Еремия 50:1—46
50 Ехоба Бабылға+, Халдей еліне, қатысты Еремия пайғамбарға былай деді:
2 “Халықтарға естіртіп, жариялаңдар,Белгі беретін бағана орнатып, бәріне хабарлаңдар,Ештеңені жасырмаңдар!
—Бабыл жау қолына түсті+.
Жалған тәңір Бел масқара болды+.
Меродахтың* үрейі ұшты.
Оның мүсіндері масқараға қалды.
Жеркенішті пұттарының зәре-құты қашты,— деңдер.
3 Солтүстіктен оған қарсы бір халық келді+.
Ол оның елін адам шошырлық күйге түсірді.
Бірде-бір тұрғыны жоқ.
Адам да, жануар да қашып кеткен.
Олардың біреуі де қалмаған”.
4 “Сол күндері және сол уақытта,— дейді Ехоба,— Исраил мен Яһуда халқы бірге келеді+. Олар жол-жөнекей жылап+, Ехоба Құдайларын бірге іздейтін болады+.
5 Олар Сионға апаратын жолды сұрап, сол жаққа бет бұрып+: —Жүріңдер, ешқашан ұмытылмайтын, мәңгілік келісім+ арқылы Ехобамен бірігейік,— дейтін болады.
6 Менің халқым жоғалған қойлар іспетті болды+. Оларды бағушылары адастырып+, тау жаққа әкетті. Сөйтіп, олар тау-төбелерді кезіп жүріп, өздерінің тынығатын орындарын ұмытты.
7 Оларды тапқандар бас салып жалмады+. Жаулары: —Біздің кінәміз жоқ, өйткені олар Ехобаға, әділдіктің мекені әрі ата-бабалары үміт артқан Ехобаға, қарсы күнә жасады,— деді”.
8 “Бабылдан қашыңдар,Халдейлердің елінен шығыңдар+,Отардың алдында жүретін серке не қошқардай болыңдар.
9 Өйткені мен солтүстіктегі елден Бабылға қарсыҰлы халықтардың қауымын әкеле жатырмын+.
Олар оған сап түзеп келеді.
Сөйтіп, ол солардың қолына түседі.
Жебелері мықты жауынгердің жебелеріндей,Ата-ананы балаларынан айырады+.
Олар олжасыз қайтпайды.
10 Халдей елі олжаға айналады+.
Оны талан-таражға салғандар әбден қарық болады+”,— дейді Ехоба.
11 “Өйткені менің меншігімді тонап жатып+,Сен мәз-мейрам болып шаттандың+.
Көк майсада тайыншадай ойнақтап,Айғырлардай кісіней бердің.
12 Сенің анаң ұятқа қалды+.
Сені дүниеге әкелген оның көңілі қалды.
Міне, ол — халықтардың ішіндегі ең елеусізі,Ол қуаң тартқан құла түзге, шөл далаға айналды+.
13 Ехобаның ашу-ызасына тигендіктен, енді оны ешкім мекендемейді+.
Ол мүлдем қаңырап бос қалады+.
Өткен-кеткендер Бабылдың басына түскен бар пәлені көріп,Үрейлене қарап, таңғала ысқыратын болады+.
14 Садақ кергендердің бәрі,Бабылға жан-жақтан сап түзеп келіңдер!
Оны атқылаңдар, жебелеріңді аямаңдар+,Өйткені ол Ехобаға қарсы күнә жасады+.
15 Оған жан-жақтан атой салыңдар!
Ол берілді, бағаналары құлап, қабырғалары қирады+.
Өйткені бұл — Ехобаның кек алуы+.
Одан еселеріңді қайтарыңдар.
Істегенін өз басына келтіріңдер+.
16 Бабылдан диқаншыны да,Егінге орақ салған орақшыны да құртыңдар+.
Жалаңдаған семсерден қорыққандықтан,Әрқайсысы өз халқына оралады,Әркім өз еліне қашып кетеді+.
17 Исраил халқы тентіреп кеткен қойлар іспетті+. Арыстандар оларды бытыратып жіберді+. Алдымен, оларды Ассирия патшасы жалмады+, сосын, Бабыл патшасы Навуходоносор олардың сүйегін мүжіді+.
18 Сондықтан Әскербасы Ехоба, Исраилдің Құдайы былай дейді: —Ассирия патшасын қалай жазаласам+, Бабыл патшасы мен оның елін де солай жазалаймын.
19 Сосын Исраилді өз жайылымына қайтарамын+. Ол Кармил мен Башанда жайылады+, Ефрем+ мен Ғалақаттың+ таулы өңірінде тойынатын болады.
20 Сол күндері және сол уақытта,Исраилдің айыбын іздестіргенде,Ол жоқ болып шығады.
Яһуданың күнәлары да табылмайды,Өйткені өзім аман алып қалғандарды кешіремін+”,— дейді Ехоба.
21 “Сен Мератаим жері мен Пеходтың+ тұрғындарына қарсы аттан.
Оларды қырып-жойып, бірін де қалдырма,Бұйырғандарымның бәрін орында”,— дейді Ехоба.
22 “Осы елде шайқастың,Зор апаттың у-шуы естіледі.
23 Жер бетіндегі халықтардың бәрін қиратқан ұста балғасы сынып, қирады+!
Бабыл халықтар арасында қорқынышты көрініске айналды+!
24 Уа, Бабыл, мен саған тұзақ құрдым, сен соған түстің,Бірақ мұны өзің аңғармадың.
