Ullutsinni nerisassaaleqisoqartarnera pillugu Biibilimi qanoq allassimasoqarpa?
“Kaattoqassanngilaq.” Inuiannut ajornartorsiutaanerpaat ilaannik – tassa nunarsuarmi tamanut nerisassaqartitsinissamik – aaqqiissuteqarumallutik silarsuarmi siuttut taama anguniagaqarput. a Nunarsuarmili kaattoqarunnaavissinnaava? Biibilimi qanoq allassimasoqarpa?
Nalitsinni nerisassaaleqisoqartarumaarnera Biibilimi siulittuutigineqarpoq
Biibilimi siulittuutigineqarpoq nalitsinni, ‘ullunik kingullernik’ taaneqartuni, kaannersuaqarumaartoq. (Timuutiusimut 2. 3:1) Nerisassaaleqisoqartarneranut Guuti pisuunngilaq, nerisassaaleqisoqartarumaarnerali pillugu ilisimatippaatigut. (Jaaku 1:13) Biibilimi siulittuutit marluk maluginiakkit.
“Sumiiffinni assigiinngitsuni nerisassaaleqisoqartassaaq.” (Matiusi 24:7) Biibilimi taama siulittuuteqarpoq. Nerisassat qanoq pilersinneqartarnerat qanorlu agguaanneqartarnerat pillugit misissueqqissaartartut nalunaarusiaanni ima allassimasoqarpoq: “Nunarsuarmi nerisassaaleqissarnerup qaangerniarnissaanut, peqqinnartunik inuussutissaqarluartunillu nerisassiortarnermut kinguariartorpugut.” b Nunarpassuarni inuit hundredilinnik millionillit pisariaqartitaminnik nerisassaqanngillat. Alianaraluartumik taakkua ilarpassuisa tamanna toqqutigisarpaat.
“Takuaralu hesti qernertoq tassanilu issiasoq oqimaalutaavimmik tigumiartoq.” (Saqqummersitat 6:5) Siulittuummi tamatumani hesti tassanilu issiasoq ulluni kingullerni kaannersuaqarnissaanut assersuutaapput. c Hestersup oqimaalutaavik nerisassaminernik tamanut agguaassinermi atugassatut tigummiarpaa. Ingerlaartillugu nerisassat akitsorumaarnerat nipip suaartaatigaa inuillu mianersoqqullugit nerisassat pingaarutillit atulussinnassanngikkaat. (Saqqummersitat 6:6) Ullutsinni nunarsuaq tamakkerlugu inuit millionillit nerisassaaleqisarnerat peqqinnartunulluunniit akissaqannginnerat tamatumani eqqoqqissaartumik erseqqissarneqarpoq.
Qanoq nerisassaaleqisoqartarunnaassasoq
Immikkut ilisimasallit oqartarput nunarsuarmi inunnut tamanut naammattorsuarmik nerisassaqaraluartoq. Suummiuku nerisassaaleqinermut pissutaasut? Aamma ajornartorsiutaasut taakku aaqqiiviginiarlugit pinngortitsisitta Jehovap d qanoq iliuuseqarniarnera pillugu Biibilimi qanoq allassimasoqarpa?
Ajornartorsiut: Inuit nerisassaaleqinerinut pissutaasut, piitsuussuseq aningaasaqarniarnikkullu naligiinngissuseq, naalakkersuisut atuukkunnaarsissinnaanngilaat.
Aaqqiissutissaq: Inuit naammalluinnanngitsut naalakkersuinerat, Guutip kunngeqarfianik, tassa naalakkersuisunik naammalluinnartunik, taarserneqassaaq. (Danieli 2:44; Matiusi 6:10) Ullutsinni piitsorpassuit nerisassaqarniarnertik ilungersuutigisarpaat, Guutilli kunngeqarfiata tamanna allanngortilluinnassavaa. Guutip kunngeqarfiani kunngi, Jiisusi Kristusi, pillugu Biibilimi ima allassimasoqarpoq: “Annaatissavai piitsoq ikioqqulluni suaartartoq, annikilliortitarlu ikiortissaaleqisoq. … Karrit naammangaartut nunami naasimassapput, qaqqat qaanni aalataarumaarput.” – Tussiaat 72:12, 16, Testamentitoqaq 1990-imi naqitigaq.
Ajornartorsiut: Sorsunnerit pissutigalugit aseruaneqarsimaqimmat aningaasaqarniarnerlu najummassimanarmat nerisassanik agguaassiniarneq killeqarluniluunniit unitsivinneqarsimavoq.
Aaqqiissutissaq: “[Jehovap] nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai.” (Tussiaat 46:10) Guutip sorsunnermi sakkut inuillu sorsunnernik pilersitsisut suujunnaarsilluinnarumaarpai. Tamatuma kingunerissavaa kinaluunniit toqqissilluni ajornanngitsumillu nerisassarsiorsinnaalissasoq. Biibilimi ima neriorsuuteqarpoq: “Iluarneq inerilluarumaarpoq, eqqissineqangaarumaarlunilu.” – Tussiaat 72:7.
