Ilaqutaasut qanoq ikiuutaasinnaappat?

„Siullermik angut imigassamik tigusivoq, taava imigassaq imigassamik allamik tigusivoq, naggataatigullu imigassap angut tiguaa.“ — Kangisissormiut ussataat.

TAKORLOORIARUK immami ikkattumi marullulimmiillutit. Tassanngaannaq marripputit, erniinnarlu millugussaallutit morsukkiartulerlutit. Ilungersorlutit kaanngarniarsarigaluarputit, morsukkiartuinnarlutilli.

Imerajuttuuneq masarsuttut marrinnartutut ilaqutariinnik tamarmiusunik millugussisinnaavoq. Aappaasup aappani imerajuttoq ilungersorluni allanngortinniarsuaartarpaa. Asanninnerminit kaammattorneqarluni sioorasaartarpaa, imertuaannarporli. Imigassaatai toqqortarpai, imerajuttorli imigassanik allanik pisiniaannartarpoq. Aningaasaatai toqqortarpai, imerajuttorli ikinngutiminut atorniartarpoq. Ilaqutaminut, inuunermut, aap, Guutimut asanninnera iluaqutiginiarsarisaraluarpaa — taamatulli iluaqutaanngitsigisarpoq. Aappaasoq ilungersornerujartuinnaraluartoq ilaqutariit tamarmik imigassap marulluanut morsukkaluttuinnartarput. Ilerajuttoq ikiorsinnaajumallugu ilaqutariinnut ilaasut imerajuttuunerup sunarpiaanera paasilluinnartariaqarpaat. Paasisariaqarpaat sooq „aaqqiissutissat“ ilaat iluaqutaaneq ajortut, ilinniartariaqarlugulu periaatsit sorliit iluaqutaasartut.

Imerajuttuuneq imerniakujunnerinnaanngilaq. Pinngitsuuisinnaajunnaarneruvoq, inuunermi imigassamik pingaarnerpaanngortitsinerulluni imigassamillu atuinermik aqutsisinnaajunnaarluinnarnerulluni. Ilisimasakkaat isumaqatigiissutigaat imerajuttuuneq nakorsarneqarsinnaanngitsoq, imerajuttorli inuunermi sinnerani imissaavippat aatsaat iluaqutaassasoq. — Naleqqiuguk Matîuse 5:29.

Imerajuttuuneq arlalitsigut sukkornermut assersuunneqarsinnaavoq. Sukkortup sukkortuunini allanngortissinnaanngilaa, sukkutunngilluinnarnermigulli timini sernissorsinnaavaa. Taamatuttaaq imerajuttup timimi imigassamut qisuariartarnera peersinnaanngilaa, sanngiissutinili naammagittarluni atulersinnaavaa imigassap taamaatilluinnarneratigut.

 Oqaannarlunili pineq ajornaqaaq. Imerajuttoq imigassamik atornerluinerarneqaraangami assortuilluinnartarpoq. ’Taama nakkaassimatiginngilanga.’ ’Ilaquttamaana imerajuttunngortikkaannga.’ ’Taama ajortigisumik sulisitsisoqarluni kina imerajuttunngussannginnami?’ Patsisiginiagai ima ilumoorsorinartigisinnaasarput ilaqutaasa tamarmik isumaqatigiinnartarlugu. ’Ataata sulerulooreerami qasuersaartariaqarpoq.’ ’Allatut ajornartumik ataata imertarpoq, anaanap oqalorujuuttuartarmani.’ Ilaqutariit isertugaataat: ataata imerajuttuuvoq, suut tamaasa atorlugit isertorniarneqartarpoq. „Isertuusseqatigiinnertik ataatsimoorussatuaraat,“ dr. Susan Forward taama nassuiaavoq. „Salluliuutit, patsisissarsiuutit isertukkallu angerlarsimaffinni tamakkunani silaannartut najuussorneqartutut nalinginnaatigipput.“

Ilaqutariinnut ilaasut namminneq marullummit qaqitinnatik imerajuttortartik qaqissinnaanngilaat. Immaqa ilaat ima akerliliisarput: ’Imerajuttoruna ikiorneqarnissaminik pisariaqartitsisoq, uangaanngitsoq!’ Imminulli ima apereriarit: Misigissutsikka iliuutsikkalu imerajuttup ileqquinit qanoq sunnertissimatigippat? Taassuma iliuusii pissutaallutik qasseriarlunga kamassimasarlungalu isumakulullungalu paatsiveerusimaartarpunga? Qasseriarlunga naak allanik pingaarnerusunik pisassaqaraluarlunga angerlarsimaannartarpunga imerajuttoq isumassorniarlugu? Ilaqutariit imerneq ajortortaat siulliullutik inuunertik pitsaanerulersinniarlugu iliuuseqarpata immaqa imerajuttoq iliuuseqarnialersinnaavoq.

