Осы кітапшаны оқу барысында, Киелі кітапта айтылған бірсыпыра жайттардың ғылыми тұрғыдан тура екенін көріп, қайран қалған шығарсың. Көп адамның осыған көзі жетті. Сондай-ақ олар көп діндердің Киелі кітапты бұрмалайтынын біліп, таңғалған. Мысалы, кейбіреулер бүкіл ғалам мен жердегі тіршілік 24 сағатқа созылған алты күнде жаратылған дейді. Ал, шындығына келгенде, Киелі кітаптағы мәліметтер жер мен ғаламның жасына қатысты ғылыми есептеулерге еш қайшы келмейді *.

Сондай-ақ Киелі кітаптағы жарату ісі жайлы мәлімет ғылыми ізденістер мен тұжырымдарға көп еркіндік береді. Мысалы, Киелі кітапта Құдайдың тіршілік атаулыны өз “тұқымдарына қарай” жаратқаны айтылған (Жаратылыс 1:11, 21, 24 Тт). Бұл сөздер ғылыми теориялардың кейбірімен үйлеспеуі мүмкін, алайда ғылыми айғақтарға еш қайшы келмейді. Тарих көрсететіндей, теориялар келеді де кетеді, ал айғақтар мәңгі қалады.

Алайда көп адамдар діннен көңілі қалғандықтан, Киелі кітапты зерттеуден бас тартады. Оларға дін өкілдерінің екіжүзділігі, жемқорлығы мен соғысқұмарлығы қатты әсер еткен болу керек. Бірақ Киелі кітап ілімдерін ұстанамыз дейтіндердің бұрыс іс-әрекеттеріне бола кітаптың өзінен теріс айналғанымыз дұрыс па? Адамгершілігі бар көптеген ақжүректі ғалымдар қатыгез, бірбеткей адамдардың эволюция теориясын өздерінің ұлтшыл мақсаттары үшін қолданғанын көріп, аң-таң болған. Эволюция теориясын осындай зұлым адамдардың тұрғысынан қарастыру ақылдылыққа жата ма? Мұның орнына теорияның өзін зерттеп, қолда бар айғақтармен салыстырып көрген әлдеқайда дұрыс болмас па еді?

Біз сені Киелі кітапқа қатысты да осындай зерттеу жүргізуге шақырамыз. Бұл кітаптағы ілімдер оны ұстанамыз дейтін діндердің басым көпшілігі үйрететін ілімдерден қатты ерекшеленетінін біліп, қайран қалуың мүмкін. Киелі кітап соғыс пен ұлтаралық қақтығыстарды жақтамайды, қайта, Құдайдың қызметшілері  соғысқа қатыспау керектігін, тіпті соның түптамыры — жеккөрініш сезімінен арылу керектігін айтады (Ишая 2:2—4; Матай 5:43, 44; 26:52). Сондай-ақ ол діни фанатизм мен соқыр сенімді қолдамайды, оның орнына Құдайға қызмет етуде “ақыл-ойымызды қолданудың” маңызы зор екеніне және шын сенімнің дәлелдерге негізделетініне назар аударады (Римдіктерге 12:1 ЖД; Еврейлерге 11:1). Киелі кітап адам баласын қашан да толғандырған көкейкесті сұрақтарды бүркеп қоя салмайды, қайта, солардың жауабын іздеуге шақырады.

Мысалы, сені “Құдай бар болса, зұлымдыққа неге жол береді?” деген сұрақ мазалаған болар. Киелі кітап осы және басқа да көптеген сұрақтарға қанағаттанарлық жауап береді *. Біз сені шындықты іздей беруге шақырамыз. Солай етер болсаң, сұрағыңның ақылға қонымды әрі сенімді дәлелдерге негізделген жауабын табасың. Мұндай жауаптың саған қатты әсер етері шүбәсіз. Ал кездейсоқтықтың бұған еш қатысы жоқ.