Исаның алғашқы шәкірттерінің қатарына Натанайыл қосылғаннан бері үш күн өтті. Иса кейбір шәкірттерімен туған өлкесіне, солтүстіктегі Ғалилея аймағына бет алды. Діттеген жерлері — Қана қаласы. Қана — Натанайыл тұратын қала. Ол Иса өскен Назарет қаласының солтүстігіндегі қыратты өлкеде орналасқан. Олар сол жердегі үйлену тойына бара жатыр.

Тойға Исаның анасы Мәриям да келді. Ол той иелерінің досы болғандықтан, қонақ күтуге көмектесіп жүрген болса керек. Сондықтан не нәрсенің жетіспей жатқанын бірден байқап, Исаға: “Олардың шарабы жоқ”,— деді (Жохан 2:3).

Былайша айтқанда, Мәриям Исаға бір шара қолдануға кеңес берді. Сонда Иса: “Бұның екеумізге қандай қатысы бар?”— деп келіспейтінін білдірді (Жохан 2:4). Ол Құдай тағайындаған Патша болғандықтан, не істеп, не қою керектігіне қатысты нұсқауды достары мен туыстарынан емес, көктегі Әкесінен алу керек еді. Содан Мәриям барлығын ұлының қолына тапсырды да, қызмет көрсетушілерге: “Ол не айтса, соны істеңдер”,— деді (Жохан 2:5).

Сол үйде алты тас құмыра бар еді, оның әрқайсысына 40 литрден аса су сыятын. Иса қызмет көрсетушілерге: “Құмыраларды суға толтырыңдар”,— деп тапсырды. Сосын оларға: “Аздап алып, асабаға апарыңдар”,— деді (Жохан 2:7, 8).

Асаба шарапты татып көріп, сапасына таңғалды, бірақ оның кереметтің арқасында жасалғанын білмеді. Сосын ол күйеужігітті шақырып алып, оған: “Жұрт алдымен жақсы шарабын, ал қонақтар қызып алғанда, нашарлауын береді. Сен болсаң жақсысын осы уақытқа дейін сақтап қойыпсың”,— деді (Жохан 2:10).

Бұл — Иса жасаған алғашқы керемет. Шәкірттері кереметті көргенде, Исаға деген сенімдері нығая түсті. Тойдан кейін Иса анасымен және бауырларымен Ғалилея теңізінің солтүстік-батыс жағалауындағы Қапарнаум қаласына жол тартты.