Шежірелер 1-жазба 10:1—14
-
Саул мен ұлдарының өлімі (1—14)
10 Філістірлер Исраилге қарсы аттанды. Исраилдіктер олардан қаша жөнелді. Олардың көбі Гелбоя тауында қаза болды+.
2 Філістірлер Саул мен ұлдарын өкшелей қуып, оның Жонатан, Әбинадап, Малхишуа+ деген ұлдарын өлтірді.
3 Ал Саулдың айналасында шайқас күшейе түсті. Сол кезде оған садақшылардың жебесі тиіп, жараланды+.
4 Сонда Саул қару-жарағын алып жүретін жігітке: “Семсеріңді қынабынан суырып, маған сұғып ал! Әйтпесе мына сүндеттелмегендер келіп, мені қорлап жүрер+”,— деді. Бірақ жігіт қатты қорқып, олай еткісі келмеді. Сонда Саул семсерін алып, өзіне қаратты да, үстіне құлай салды+.
5 Саулдың өлгенін көргенде, оның қару-жарағын алып жүретін жігіт те семсерінің үстіне құлап өлді.
6 Осылайша Саулдың өзі, оның үш ұлы мен үй ішінің бәрі қаза болды+.
7 Аңғарда тұратын исраилдіктер Исраил әскерінің қашқанын, ал Саул мен ұлдарының қаза болғанын көргенде, қалаларын тастап қашып кетті. Філістірлер болса олардың қалаларына кіріп алды.
8 Келесі күні філістірлер қаза болғандарды тонауға келгенде, Гелбоя тауында өліп жатқан Саул мен ұлдарының мәйітіне тап болды+.
9 Олар Саулдың басын шауып алды, сауыт-сайманын да сыпырып алып, өздерінің пұттарына+ және жұрт арасында хабарлау үшін філістірлер жерінің шартарабына шабармандар жіберді.
10 Сосын олар Саулдың сауыт-сайманын құдайларының ғибадатханасына, ал басын Дагон деген тәңірлерінің үйіне+ апарып қойды.
11 Ябес-Ғалақат+ тұрғындары філістірлердің Саулға не істегенінің бәрін естігенде+,
12 қаланың ер-азаматтары жиналып, жолға шықты. Олар Саул мен оның ұлдарының денелерін Ябеске әкеліп, сүйектерін Ябестегі бір үлкен ағаштың түбіне көмді де+, жеті күн ораза тұтты.
13 Осылай Саул қаза болды, себебі ол Ехобаның сөзіне мойынсұнбай, Ехобаға опасыздық жасады+. Сондай-ақ ол аруақ шақырушыға жүгінді+,
14 ал Ехобадан басшылық іздемеді. Сондықтан ол оған өлім құштырып, патшалық билігін Есей ұлы Дәуітке берді+.