Imminut pisuutinniassanngilatit. ’Ajunnginnerusumik pisaraluarumma imertarnavianngikkaluarpunga,’  immaqa imerajuttoq oqartarpoq. „Taamatut isumaqalersinnissat imerajuttup pisariaqartippaa, imerajunnerminut akisussaatinniassagamisit,“ siunnersorti Toby Rice Drews taama oqarpoq. Uukapaatitaaqinalli. Imerajuttup imigassaannaanngitsoq aammattaarli inuit patsisiginiakkaminik uppernarsaatissinnaasani pinngitsoorsinnaanngilai. Taamaalillutik ilaqutaasut nalugaluarlugu atornerluinermik ataavartitsisooqataasinnaapput.

Ussat Biibilimeersoq puffajassutsimut tunngasoq aamma imerajuttumut atorneqarsinnaavoq: „Kinguneri nammineq atorligit. Ataasiarlutit ajornartorsiummik ikiorsimagukku, taamaalioqqittariaqarputit.“ (Ussatit 19:19, Today’s English Version) Aap, imerajuttoq nammineertittaruk, nammineq sulisitsisuminut sianertarli, nammineq innartarli namminerlu asattarli. Ilaquttami tamakku tamaasa naammassisarpatigik imerajuttuunermigut nakkaalluinnarnissani ajornartinnginnerussavaa.

Ikiortissarsiorniaritsi. Ajornakusooqaaq — aap immaqa ajornarluinnarpoq — ilaqutariit marreqqanerminnit namminneq qaqiniarnissaat. Ikinngutinik imerajuttup patsisiginiagaanut isumaqataajumanngitsunik imaluunniit ilinnik sumiginnaanavianngitsunik ikiortissarsiorit.

Imerajuttoq ikiortissarsiornissamut akuersippat nuannaarnissamut pissutissaqarpoq. Tamannali tassaannaavoq alloriarneq siulleq. Timip pinngitsoorsinnaannginnera ullualunni toqunartuiaanikkut peerneqarsinnaavoq. Isumakkulli pinngitsoorsinnaannginneq allarluinnaavoq. (gD 22/5 92)

[Qupp. 5-mi ungalusaq]

Imerajuttuunerup ilisarnaatai

Pinngitsoorsinnaanginneq tamatigut malunniuttarpoq: Imerajuttup tulliani imernissani qilanaarisaqaa. Imigassamik iminngikkaangami imigassaq eqqarsaatigisarpaa.

Aqussinnaajunnaarneq: Aalajangiusimasaminit akulikkinnerusumik imertarpoq.

Nammineq najoqqutassiat soorlu „Kisimiillunga iminngisaannassaanga,“ „suliffinni iminngisaannassaanga,“ ilaallu ilanngullugit, imerajuttup inuunermini najoqqutavimminut amerlasuutigut patsisiginiagaannaarai, uunga: „Imernissannut sunaluunniit akornutaassanngilaq.“

Killissamik qaangiilerneq: Imigassamik annertuumik ’sapernagu’ imerneq takuneqarsinnaasumillu sunnertinnginneq pilluaqqussutaanngilaq — amerlasuutigulli tassaalluni imigassamik atuivallaalersimanerup ersiutaa siulleq.

Kingunipilui: Ileqqut pissusissamisoortut ilaqutariinnik, anguniakkanik peqqissutsimillu aseruineq ajorput. Imigassap aserortarpai. — Ussatit 23:29-35.

Miserratiginninneq: Imerajuttup imerajuttuunini miserratigalugulu patsisissarsiuutigalugulu uppernarpalussaakkanik pissutissarsiortarpaa.