Римдіктерге 4:1—25
4 Ал бабамыз Ыбырайым туралы не дейміз?
2 Егер ол істерінің арқасында әділ деп жарияланса, онда мақтануына болар еді, бірақ Құдай алдында емес.
3 Киелі жазбада не айтылған? Жазбада: “Ыбырайым Ехобаға* сенді, сондықтан ол әділ деп саналды”+,— делінген.
4 Жұмыс істеген адам жалақысын рақым ретінде емес, тиісті ақы ретінде алады.
5 Ал кім өз істеріне сүйенбей, қайта, күнәкарды әділ деп жариялайтын Құдайға сенсе, осы сенімі арқылы әділ деп саналады+.
6 Істеріне қарамай-ақ Құдай әділ деп есептеген адамның бақытты екендігін Дәуіт те айтқан:
7 “Заңсыз істері кешірілгендер мен күнәлары жабылғандар бақытты!
8 Ехоба күнәсін мойнына артпайтын адам бақытты+!”
9 Мұндай бақытқа тек сүндеттелгендер кенеле ме, әлде сүндеттелмегендер де ме+? Өйткені: “Ыбырайым сенімінің арқасында әділ деп саналды”+,— дедік қой.
10 Ол қашан әділ деп саналды, сүндеттелгеннен кейін бе, оған дейін бе? Сүндеттелгеннен кейін емес, одан бұрын.
11 Әлі сүндеттелмей тұрып-ақ сенімі болғандықтан, оған әділдік мөрі ретінде белгі салынды+, яғни сүндеттелді. Осылайша ол сүндеттелмей-ақ сенімі арқылы әділ деп есептелетіндердің бәрінің түп атасы болды+.
12 Сондай-ақ Ыбырайым — сүндеттелген ұрпақтың, яғни сүндеттелу рәсімін орындаумен ғана шектелмей, оның сүндеттелмей тұрғандағы сеніміне еліктейтіндердің де түп атасы+.
13 Ыбырайым мен оның ұрпағына дүниенің мұрагері боласың деген уәде+ заңды ұстанғаны үшін емес, сенімі арқылы әділ деп есептелгені үшін берілді+.
14 Егер заңды ұстанатындар ғана мұрагер болса, онда сенімнің еш пайдасы, ал уәденің еш күші болмас еді.
15 Заң Құдайдың қаһарына ұшыратады+, ал заң жоқ жерде оны бұзу да мүмкін емес+.
16 Демек, бұл уәде Құдайдың рақымына сай+, сенімге байланысты берілді. Осылайша осы уәде Ыбырайымның бүкіл ұрпағы+ үшін — Заңды ұстанатындары үшін ғана емес, Ыбырайымдікі сияқты сенімі барлары үшін де — күшін жоғалтпайтыны сөзсіз. Ол — бәріміздің түп атамыз+.
17 (Бұл туралы: “Сені көптеген халықтардың түп атасы еттім”+,— деп жазылған). Бұл уәде Ыбырайым сенім артқан Құдайдың — өлілерді тірілтетін және әлі жоқ нәрсені бар дейтін* Құдайдың — алдында берілді.
18 Үміттенуге еш негіз болмаса да, ол көптеген халықтардың түп атасы болатынына үмітін үзбей сене берді. Өйткені оған: “Сенің ұрпағың осынша көп болады”+,— делінген еді.
19 Жасы жүзге таяп қалған Ыбырайым өз тәнін өлі, ал Сараның құрсағына бала бітпейді+ деп есептесе де+, сенімін әлсіретпеді.
20 Қайта, Құдайдың уәдесіне еш күмәнданбай, сенімінен күш алып, Құдайды дәріптеді
21 және оның өз уәдесін орындай алатынына кәміл сенді+.
22 Сондықтан да “әділ деп саналды”+.
23 Алайда “әділ деп саналды” деген сөздер оған ғана емес+,
24 әділ деп саналатын біздерге де арнап жазылған. Өйткені біз Иеміз Исаны өлімнен қайта тірілткен Құдайға сенеміз+.
25 Иса біздің күнәларымыз үшін өлді+, ал әділ деп жариялануымыз үшін қайта тірілді+.
