол беремін. Сонда олар өздерінің де, кейінгі балаларының да игілігі үшін менен қорқып жүретін болады+.
40 Мен олармен мәңгілік келісім жасасып+, жақсылық жасауды тоқтатпаймын+. Менен сырт айналып кетпеулері үшін, менен қорқуды жүректеріне ұялатамын+.
41 Оларға қуана-қуана жақсылық жасаймын+, оларды бар жүрегіммен, бар жаныммен осы елде берік отырғызамын+.
42 Ехоба былай дейді: —Мына халыққа осындай зор апаттарды қалай жіберген болсам, уәде еткен барлық игілігімді де солай төгемін+.
43 Өздерің “адам да, аң да тұрмайтын әрі халдейлердің қолына берілген қаңыраған ел” деп айтып жүрген осы елде қайтадан танаптар сатып алынатын болады+.
44 Бениямин жерінде, Иерусалимнің төңірегінде, Яһуданың қалаларында+, таулы өңірдегі қалаларда, еңістегі қалаларда+, оңтүстіктегі қалаларда танаптар ақшаға сатып алынады, сатып алу құжаттары жазылып, мөр басылып, куәгерлер шақырылады+. Өйткені мен олардың тұтқынға кеткендерін қайтарамын+,— дейді Ехоба”.
Сілтемелер
^ 1 шекел 11,4 г-ға тең. Ә14 қосымшасын қараңыз.
^ Сөзбе-сөз “әкелерінің күнәсін балаларының қойнына саласың”.
^ Немесе “мыңдаған ұрпаққа”.
^ Сөзбе-сөз “ерте тұрып”.
^ Түсіндірмедегі “Жаһаннам” сөзін қараңыз.
^ Сөзбе-сөз “жүрегіме”.