ILIMASUTTUARITSI!

2022: Ukioq eqqissiviilliorfiusoq – Biibilimi qanoq allassimasoqarpa?

TUSARNAARUK

2022-mi nutaarsiassani sorsunneq, aningaasatigut ajornartorsiorneq pinngortitamilu ajunaarnersuit sammineqangaarput. Sooq taamatut pisoqartarnersoq taamaallaat Biibilimi nassuiaatissaqarpoq.

2022-mi pisut nassuiaatissaviat

2022-mi pisut uppernarsaataapput piffissami, Biibilimi ‘ullunik kingullernik’ taaneqartartumi, inuusugut. (Timuutiusimut 2. 3:1) ‘Ullut kingulliit’ ukiumi 1914-imi aallartipput. Maluginiaruk kingullertigut pisut Biibilimi siulittuutigineqarnerat:

‘Sorsuttunik … tusartarumaarpusi.’ – Matiusi 24:6.

“2022-mi Europami sorsunnerup amiilaarnartui malunnarseqqipput.” a

Allaaserisaq “Ruslandip Ukraine saassuppaa” takuuk.

“Nerisassaaleqisoqartassaaq.” – Matiusi 24:7.

“2022: Ukioq nerisassaaleqisoqarfiungaartoq.” b

Allaaserisaq “Ukrainemi sorsunneq pissutigalugu nerisassaaleqisoqarneq ilungersunarnerulerpoq” takuuk.

“Tunillaassortunik nappaateqartassaaq.” – Lukkarsi 21:11.

“Nukillaarneq atugaaqqilerpoq, kuppillanneq atupiloorneqalerpoq COVID-19-ilu suli atugarliortitsingaarluni. Tamakku pissutigalugit paasivagut nappaatit tuniluuttut qanoq ulorianartiginersut inuunerlu qanoq qajannartiginersoq.” c

Allaaserisaq “Inuit 6 millionit COVID toqqutigaat” takuuk.

“Annilaarnartunik … takusaqassapput.” – Lukkarsi 21:11.

“2022-mi aasakkut kiarujussuarpoq, panernersuaqarpoq, ikuallannerussuaqarpoq qarsutsineqartarlunilu. Silapiluttarnera pissutigalugu aseruinerujussuaqarsimavoq, inuppassuit toqusimapput inuillu millionillit nunani tamalaani angerlarsimaffeerussimallutik.” d

Allaaserisaq “Nunarsuarmi sumi tamani kiatserujussuartoq” takuuk.

‘Perulluliortoqartarneq.’ [Imalt.: ‘pikitsitsisoqartarneq’, q.a.i.] – Lukkarsi 21:9.

“Inuit aningaasatigut ajornartorsiornerit, ingammik akit qaffakkiartornerat, kamaatigingaaramikkit 2022-mi naalakkersuisunut akerliussutsiminnik sumi tamani takutitsisarput.” e

Allaaserisaq “Nunarsuaq tamakkerlugu akit qaffakkiartornerat” takuuk.

Aappaagu susoqassava?

Naluarput 2023-mi qanorpiaq pisoqassanersoq. Nalunngilarpulli qanittukkut Guuti kunngeqarfini, tassa qilammi naalakkersuisut, aqqutigalugit nunarsuarmi pisunut akuliukkumaartoq. (Danieli 2:44) Kunngeqarfiup inuit naalliunnerannut pissutaasut suujunnaarsissavai Guutillu piumasaa nunarsuarmi eqquutitillugu. – Matiusi 6:9, 10.

Jiisusip Kristusip peqqussutaa malillugu ‘ilimasuttuarlutit’ nunarsuarmi pisut siulittuutinik Biibilimeersunik qanoq eqquutitsisarnerat eqqumaffigeqqullugu kajumissaarpatsigit. (Makkorsi 13:37) Biibili maanna qanoq iluaqutigisinnaanerlugu aamma taanna iluaqutigalugu illit ilaquttatillu qanoq neriuuteqalersinnaanerlusi paasiumallugit attavigisigut.

a AP News, “2022 Was Year the Horror of War Returned to Europe” (“2022-mi Europami sorsunnerup amiilaarnartui malunnarseqqipput”) Jill Lawless-ip allataa, decembarip 8-at, 2022.

b World Food Programme, “A Global Food Crises” (“Nunarsuaq tamakkerlugu nerisassaaleqineq”).

c JAMA Health Forum, “Living in an Age of Pandemics—From COVID-19 to Monkeypox, Polio, and Disease X” (“Nappaalanersuit tuniluuffiusut nalaanni inuuneq – COVID-19, kuppillanneq, nukillaarneq aamma nappaat X”) Lawrence O. Gostin-ip, JD, allataa, septembarip 22-at, 2022.

d Earth.Org, “What’s Behind the Record-Breaking Extreme Weather Events of Summer 2022?” (“2022-mi aasakkut aatsaat taama silapilutsigisarneranut suna pissutaava?”) Martina Igini-p allataa, oktobarip 24-at, 2022.

e Carnegie Endowment for International Peace, “Economic Anger Dominated Global Protests in 2022” (“2022-mi nunani tamalaani akerliussutsimik takutitsinernut aningaasatigut ajornartorsiorneq pillugu kamanneq pissutaasarpoq”) Thomas Carothers-ip aamma Benjamin Feldman-ip allataat, decembarip 8-at, 2022.