Иса төрт шәкіртін — Петір, Әндір, Жақып пен Жоханды — адам аулауға шақырған болатын. Демалыс күні болғандықтан, қазір олар Қапарнаумдағы мәжілісханаға бара жатыр. Мәжілісханада Иса адамдарға тәлім берді. Ол дін мұғалімдері сияқты емес, билігі бар адамдай тәлім бергендіктен, жұрт бұл жолы да қайран қалды.

Мәжілісханада бойын жын билеген бір кісі бар еді. Ол қатты дауыстап: “Назареттік Иса, бізде нең бар? Бізді құртуға келдің бе? Мен сенің кім екеніңді жақсы білемін: сен Құдайдың Киелісісің!”— деді. Иса адамды қинаған жынға тыйым салып: “Үніңді өшір, шық оның бойынан!”— деп бұйырды (Марқа 1:24, 25).

Сонда зұлым рух адамды қалшылдата жерге құлатып, ащы дауыспен қатты айғайлады. Кейін оның бойынан “еш зиян келтірмей” шығып кетті (Лұқа 4:35). Мәжілісханадағы жұрт аң-таң болып: “Бұл не?”— десті. Сосын: “Оның тіпті жындарға бұйыруға билігі бар екен, олар оған бағынып жатыр!”— дей бастады (Марқа 1:27). Осындай таңғажайып оқиға жайлы хабар бүкіл Ғалилеяға тарап кетті.

Иса мен оның шәкірттері мәжілісханадан кетіп, Шимон Петірдің үйіне барды. Үйде Петірдің қайын енесінің ыстығы көтеріліп, қатты ауырып жатыр екен. Олар Исадан көмек сұрады. Сонда Иса әйелдің қасына келіп, қолынан ұстап тұрғызды. Сол заматта әйел сауығып кетті. Сосын ол Иса мен оның шәкірттеріне ас әзірлей бастады.

Күн бата Петірдің үйіне жан-жақтан адамдар ауру-сырқауларын әкеле бастады. Есік алдына бүкіл қала жиналғандай. Бәрі де көмекке мұқтаж. “Жұрт әртүрлі дертке шалдыққан адамдарын әкелгенде, Иса олардың әрқайсысының үстіне қолын қойып, сауықтырды” (Лұқа 4:40). Адамдардың қандай сырқаты болмасын, Иса бәріне көмектесті. Бұлай болары пайғамбарлықта алдын ала айтылып кеткен еді (Ишая 53:4). Ол тіпті көп адамның бойынан жындарды қуып шығарды. Сонда зұлым рухтар: “Сен Құдайдың Ұлысың!”— деп айғайлады (Лұқа 4:41). Жындар Исаның Мәсіх екенін білетін. Бірақ Иса оларға сөйлеуге тыйым салды, себебі көпшілік алдында шынайы Құдайдың қызметшілері сияқты көрінгендерін қаламады.