Qaqugu qanorlu annertutigisumik?

ANGAJOQQAAT ilumooqqissaarusuttut ilarpassui qularnanngitsumik isumaqarput kinguaassiuutinut tunngasunik ilinniartitsineq minutini quliinnarni naammassineqarsinnaasoq, 13-inik ukiulik pisuttuaqatigalugu ’nuunuaqqallu suminngaanneertarnerannik’ ittuukulunnartumik oqaluttuutipallallugu. Tamannali annikippallaarpoq kingusippallaarlunilu. Angajoqqaat ilaat oqartarput: „Oqaluttuariniarsarisakka tamangajaasa nalorpasinngilai.“

 Ilinniartitseriaatsimik allamik pitsaanerusumik peqarpa? Taamaappat taava angajoqqaat qaqugukkut aallartittariaqarpat, qanorlu iliorsinnaappat oqarsinnaappallu?

Meeqqap mikisunnguuneranili ilinniartitsineq tunngavilissallugu pitsaassaaq. Taava alliartornerani paasisariaqaligai naapertorlugit eqqissisimasumik oqaluttuuttarsinnaavat.

Angajoqqaat meeqqatik mikisut uffaraangamikkik timaanni pisataat pillugit ilinniartissinnaavaat: „Aana sakissat . . . aaku naatit . . . aana seeqqut.“ Soorli naavanit allat qulaatiinnarlugit seeqqua tikinneqassava? Taakkua akornanniittut taassallugit ittuukulunnarpallaarpa? Imaluunniit tamannartaa uagut susassarinnginnatsigu, meeqqap kisimi susassarimmagu? Soorunami kinguaassiuutit ataqqinninngitsumik kanngunartumilluunniit eqqartorumassanngilavut. Kisianni oqaannarsinnaannginnerpugut „usuk“ imaluunniit „utsuit“? Guutimmi pinngortitaasa ’ilumut ajunngingaartunik’ taasaasa tamakku ilagaat. — 1 Moses 1:31; 1 Korintumiut 12:21-24.

Kingorna, nukkani, najani aqqaluniluunniit nangilerneqalersoq isiginnaarnerani, ataqqinnippaluttumik inussiarnerpaluttumillu oqaluttuunneqarsinnaavoq timip pisatai taakku allat susassarinngikkaat, ilaqutariillu iluanni taamaallaat oqaluuserineqartussaasut, meeraqatinuunngitsoq allanulluunniit ilaqutariit avataanniittunuunngitsoq.

Taamaalilluni, siusissukkut ataatsikkorsuunngitsorlu, sorpassuit meeqqap paasinnittaasiata annertusiartornera ilutigalugu, immaqalu ittuukulunnarsinnginneranni, nassuiarneqarsinnaapput.

Inunngortarneq qanoq nassuiarneqarsinnaasoq

Meeqqap pingasut tallimallu akornanni ukioqaleruni * immaqa inunngortarneq eqqarsaatigilissavaa aperalunilu: „Nuunuaqqat suminngaanneerpat?“ Ima akineqaannarsinnaavoq: „Anaanamik naavisa iluanni kialaartumi toqqissisimanartumilu alliartortarput.“ Nassuiaat tamanna immaqa naammakkallassaaq. Immaqa kingorna meeraq aperissaaq: „Nuunuaqqat sukkut anisarpat?“ Taava ima akineqarsinnaapput: „Nuunuaaqqap aniffigisinnaasaanik ammaneqarnissaa Guutip isumagisimavaa.“ Meeqqat aalajangersimasumut samminnissinnaassusiat killeqarmat paasiuminartumik toqqaannartumillu akinissaq pitsaaneruvoq. Annikitsunnguakkuutaarlugit paasissutissittaruk.

Angajoqqaat soqutiginnittut meeqqaminnik ilinniartitsinissaminnut periarfissarpassuaqarsinnaapput. Qanigisat ilaat naartuppat anaanaasoq oqarsinnaavoq: „Atsa Susan erniinnaq nuunuaraatitaassaaq — illit inunngunngitsiarninni uangattaaq taamatungajak naaqartigaanga.“ Angajoqqaat meerartaaqqissamaalerpata qaammaterpaalunni pissanganartumik nuannersumillu ilinniartitsinermut periarfissaqassaaq.

