Ilaqutariinni imerajuttoq

„Imerajussutsip imerajuttuinnaanngitsoq eqqortarpaa . . . Ilaqutariinnimi ataasiinnarmilluunniit imerajuttoqarpat ilaqutariit tamarmik naalliuutigisarpaat.“ — Dr. Vernon E. Johnson

ALICE tallimanik ukiulik siniffimmi innangavoq. Niua annernarnermik tilleruluppoq. Ullut marluk sioqqullugit ajutoorsimavoq taamaattumillu niua tamarmi qeqorneqarsimavoq. Qequali sukangangaarmat niua pullattupilussuanngorsimavoq. Alicep angajoqqaani qinnuigiuaraluarpai nakorsiaateqqulluni, ataataali aqagutaarpoq anaanaalu sammisassaqangaarami paatsiveqanngilaq.

Ullut marlussuit qaangiummata Alicep niua misigisaarussimavoq. Aatsaallu imerpalasoq qernertoq putuguanit seerilermat angajoqqaavisa napparsimmaviliaappaat. Qequa peerneqarmat napparsimasunik paarsisoq Alicep niua takullugulu iluaallerluni ilisimajunnaarpoq. Alicep niua aseruussimangaarmat peerneqartariaqarpoq.

Imerajuttuuneq qilersorsimaqataanerlu

Tamanna tassaaginnanngilaq Alicep niuni annaammagu pisoq alianartoq. Alicep ataataa imerajuttuuvoq. Taamaattumik panimmi imminik atorfissaqartitsiffiani misigissutsikkut timikkullu atorsinnaasimanngilaq. „Imerajuttuunini pissutigalugu imerajuttup ilaquttani tunullinngortittarpai — imigassaq tamatumalu piumasai tamaasa salliutillugit,“ imigassamut tunngasunik siunnersorti Toby Rice Drews taama oqarpoq.

Alicemmi anaanaa? Aammattaaq taanna qilersorsimavoq, imigassamut pinnani, uiminulli imertuartumut. Imerajuttumut aappaasup ataasiinnaq eqqarsaatigigajuttarpaa: atornerluinera unitsissallugu imaluunniit ileqquanut siumut ilisimareerneq ajornartumut sapinngisamik naleqquttunngorsassalluni. Imerajuttup ajornartorsiutaanut ima pulasimatigisarpoq imerajuttuunerup ersiutaanik allaat ersersitsisalersarluni — naak imerajuttuunngikkaluarluni. Taamaattumik inuit Alicep anaanaatut atugaqartut taaneqartarput qilersorsimaqataasunik.

Imerajuttoq qanigisaalu nalusaminnik artukkaminnit aqunneqalersarput. Pissutsit piviusut isiginngitsuusaartarpaat. Meeqqaminnut misigissutsikkut ikorfartuutaasinnaasanngillat. Inuusarput isumakkut nukissaarussimallutik, soorlumi imerajuttup imigassamik atornerluinini aqussinnaanngikkaa, taamatut qanigisaasa imerajuttoq aqussinnaaneq ajorpaat, arlaannaataluunniillu imerajuttuunerup meeqqaminnut kingunissaat aqussinnaaneq ajorpaat.

Imerajuttumulli ilaqutaanullu ikiuutissamik peqarpoq. Ilanngutassiami tulliuttumi tamanna samminerussavarput. (gD 22/5 92)