Мұсаның 1-жазбасы 40:1—23
40 Содан бір күні Мысыр патшасының бас шарапшысы*+ мен бас наубайшысы қожайындарының, яғни Мысыр патшасының, алдында кінәлі болып қалды.
2 Перғауын бұл екі қызметшісіне, бас шарапшы мен бас наубайшыға+, ашуланып,
3 оларды бас қорғаушының+ түрмесіне қаматты. Бұл түрмеде Жүсіп те отырған еді+.
4 Бас қорғаушы екеуін Жүсіптің қарамағына тапсырып, ол соларға қызмет көрсетті+. Олар түрмеде біраз уақыт отырды.
5 Түрмеде жатқан шарапшы мен наубайшы бір күні түнде түс көрді. Түстерінің белгілі бір мағынасы бар еді.
6 Жүсіп оларға таңертең келгенде, екеуі де мұңайып отыр екен.
7 Сонда ол өзімен бірге түрмеде отырған перғауынның қызметшілерінен: “Неге жүздеріңіз жабырқаулы?”— деп сұрады.
8 Бұған олар: “Екеуміз де түс көріп едік, олардың мағынасын түсіндіріп беретін ешкім болмай тұр”,— деп жауап берді. Сонда Жүсіп: “Түстің мағынасын ашып беретін Құдай емес пе+?! Не көргендеріңізді маған айтып беріңіздерші”,— деді.
9 Бас шарапшы көрген түсін Жүсіпке былай деп айта бастады: “Түсімде мен бір жүзім сабағын көрдім.
10 Сабақтың үш өркені бар екен деймін. Олар бүршік атып, гүлдеді, кейін жүзімдері пісіп жетілді.
11 Қолымда перғауынның тостағаны бар екен, мен оған жүзімдерді сығып, тостағанды перғауынның қолына ұстаттым”.
12 Жүсіп оған былай деді: “Түсіңіздің мағынасы мынау: үш өркен үш күнді білдіреді.
13 Үш күннен кейін перғауын сізді босатып, қызметіңізге қайта тағайындайды+. Сөйтіп, сіз бұрынғыдай перғауынның шарапшысы болып, оған тостаған ұсынатын боласыз+.
14 Ісіңіз оңалған шақта мені есіңізге алсаңыз екен. Перғауынға мен жайлы бірауыз сөз айтып, осы жерден шығарып алып, маған мейірімділік* таныта көріңіз.
15 Мені еврейлердің жерінен ұрлап әкелген еді+. Бұл жерде түрмеге түсетіндей мен еш қылмыс жасаған жоқпын+”.
16 Түсті жақсылыққа жорып бергенін көргенде, бас наубайшы Жүсіпке: “Мен де түс көрдім. Түсімде ақ нан салынған үш себетті басыма қойып алыппын.
17 Үстіңгі себетке перғауынға арнап пісірілген түрлі нан тағамдары салыныпты. Басымдағы себеттің ішіндегілерін құстар шоқып жатыр екен”,— деді.
18 Жүсіп оған: “Түсіңіздің мағынасы мынау: үш себет үш күнді білдіреді.
19 Үш күннен кейін перғауын басыңызды алып, сізді бағанаға іліп қояды, ал құстар етіңізді шоқып жейтін болады+”,— деді.
20 Үш күн өткеннен кейін перғауынның туған күні+ болды. Ол барлық қызметшісін жинап, той жасады да, бас шарапшысы мен бас наубайшысын алдыртып, қызметшілерінің ортасына шығарды.
21 Сөйтіп, ол бас шарапшыны бұрынғы қызметіне қайтарып, шарапшы бұрынғыдай перғауынға тостаған ұсынатын болды.
22 Ал бас наубайшыны, Жүсіп алдын ала айтқандай+, бағанаға іліп қойды.
23 Алайда бас шарапшы Жүсіпті есіне алмады, ол жайлы ұмытып кетті+.