Kingorna immaqa meeraq aperissaaq: „Qanoq ililluni naartusoqalertarpa?“ Paasiuminartumik akisoqarsinnaavoq: „Ataatap anisuua anaanallu mannissaa naapikkaangamik ataasinngortarput, taava meeraq alliartulissaaq, soorlu naasussat issumut pigaangamik naajartulersartut naasunngorlutillu.“ Immaqa arlaanni meeraq apereqqissaaq: „Ataatap anisuua qanoq ililluni anaanap iluanut pulasarpa?“ Pissuserissumik ima akineqarsinnaavoq: „Nalunngilat nukappiaraq qanoq pinngortitaasoq. Usoqarpoq. Anaana ammaneqarpoq usummut naammaattumik. Tassuuna anisooq anaanap iluanut pulasarpoq. Guutip taamatut pinngortissimavaatigut nuunuaqqat nuannersumi kialaartumilu alliartorfissalerlugit, anillannissaminnut naammattumik angissuseqalernissaat tikillugu. Taava inunngortarput.“ Guutip uagutsinnik ilusilersuisimaneranik asseqanngitsumik  ataqqinnippaluttumik tamanna pitsaasumik oqaluttuarineqarsinnaavoq. *

Apeqqut ittuukulullutit ima akinngisaannaruk: „Alliguit oqaluttuukkumaarpakkit.“ Immaqa meeraq alapernaaserneruliinnassaaq allamullu eqqunngitsumut paasissutissarsiorluni. Meeraq arlaannik aperisoq paasinartumik ataqqinnittumillu akineqarnissaminut naammattumik utoqqaassuseqalereersimassaaq. Meeraq akinngikkukku immaqa tulliani aperinavianngilaatit allamullu paasissutissarsiorluni.

Qaqugu aallartittariaqarpa?

Angajoqqaat ilarpassui isumaqarput meeqqat atualinnginnerminni, taamaalillutillu meeqqanit allanit eqqunnginnerusunik paasissutissinneqartalinnginnerminni, tamakku tunngaviunerusortaannaalluunniit paasereersimasariaqaraat.

Aataasoq ima oqaluttuarsimavoq: „Nammineq aperinngilanga, arfinilinnilli ukioqartunga ataataga aalajangersimavoq meeraaqqat suminngaanneernersut pillugit oqaluttuunnissannut piffissanngortoq. Oqaluttuuppaanga angutip arnallu kinguaassiuutitigut atoqatigiinnerat nerinertulli pissusissamisoortigisoq, Guutili oqarsimasoq taamaallaat katissimalluni aappariinnerup iluani pisassasoq. Taava meeraq inunngoruni ataataqarlunilu anaanaqassaaq imminik asannittunik isumassuisunillu.“ Nangilluni oqaluttuarpoq: „Nassuiaat tamanna piffissaalluartukkut takkuppoq. Takoreersimavakkami peqatikka titartakkaminnik kanngunartunik paasinngisannillu illakuluutiginnittut.“

Soorunami kanngusuutigisassatut isigilersinniartariaqanngillat, namminerli kisimi pitut. Erseqqissarsinnaavat taamaallaat ilaqutariit iluanni oqaluuserineqartussaasut. Tamanna meeqqap puiorpagu inussiarnersumik oqarfigisinnaavat: „Ssshh! Eqqaamajuk taamaallaat uagut kisimiitilluta tamakku oqaluuserisassaraavut.“

Uissuumminanngilaq

Atuartartutta ilaasa tamakku eqqartortariaqarnerat uissuumminartutut isigigunikku eqqarsaatigisariaqarpaat inuusuttunik angajoqqaarpassuaqarmat ilumooqqissaarusuttunik tamakkulu pillugit meeqqaminnik ataqqinnippaluttumik nassuiaassisinnaarusuttunik. Angerlarsimaffimmi asanniffiusumi eqqortumik nassuiaaneq angajoqqaat ilarpassuisa nassuiaanneqarsimanerannit — ilaqutariit avataanni kusanaatsumik — kissaatiginarnerungaannginnerpa?

Meeqqavit apeqqutaat tusarnaarlugillu ataqqinnippaluttumik akisarukkit, ukiut ingerlaneranni paaserusutaqarnerujartornertik ilutigalugu ilinnut apeqquteqartarnissartik ajornannginnerutissavaat. (gD 22/2 92)

[Quppernerup ataani ilanngussat]

[Qupp. 26-mi assiliartaq]

Naartuneq iluatsillugu nalilimmik ilinniartitsisoqarsinnaavoq