Мұсаның 4-жазбасы 36:1—13
-
Мұралық жері бар қыздың тұрмысқа шығуына қатысты заң (1—13)
36 Жүсіптің шөбересі, Манасаның немересі, Махирдің ұлы Ғалақаттан тараған+ әулетбасылары Мұса мен басшыларға, яғни исраилдіктердің әулетбасыларына келіп,
2 былай деді: “Ехоба біздің мырзамызға жерді исраилдіктерге жеребе+ арқылы бөліп беруді бұйырған еді. Сонда Ехоба мырзамызға бауырымыз Салопахадқа тиген жерді қыздарына беруді бұйырған+.
3 Егер олар Исраилдің басқа руының адамына тұрмысқа шықса, олардың мұралық жерлері әкелерімізге тиген мұралық жерден бөлініп, сол руға өтеді ғой. Сонда бұл жер біздің жеребе арқылы иемденген үлесімізден шығып қалады.
4 Азаттық жылы+ келгенде, сол қыздардың мұралық жері тұрмысқа шыққан руға біржола өтеді ғой. Сонда олардың мұралық жері әкелеріміздің руына тиген үлестен біржола шығып қалады”.
5 Сол кезде Мұса Ехобаның бұйыруымен исраилдіктерге былай деді: “Жүсіптің ұрпағынан тараған рудың адамдары дұрыс айтады.
6 Ехоба Салопахадтың қыздарына мынаны бұйырады: —Олар қалаған адамына тұрмысқа шығуына болады, алайда өз руының бір әулетіндегі ер адамға шықсын.
7 Исраилдіктердің мұралық жері бір рудың меншігінен екінші рудікіне өтпесін. Өйткені исраилдіктер ата-бабаларының руына берілген мұралық жерді сақтап қалулары керек.
8 Исраил руларының ішінен мұралыққа жер алған әрбір қыз өз руындағы ер адамға күйеуге шықсын+. Осылай исраилдіктер ата-бабаларының үлесіне тиген жерді сақтап қалады.
9 Сонымен, мұралық жер бір рудан екінші руға өтпесін. Исраилдің әрбір руы өзінің үлесіне тиген жерді сақтап қалсын”.
10 Салопахадтың қыздары Ехобаның Мұсаға бұйырғанындай істеді+.
11 Махла, Тирса, Хогла, Мылқа және Ноға есімді осы қыздар+ әкелерінің бауырларының ұлдарына тұрмысқа шықты.
12 Осылайша олар мұралық жерлерін өз руларының меншігінде сақтап қалу үшін, Жүсіп ұлы Манасадан тараған әулеттердің ішіндегі ер адамдарға шықты.
13 Ехобаның Иерихонға қарама-қарсы, Иордан өзенінің бойындағы Моаб шөл даласында Мұсаға берген заңдары мен шешімдері, міне, осылар+.
