Римдіктерге 12:1—21
12 Сондықтан, бауырластар, Құдай жанашырлық танытқандықтан сендерден мынаны өтінемін: денелеріңді+ тірі, қасиетті+, Құдайға ұнамды құрбандық ретінде ұсыныңдар. Осылай еткендерің ақыл-ойларыңды+ іске қосып атқарған қасиетті қызметтерің болмақ.
2 Бұдан былай осы заманның* өмір салтын үлгі етпеңдер, қайта, ой-саналарыңды жаңартып+, түбегейлі өзгеріңдер. Сонда Құдайдың ізгі де ұнамды әрі кемелді еркіне не жататынына көз жеткізе аласыңдар+.
3 Құдайдың маған көрсеткен рақымына негізделе отырып, әрбіріңе мынаны айтамын: өздерің туралы тиістісінен артық ойламаңдар+. Қайта, есті болып, Құдай әрқайсысыңа берген сенімнің+ мөлшеріне сай ойлаңдар.
4 Денеміз көп мүшеден тұрады+, бірақ әрқайсысы әртүрлі қызмет атқарады.
5 Сол сияқты, біз де көп болғанымызбен, Мәсіхпен бірліктегі бір денені құраймыз және өзара байланыстағы мүшелерміз+.
6 Құдайдың рақымымен біз әртүрлі сыйға ие болдық: пайғамбарлық ету сыйын алған болсақ+, өзімізге берілген сенімге сай пайғамбарлық етейік;
7 үлесімізге қызмет ету тиген болса, соны атқарайық; кім тәлімгерлік сыйына ие болса, тәлім берсін+;
8 кімде жігер беру* сыйы болса, сонысын орындасын+; кімге үлестіру тисе, жомарттықпен үлестірсін+; кім жетекшілік етсе, оны бар ынтасымен атқарсын+; кім мейірімділік көрсетіп жүрген болса, мұны қуанышпен істесін+.
9 Сүйіспеншіліктерің шынайы болсын*+. Жамандықтан жиреніңдер+, ал жақсылықтан ажырамаңдар.
10 Бір-біріңді туған бауырлардай жақсы көріңдер. Бір-біріңе бірінші болып құрмет көрсетіңдер+.
11 Еріншек болмай, істеріңді ынта-жігермен атқарыңдар+. Рухтың әсерімен жалындай беріңдер+. Ехобаға құл іспетті қызмет етіңдер+.
12 Үміттеріңе қуаныңдар. Қиыншылықта табанды болыңдар+. Ұдайы дұға етіңдер+.
13 Мұқтаждық көрген қасиеттілермен өздеріңде бармен бөлісіңдер+. Әрдайым қонақжай болыңдар+.
14 Өздеріңді қудалағандарға жақсылық тілеңдер+. Оларды қарғамаңдар, қайта, баталарыңды беріңдер+.
15 Қуанғандардың қуанышына, қайғырғандардың қайғысына ортақ болыңдар.
16 Өздерің туралы қандай ойда болсаңдар, басқалар жөнінде де солай ойлаңдар. Өздерің жайлы тым жоғары ойда болмай, қайта, кішіпейіл болыңдар+. Өздеріңді ақылды санамаңдар+.
17 Жамандыққа жамандықпен қайтармаңдар+. Жұрт дұрыс деп есептейтінді істеуге тырысыңдар.
18 Қолдарыңнан келгенше, барлық адамдармен тату болыңдар+.
19 Сүйікті бауырластар, өздерің үшін кек алмаңдар, оны Құдайдың қаһарына қалдырыңдар+. Өйткені былай деп жазылған ғой: “Кек алу — менің ісім, есесін мен қайтарамын,— дейді Ехоба”+.
20 Қайта, “жауың ашықса, оны тамақтандыр; шөлдесе, ішетін су бер. Осылай етуіңмен оның басына қызып тұрған шоқ үйесің*”+.
21 Жамандықтан жеңілмей, оны әрдайым жақсылықпен жеңіп шық+!
Сілтемелер
^ Түсіндірмені қараңыз.
^ Немесе “ақыл-кеңес беру”.
^ Сөзбе-сөз “Сүйіспеншіліктерің екіжүзді болмасын”.
^ Бұл әрекет қатуланып тұрған адамды жұмсартып, жүрегін жібітуді білдіреді.