Сен қолға түсіп, тұтқындалдың+.
Өйткені Ехобаға қарсы шықтың.
25 Ехоба өзінің қоймасын ашып,Қаһарының қару-жарағын шығарды+.
Өйткені Әлемнің Әміршісі Әскербасы ЕхобаныңХалдейлердің елінде бір ісі бар.
26 Оған қарсы алыс жерлерден келіп+,Оның қамбаларын ашыңдар+.
Оны астық сияқты төбе-төбе етіп үйіңдер.
Тып-типыл етіп жойыңдар+.
Бірде-бір жан қалмасын.
27 Оның жас бұқаларын қырыңдар+.
Бәрін әкетіп, бауыздаңдар.
Олар қасіретке қалды, өйткені бастарына күн туды,Жауапқа тартылатын уақыты келді!
28 Бабыл елінен бассауғалағандардың,Қашқандардың даусы шығады.
Олар Ехоба Құдайымыздың кек қайтарғанын,Өз ғибадатханасы үшін өш алғанын Сионда жарияламақ+.
29 Бабылға қарсы садақшыларды,Садақ керген мергендердің бәрін шақырыңдар+.
Оның айналасына қос тігіңдер, ешкім қашып кетпесін.
Іс-әрекетіне сай оған сазайын беріңдер+,Жасағанын өз басына келтіріңдер+.
Өйткені ол Исраилдің Киелісінің алдында+,Ехобаның алдында менмендік танытты.
30 Сондықтан жас жігіттері көпшілік алаңдарда мерт болады+,Сарбаздарының бәрі сол күні қырылады”,— дейді Ехоба.
31 “Міне, мен саған қарсы шығамын+, уа, менмен Бабыл+,— дейді Әлемнің Әміршісі Әскербасы Ехоба,—Өйткені сенің күнің, жауапқа тартылатын уақытың келеді.
32 Уа, тәкаппар Бабыл, сүрініп құлайсың,Ешкім сені тұрғызбайды+.
Мен қалаларыңды отқа ораймын,Ол айналаңдағының бәрін жалмайды”.
33 Әскербасы Ехоба мынаны айтады:
“Исраил мен Яһуда халқы езгі көруде,Тұтқынға алғандар оларды мықтап ұстап+, жібергісі келмейді+.
34 Бірақ олардың Құнын өтеушінің құдіреті зор+.
Оның есімі — Әскербасы Ехоба+.
Ол міндетті түрде олардың мүддесін қорғап+,Елдеріне тыныштық орнатады+.
Ал Бабылдың тұрғындарын абыржытады+”.
35 Ехоба былай дейді: “Өздеріне қарсы көтерілген семсерден халдейлер,Бабылдың тұрғындары, әміршілері мен данышпандары жойылады+.
36 Бос сөз айтатындарға* қарсы семсер көтеріледі, сонда олар ессіз әрекет етеді.
Оның сарбаздарына семсер көтеріледі, сонда зәре-құттары қалмайды+.
37 Олардың аттары мен соғыс арбаларына,Арасындағы өзге жұрттарға қарсы семсер көтеріледі,Сонда олар әйел іспетті әлсіз болып қалады+.
Бабыл қазынасына қарсы семсер көтеріледі, сонда ол талан-таражға түседі+.
38 Суларының айналасы қирап, сулары тартылып қалады+.
Өйткені Бабыл — ойып жасалған мүсіндердің елі+,Қорқынышты аяндар көргендіктен, олар ессіз әрекет етуде.
39 Сондықтан шөл даланың аңдары ұлитын аңдармен бірге мекендеп,Ол түйеқұстардың қонысына айналады+.
Енді қайтып онда ел қоныстанбайды,Ұрпақтан ұрпаққа қаңырап бос тұрады+”.
40 “Мен Содом, Ғомора+ және көршілес қалаларын+ құртқанымдай, оны да құртамын. Онда ешкім қоныстанбайды, адам баласы тұрмайды+,— дейді Ехоба.
41 —Міне, солтүстіктен бір халық келе жатыр.
Жердің қиыр шеттерінен+ үлкен халық, ұлы патшалар көтеріледі+.
42 Олар садақ пен найзаны епті қолданады+.
Сондай-ақ қатыгез, аяушылықты білмейді+.
Атқа мініп шапқаны долданған теңіздің гүріліндей+.
Уа, Бабылдың қызы, олар саған қарсы сап түзеп,Бір кісідей келе жатыр+.
43 Бабыл патшасы олар жайлы хабарды естігенде+,Қорыққаннан қолдары дірілдеді+.
Толғатқан әйелдей қиналып, әбден азапқа түсті.
44 Міне, Иорданның бойындағы қалың тоғайлардан қауіпсіз жайылымға шыға келген арыстандай біреу келеді, сол сәтте-ақ мен оларды өз жерінен қашуға мәжбүр етемін. Сосын сол жердің үстінен өзім таңдаған біреуді тағайындаймын+. Маған тең келетін кім бар? Менімен дауласуға кімнің дәті барады? Қандай бағушы маған қарсы тұра алады+?
45 Олай болса, уа, адамдар, Ехобаның Бабылға шығарған шешімін+ және халдейлердің жеріне қарсы не ойластырғанын тыңдаңдар:
Отардағы тоқтылар сүйреп әкетіледі.
Істеген зұлымдықтарының кесірінен мекендері қаңырап бос қалдырылады+.
46 Бабыл қолға түскен кездегі у-шудан жер дірілдейді,Оның айқайы халықтар арасына жетеді+”.
