Зәкәрия 1:1—21
1 Дарийдің екінші жылының+ сегізінші айында Ехоба* Құдай Зәкәрия*+ пайғамбарға (Зәкәрия Берекияның, Берекия Иддоның ұлы болатын) сөзін арнап былай деді:
2 “Ехоба сендердің ата-бабаларыңа қатты ашуланған еді+.
3 Оларға бар да, Әскербасы Ехоба мынаны айтып жатыр де: —Маған қайта оралыңдар,— дейді Әскербасы Ехоба. Сонда мен де сендерге ораламын+,— дейді Әскербасы Ехоба.
4 Ата-бабаларың сияқты болмаңдар. Бұрынғы пайғамбарлар оларға Әскербасы Ехобаның “жаман жолдарыңды, зұлым істеріңді тастап, маған бет бұрыңдаршы*”+ деген сөздерін жариялаған еді. Бірақ ата-бабаларың тыңдамады, маған мән де бермеді+,— дейді Ехоба.
5 Сол ата-бабаларың қазір қайда? Пайғамбарлар мәңгі өмір сүрді ме?
6 Алайда менің қызметшілеріме, пайғамбарларға, бұйырған сөздерім мен нұсқауларымның орындалғанын ата-бабаларың өз көздерімен көрді, солай емес пе+? Сөйтіп, олардың өкініп: —Әскербасы Ехоба өз шешімін жүзеге асырып, ұстанған жолдарымыз бен істеген істерімізге сай жазалады,— деп мойындауына тура келді+”.
7 Дарийдің билігінің екінші жылы+, он бірінші айдың, яғни шебат* айының, жиырма төртінші күні Ехоба Зәкәрия пайғамбарға (Зәкәрия Берекияның, Берекия Иддоның ұлы болатын) аян берді.
8 Мен түнгі осы аянда мынаны көрдім: қызыл атқа мінген бір адам шатқалдағы мирта ағаштарының арасында тапжылмай тұр екен. Оның арт жағында қызыл, күрең және ақ аттар тұрды.
9 Сонда мен: “Ием, мына салт аттылар кімдер?”— деп сұрадым. Менімен сөйлесіп тұрған періште: “Саған бұлардың кім екенін көрсетейін”,— деп жауап қатты.
10 Сонда мирта ағаштарының арасында тапжылмай тұрған әлгі адам: “Бұлар Ехобаның жер бетін шарлап келуге жібергендері”,— деді.
11 Олар мирта ағаштарының арасында тұрған Ехобаның періштесіне: “Біз жер бетін шарлап шықтық. Бүкіл жер беті тыныш әрі бейқам жатыр екен+”,— деді.
12 Сол кезде Ехобаның періштесі: “Уа, Әскербасы Ехоба, Иерусалим мен Яһуданың басқа да қалаларына қашанғы рақым етпейсің+? Оларға ашуланғаныңа, міне, 70 жыл болды ғой+”,— деді.
13 Ехоба менімен сөйлесіп тұрған періштеге жылы да жұбататын сөздермен жауап берді.
14 Сонда періште маған: “Сен жар салып, Әскербасы Ехоба мынаны айтады де: —Иерусалим мен Сионды құлшына қорғаймын, менің құлшынысым орасан зор+.
15 Мен алаңсыз жатқан халықтарға+ қатты ашулымын. Өйткені халқымды шамалы ғана жазаламақ едім+, ал олар болса халқыма тым көп зорлық көрсетті+.
16 Сондықтан Ехоба: —Иерусалимге рақым ету үшін ораламын+, сол жерде менің үйім қайта соғылады+,— дейді.— Иерусалимді қайта тұрғызу үшін, өлшеуіш жіп тартылатын болады+,— дейді Әскербасы Ехоба.
17 Сен тағы да жар салып, Әскербасы Ехоба мынаны айтады де: —Менің қалаларым қайтадан ағыл-тегіл игілікке кенеледі. Ехоба Сионды қайта жұбатады+, Иерусалимді қайта таңдайды+”.
18 Сосын жоғары қарап, төрт мүйізді көрдім+.
19 Сонда менімен сөйлесіп тұрған періштеден: “Бұл мүйіздер нені білдіреді?”— деп сұрадым. Ол: “Бұл мүйіздер Яһуданы+, Исраил+ мен Иерусалимді+ бытыратып жіберген күштерді білдіреді”,— деп жауап берді.
20 Содан кейін Ехоба маған төрт ұстаны көрсетті.
21 Мен: “Олар не істеу үшін келе жатыр?”— деп сұрадым. Ол болса: “Бұлар Яһуданы ешкім бас көтере алмастай етіп бытыратып жіберген мүйіздер. Ал ұсталар олардың үрейін ұшыру үшін, сондай-ақ Яһуда елін бытыратпақ болып, оған қарсы мүйіздерін көтерген халықтардың мүйіздерін құлату үшін келеді”,— деді.
Сілтемелер
^ Бұл — Құдайдың есімі. Түсіндірмені қараңыз.
^ Мағынасы “Ехоба есіне алды”.
^ Немесе “оралыңдар”.
^ Ә15 қосымшасын қараңыз.