Ajornartorsiut: Silarlorujussuartarnera kiarujussuartarneralu pinngortitamilu ajunaarnersuaqartarnera pissutigalugit inerititat ajoquserneqarlutillu nersutaatit toqorartarput.
Aaqqiissutissaq: Guutip pinngortitap nukinga iluarsiumaarpaa pinngortitarlu pissusissamisut inerititaqaqqilersikkumaarlugu. Biibilimi ima allassimasoqarpoq: “[Jehovap] anorersuaq qatsortippaa, imarlu mallerunnaarpoq. … Inoqajuitsoq nunanngortissinnaavaa imeqarluartoq, nunalu panertoq puilasulinngortillugu. Kaattut tassani nunassippai … Taava narsaatitik siaruarteriffigaat viinnequtillu ikkussorlugit, inerititaallu katersorpaat.” – Tussiaat 107:29, 35-37.
Ajornartorsiut: Piumatuut peqquserluttullu peqqinnanngitsunik nerisassiortarput pisariaqartitsisulluunniit nerisassaannik tuninaveersaartarlugit.
Aaqqiissutissaq: Inuit unneqqaserluttut peqquserluttullu tamaasa Guutip kunngeqarfiata suujunnaarsilluinnassavai. (Tussiaat 37:10, 11; Esaja 61:8) Biibilimi Jehova Guuti tassaanerarneqarpoq “qunutitaasunik pinngitsuutitsisoq nerisassiillunilu kaattunut”. – Tussiaat 146:7.
Ajornartorsiut: Ukiut tamaasa nunarsuarmi nerisassat pingajorarterutaat iginneqarlutilluunniit maanngaannartarput.
Aaqqiissutissaq: Guutip kunngeqarfiata aqutsinerani nerisassat oqimaaqatigiissumik agguaanneqartarumaarput. Jiisusi nunarsuarmiikkallarami nerisassanik asiutitsinngisaannarpoq. Assersuutigalugu pisumi ataatsimi inuppassuit 5.000-nit amerlanerusut tupinnartuliornikkut nerisippai. Kingorna ilinniartitani ima peqquai: “Tamaasa atorluarniassagatsigit sinneruttut katersorsigit.” – Johannesi 6:5-13.
Nerisassaaleqisarnermut pissutaasut Guutip kunngeqarfiata suujunnaarsissammagit inuit tamarmik naammattorsuarnik peqqinnartunillu nerisassaqalissapput. (Esaja 25:6) Guutip kunngeqarfiata naammassisassai pillugit paasisaqarnerorusukkuit takuuk allaaserisaq “Guutip naalagaaffia nunarsuarmik qaqugu aqutsilissava?”
a Nunarsuaq tamakkerlugu 2030-mut piujuaannartitsilluni ineriartortitsinissamut anguniakkat Naalagaaffiit Peqatigiinni nunat ilaasortat tamarmik 2015-imi akuersissutigisaat.
b Ukua nalunaarusiaat: Naalagaaffiit Peqatigiit inuussutissarsiornermik nunalerinermillu peqatigiiffiat (FAO), Nunalerinermik ineriartortitsinissamik aningaasaateqarfik, Naalagaaffiit Peqatigiit meeqqanut aningaasaateqarfiat (UNICEF), Naalagaaffiit Peqatigiit nerisassanik tunisassiornermik suliniutaat aamma Nunarsuaq tamakkerlugu peqqinnissamik suliniaqatigiiffik (WHO).
c Hestersut sisamat Saqqummersitani allaatigineqartut pillugit paasisaqarnerujumallutit allaaserisaq “De fire ryttere – hvem er de?” takuuk.
d Biibilimi ersersinneqarpoq Guuti Jehovamik ateqartoq, nutsikkallu ilaanni ateq Jahve atorneqartarpoq. (Tussiaat 83:19; Saqqummersitat 15:4) Takuuk allaaserisaq “Jehova kinaava?”
Soqutigisinnaasatit allat
APEQQUTIT BIIBILIMI AKINEQARTUT
‘Naggatissamut’, imaluunniit ‘ullunut kingullernut’, suna ilisarnaataava?
Ullunut kingullernut ilisarnaatit amerlasuut Biibilimi siulittuutigineqarput.
BIIBILIMI ILINNIARTITSISSUTIGINEQARTUT PINGAARUTILLIT
Guutip naalagaaffia suua?
Jiisusip nunami oqaluussinermini pingaarnertut Guutip naalagaaffia ilinniartitsissutigaa. Ukiorpassuarni kristumiut Naalagaaffiup tikiunnissaa qinnutigisarsimavaat.
