Патшалар 2-жазба 22:1—20
22 Жосия+ сегіз жасында патша болып, Иерусалимде 31 жыл билік етті+. Оның анасы босқаттық+ Адаяхтың қызы Едида болатын.
2 Жосия Ехобаның алдында ұнамды істер жасап, арғы атасы Дәуіттің жолымен жүрді+, әрі одан оңға да, солға да ауытқымады.
3 Патшалық құруының он сегізінші жылы Жосия патша өзінің хатшысы Мешуламның ұрпағы Асалиях ұлы Шафанды Ехобаның үйіне жіберіп+, былай деді:
4 “Бас діни қызметкер Хелкияға+ барып айт, жұрт Ехобаның үйіне әкеліп, қақпа күзетшілері жинап+ тапсырған барлық ақшаны санасын+.
5 Жиналған ақша Ехобаның үйіндегі жөндеу жұмысын басқарушыларға берілсін. Олар сол ақшадан Ехобаның үйіндегі бұзылған жерлерді жөндеп жатқан жұмысшылардың+,
6 яғни ұсталар, құрылысшылар мен тас қалаушылардың ақысын төлесін. Жөндеу жұмыстарына қажетті ағаштар мен қашалған тастар да осы ақшаға алынсын+.
7 Ақшаны жұмсап жатқандар сенімді адамдар, сондықтан олардан есеп талап етудің қажеті жоқ+”.
8 Кейінірек бас діни қызметкер Хелкия хатшы Шафанға+: “Мен Ехобаның үйінен Заң кітабын+ тауып алдым”,— деді де, кітапты соған берді. Ал ол Заңды оқи бастады+.
9 Бұдан кейін хатшы Шафан патшаға барып: “Қызметшілеріңіз Ехобаның үйіндегі жәшіктерден ақшаны алып, жөндеу жұмыстарын басқарушылардың қолына тапсырды”,— деді+.
10 Сосын ол: “Діни қызметкер Хелкия маған мына кітапты+ берді”,— деп қосты да, патшаның алдында кітапты оқи бастады.
11 Патша Заң кітабында не жазылғанын естіген бойда, киімінің өңірін айырып жіберді+.
12 Бұдан кейін діни қызметкер Хелкияға, Шафан ұлы Ахиқамға+, Михая ұлы Ахборға, хатшы Шафанға және қызметшісі Асаяға былай деп тапсырды:
13 “Барып, Ехобадан менің атымнан және мына халық пен бүкіл Яһуданың атынан табылған кітаптағы сөздер туралы сұрап келіңдер. Өйткені ата-бабамыз осы кітапта бізге қатысты жазылған нұсқауларды орындамай, ондағы сөздерге мойынсұнбады. Сондықтан Ехоба бізге қаһарын төгіп жатыр+”.
14 Содан діни қызметкер Хелкия, Ахиқам, Ахбор, Шафан мен Асая Олдама пайғамбарға+ барды. Ол киім қоймасының басқарушысы Хасраның немересі, Тиқуа ұлы Шалумның әйелі еді. Олдама Иерусалим қаласының Екінші ауданында тұратын. Патша жіберген кісілер сол жерге келіп, оған бұйымтайларын айтты+.
15 Пайғамбар әйелдің жауабы мынау болды: “Исраилдің Құдайы Ехоба былай дейді: —Сендерді маған жіберген кісіге айтыңдар.
16 Ехоба былай дейді: “Мен осы жерді және оның тұрғындарын апатқа ұшыратамын. Яһуда патшасы сол кітаптан оқыған+ сөздердің бәрін бастарына түсіремін.
17 Өйткені олар менен безіп, өз қолдарымен жасаған бөтен құдайларға+ құрбандық түтінін түтетіп+, мені қорлауда. Сондықтан мен осы жерге қаһарымды лаулатамын, әрі ол еш сөнбейді+”.
18 Сосын Олдама пайғамбар былай деп сөзін жалғады: “Ал сендерді Ехобаның еркін сұрауға жіберген Яһуда патшасына мынаны айтыңдар: —Исраил Құдайы Ехоба өзің естіген сөздер жайлы былай дейді:
19 “Сен менің “осы жер мен оның тұрғындары өзгелерде үрей тудыратындай күйге ұшырайды әрі қарғысқа қалады” деген сөздерімді естігенде, жүрегіңді қасарыстырмай, қайта, Ехобаның алдында кішірейіп+, киіміңнің өңірін айырдың+. Сол үшін мен де сенің сөздеріңді естідім. Мұны айтып отырған — Ехоба.
20 Сондықтан да сені ата-бабаларыңа қосамын да, тыныштықта қабірге қойыласың. Осылай мен осы жерге жіберетін апатты көрмейсің”. Содан жіберген кісілері патшаға осындай жауап алып келді.
