Патшалар 2-жазба 8:1—29
8 Бір күні Еліше өзі баласын тірілтіп берген әйелге+: “Тұр да, үй ішіңмен бірге, өзің бара алатын жаққа көшіп, сол жерде жатжерлік ретінде біраз тұрып келіңдер. Өйткені Ехоба мына елге жеті жылға созылатын ашаршылық жібермек+”,— деді.
2 Содан әйел шынайы Құдай адамы айтқандай, тұрды да, үй ішімен філістірлер жеріне+ көшіп барып, сонда жеті жыл тұрды.
3 Жеті жылдан кейін ол філістір жерінен еліне оралып, үйі мен танабын қайтаруын сұрамақ болып патшаға барды.
4 Тап сол кезде шынайы Құдай адамының қызметшісі Гехезимен әңгімелесіп отырған патша одан: “Маған Елішенің ұлы істері жайлы айтып берші”+,— деп сұраған еді.
5 Гехези патшаға Елішенің өлген баланы тірілткені жайлы айтып беріп жатқанда+, сол баланың анасы үйі мен танабын қайтаруды сұрап келді+. Оны көре сала Гехези: “Тақсыр ием, әлгі әйел — осы, ал мынау — оның Еліше тірілткен ұлы”,— деді.
6 Патша не болғанын әйелдің өзінен сұрағанда, ол бәрін айтып берді. Сонда патша әйелдің мәселесін шешуге сарай қызметкерлерінің бірін тағайындап, оған: “Мына әйелге бар меншігі мен басқа елге кеткен кезінен күні бүгінге дейін жерінен түскен бар өнімін қайтарып алып бер!”— деп тапсырды.
7 Бірде Еліше Дамаскіге+ барды. Бұл кезде сырқаттанып жатқан Сирия патшасы Бен-Хададқа+ “қалаға шынайы Құдай адамы+ келіпті” деген хабар жетті.
8 Сонда патша Хазаелге+: “Қолыңа сыйлық алып, шынайы Құдай адамының алдынан шық+. Мына ауруымнан айығамын ба, жоқ па — сол арқылы Ехобадан сұрап білші”,— деп тапсырды.
9 Хазаел Дамаскінің жақсы-жақсы заттарынан 40 түйеге сыйлық артып алып, жолға шықты. Ол Елішенің алдына келіп: “Мені Сирия патшасы ұлыңыз Бен-Хадад сізден: —Мына ауруымнан айығамын ба, жоқ па?— деп сұрауға жіберді”,— деді.
10 Еліше Хазаелге: “Бар да, оған: —Міндетті түрде айығасың,— де. Бірақ Ехоба маған оның өлетінін көрсетті+”,— деп жауап берді.
11 Сосын ол Хазаелден көз алмай, қадала қарап тұрды. Хазаел ыңғайсызданып кетті. Бұдан кейін шынайы Құдай адамы жылай бастады.
12 Хазаел одан: “Мырза, неге жылайсыз?”— деп сұрады. Еліше мынаны айтты: “Себебі мен сенің Исраил еліне қандай зұлымдық жасайтыныңды білемін+. Сен олардың бекіністерін өртеп, батырларын семсермен қырасың, нәрестелерін тасқа ұрып өлтіресің, жүкті әйелдерінің іштерін жарып тастайсың+”.
13 Хазаел: “Қызметшіңіздің иттен артық жері жоқ қой, оның қолынан мұндай іс келуші ме еді?— деп еді, Еліше: —Ехоба маған сенің Сирия патшасы болатыныңды ашты+”,— деп жауап берді.
14 Бұдан кейін Хазаел Елішенің қасынан кетіп, қожайынына оралды. Патша: “Еліше не айтты?— деп сұрағанда, Хазаел: —Ол сіздің міндетті түрде сауығып кететініңізді айтты”,— деді+.
15 Бірақ келесі күні ол бір жамылғыны суға малып алды да, сонымен патшаның бетін жауып, тұншықтырып өлтірді+. Ал өзі оның орнына патша болып алды+.
16 Исраил патшасы Ахаб ұлы Жорамның+ билік құруының бесінші жылы Жосафат ұлы Жорам+ Яһуда елінің патшасы болды.
17 Патша тағына отырғанда ол 32 жаста еді. Жорам Иерусалимде сегіз жыл билік етті.
18 Ол Исраил патшаларының жолымен жүріп+, Ахабтың үйі істегенді істеді+. Өйткені оның әйелі Ахабтың қызы еді+. Осылай ол Ехобаның алдында ұнамсыз істер істеді+.
19 Бірақ Ехоба қызметшісі Дәуітті құрметтегендіктен, Яһуданы құртып жібергісі келмеді+. Ол Дәуітке уәде етіп, өзінің және ұлдарының шырағын ешқашан өшірмейтінін айтқан еді+.
20 Жорамның тұсында Едом Яһудаға қарсы бас көтеріп+, өздеріне патша тағайындап алды+.
21 Сонда Жорам бүкіл арбаларымен Сайырға аттанды. Ол түнде тұрып, өзін қоршауға алған едомдықтар мен олардың арбакештерінің басшыларын қырып тастап, жеңіске жетті. Ал жасақшылар үйді-үйіне қашып кетті.
22 Бірақ едомдықтар Яһудаға қарсы күні бүгінге дейін бас көтеріп келеді. Сол кезде Либна қаласы+ да бас көтерген еді.
23 Жорамның басқа да істері Яһуда патшаларының тарихы баяндалған кітапта жазылған.
24 Ақырында ол көз жұмып, ата-бабаларына қосылды да, сүйегі арғы атасы Дәуіттің қаласына қойылды+. Оның орнына ұлы Ахазия+ патша болды.
25 Жорам ұлы Ахазия Яһуда тағына Исраил патшасы Ахаб ұлы Жорамның билік құруының он екінші жылы отырды+.
26 Ол 22 жасында патша болып, Иерусалимде бір жыл билік етті. Оның анасы Исраил патшасы Омридің+ немересі Аталия еді+.
27 Ахазия Ахаб үйінің жолымен жүрді+. Ол Ахаб үйінің істегенін қайталап, Ехобаға ұнамайтынды істеді. Өйткені ол Ахабтың үйімен туыс болатын+.
28 Сондықтан ол Ахаб ұлы Жорамға еріп, Сирия патшасы Хазаелмен соғысуға Рамот-Ғалақатқа+ барды. Бірақ сол шайқаста сириялықтар Жорамды жаралады+.
29 Жорам Рамақта Сирия патшасы Хазаелмен соғысқанда алған жарақатын емдеу үшін Езрехелге+ келді+. Сонда Яһуда патшасы Жорам ұлы Ахазия науқастанып жатқан Ахаб ұлы Жорамның халін сұрау үшін Езрехелге ылдилап барды.
