Патшалар 2-жазба 21:1—26
21 Манаса+ 12 жасында патша болып, Иерусалимде 55 жыл билік етті+. Оның анасының аты Хепсиба болатын.
2 Манаса кезінде Ехоба исраилдіктердің алдынан қуып шыққан халықтардың жеркенішті істерін қайталап+, Ехобаның алдында ұнамсыз істер істеді+.
3 Ол әкесі Езекия құртып жіберген ғибадат төбелерін+ қайта соқты, Бағалға арнап құрбандық орындарын және қасиетті бағана*+ да жасады. Осылай Исраил патшасы Ахабтың істеріне еліктеді+. Бұнымен қоймай, бүкіл көк әскеріне табынып, соларға қызмет етті+.
4 Ертеректе Ехоба: “Мен өз есімімді Иерусалимде орнықтырамын”,— деген еді+. Ал Манаса Ехобаның үйінде құрбандық орындарын жасады+.
5 Ол Ехобаның үйінің екі ауласында+ күллі көк әскеріне+ арнап құрбандық орындарын жасады.
6 Сонымен қатар ол өз ұлын құрбандыққа шалып, отқа өртеді, сиқырлықпен айналысты, белгілерге қарап, болашақты болжады+, аруақ шақырушылар мен көріпкелдер тағайындады+. Осылай Ехобаға ұнамайтын істерді көптеп істеп, оны қорлады.
7 Манаса өзі жасатқан қасиетті бағана*+ мүсінін Ехобаның үйіне қойып қойды. Ал осы үй жөнінде Құдай Дәуіт пен оның ұлы Сүлейменге былай деген еді: “Мен осы үйде, сондай-ақ күллі Исраил руларының арасынан таңдап алған Иерусалим қаласында өз есімімді мәңгіге орнықтырамын+.
8 Исраил халқы өз қызметшім Мұса арқылы берген Заңымды толықтай ұстанып, бұйрықтарымның бәрін мұқият орындап жүрсе+, мен енді қайтып ешқашан оларды ата-бабаларына берген осы жерден аластатып, қаңғыртып жібермеймін+”.
9 Бірақ жұрт тыңдамады. Манаса оларды теріс жолға түсіріп, әбден адастырды. Олар кезінде Ехоба исраилдіктердің алдынан құртып жіберген халықтардан+ да бетер зұлымдық жасады.
10 Ехоба мынадай хабармен талай рет пайғамбарларын жіберді+:
11 “Манаса патша осындай жиренішті істер істеп, өзіне дейін осында өмір сүрген аморлықтардан+ да асып түсті+. Ол жеркенішті пұттарымен Яһуданы күнәға батырды.
12 Сондықтан Исраилдің Құдайы Ехоба мынаны айтады: —Мен Иерусалим қаласы мен Яһуда елін зор пәлеге ұшыратамын+. Сол туралы естіген адамның құлағы шыңылдайтын болады+.
13 Мен Иерусалимнің үстінен Самарияға+ қолданған өлшеуіш жіпті керемін+, Ахабтың үйіне қолданған тіктегішті қолданамын+. Жұрттың босаған табақты сүртіп, төңкеріп қоятынындай, мен де Иерусалимнің халқын тып-типыл етіп құртып жіберемін+.
14 Меншікті халқымның тамтығын тастап кетіп+, жауларының қолына беремін. Барлық жаулары оларды талан-тараж етіп, олжалайды+.
15 Өйткені олар маған ұнамсыз істер істеп, ата-бабалары Мысырдан шыққаннан күні бүгінге дейін мені қорлауды қояр емес+”.
16 Манасаның Яһуда халқының Ехобаға ұнамсыз істер істеуіне түрткі болып, күнәға батқаны өз алдына, ол Иерусалимді о шетінен бұ шетіне дейін кінәсіз адамдардың қанына толтырды+.
17 Манасаның басқа да істері мен жасаған күнәлары Яһуда патшаларының тарихы баяндалған кітапта жазылған.
18 Ақырында ол ата-бабаларына қосылды да, сүйегі өз үйіндегі баққа, Ұзаның бағына қойылды+. Ал орнына ұлы Амон таққа отырды.
19 Амон+ 22 жасында патша болып, Иерусалимде екі жыл билік етті+. Оның анасы жотпалық Харуздың қызы Мешулемет болатын.
20 Амон әкесі Манаса сияқты, Ехобаның алдында ұнамсыз істер істеді+.
21 Ол әкесі жүрген жолдардан таймай, әкесі қызмет еткен жеркенішті пұттарға қызмет етіп, соларға табынды+.
22 Осылай ата-бабаларының Құдайы Ехобадан безіп кетті, ол Ехобаның жолымен жүрмеді+.
23 Ақыры қызметшілері Амонға қастандық жасап, патшаны өз үйінде өлтіріп кетті.
24 Бірақ халық Амон патшаға қастандық жасағандардың бәрін өлтіріп, әкесінің орнына ұлы Жосияны патша етіп қойды+.
25 Амонның басқа да істері Яһуда патшаларының тарихы баяндалған кітапта жазылған.
26 Оның денесі Ұзаның бағына қойылды+, ал орнына ұлы Жосия+ патша болды.
Сілтемелер
^ Түсіндірмедегі “Қасиетті ағаш бағананы” қараңыз.
^ Түсіндірмедегі “Қасиетті ағаш бағананы” қараңыз.