Шежірелер 1-жазба 13:1—14
13 Дәуіт мыңбасы-жүзбасылармен, сондай-ақ барлық басшыларымен+ кеңес құрды.
2 Сосын күллі Исраил қауымына былай деді: “Егер дұрыс деп тапсаңдар әрі Құдайымыз Ехобаға ұнамды болса, Исраилдің барлық аймақтарындағы өзге бауырларымызға және қалалары мен жайылымдарында тұрып жатқан діни қызметкерлер мен леуіліктерге+ хабар жіберейік. Олар да бізге келіп қосылсын.
3 Бәріміз барып, Құдайымыздың келісім сандығын өзімізге алып келейік+”. Өйткені Саулдың тұсында ол қараусыз қалған еді+.
4 Күллі жамағат бұған келісті, себебі бұл оларға дұрыс болып көрінді.
5 Содан Дәуіт Кирият-Еғаримнен шынайы Құдайдың келісім сандығын әкелу үшін, Мысыр өзенінен* Лебо-Хаматқа+ дейін тұрып жатқан күллі исраилдіктердің басын қосты+.
6 Дәуіт және күллі Исраил керубтердің үстінде* отырған шынайы Құдайдың+ келісім сандығын әкелмек болып, Яһуда жеріндегі Бағалахқа+, яғни Кирият-Еғаримге, өрлеп барды. Осылай олар жұрт Ехобаның атын атап шақыратын келісім сандығын әкелмек болды.
7 Бірақ олар шынайы Құдайдың сандығын Әбинадаптың үйінен жаңа арбаға салып+ алып шықты. Арбаны Ұзах пен Ахио бастап жүрді+.
8 Дәуіт пен бүкіл исраилдіктер арфа және басқа да ішекті аспаптар тартып, даңғыра+ мен жез табақшалар қағып+, кернейлетіп+, шынайы Құдайдың алдында жан сала ән салып, би билеп келе жатты.
9 Олар Кидонның қырманына жеткенде, бұқалар арбадағы келісім сандығын құлата жаздады. Сонда Ұзах қолын созып, сандықты ұстай алды.
10 Ұзах қолын сандыққа қарай созғаны үшін, Ехобаның қаһары лаулап, оны жазалады+. Ол сол бойда Құдайдың алдында тіл тартпай кетті+.
11 Дәуіт Ехобаның Ұзахқа қаһарын төккеніне ашуланды*. Сондықтан бұл жер әлі күнге дейін Пәрес-Ұзах* деп аталады.
12 Дәуіт сол күні шынайы Құдайдан қорқып: “Өзім тұратын жерге шынайы Құдайдың келісім сандығын қалай әкелмекпін?”— деді+.
13 Осылайша Құдайдың келісім сандығын өзі тұрып жатқан Дәуіттің қаласына әкелмей, ғаттық Ғабит-Едомның үйіне апарғызды.
14 Шынайы Құдайдың келісім сандығы сол үйде үш ай тұрды. Ехоба Ғабит-Едомның үй іші мен онда бардың бәрін жарылқап отырды+.
Сілтемелер
^ Немесе “Шихордан”.
^ Мүмкін: “арасында”.
^ Немесе “ұнжырғасы түсті”.
^ Мағынасы “Ұзахқа төгілген қаһар”.
