Inuusuttut ilaat inoorusunngillat

INDIAMI inuusuttut imminorniarumatussusiat aarleritsannartuuvoq. Tasamani misissuisartut missiliuuppaat minutti ataaseq allortarlugu tamatigut imminoriartoqartartoq, minuttillu qulingini tamani imminoriartunik iluatsitsisoqartarluni.

1990-imi Indiami inuit 60.000-it missingi imminorsimapput, „taakkualu affangajaat 18-it 35-llu akornanni ukioqarsimapput,“ atuagassiami India Today-mi taama oqaatigineqarpoq. Ilaat meeraasimapput ammut qulit tikivillugit ukiullit. Indiami imminortartut amerlassuserpiaat ilisimaneqanngilaq, ilaqutariit ilarpassuisa kanngunarsarneqarumanatik toquneq ajunaarnermik pissuteqarnerartarmassuk.

India Today-mi nalunaarutigineqarpoq 1990-imi „inuusuttuaqqat 2500-nit amerlanerusut imminorsimasut asasaqarnermi pakatsisinneqarneq pissutigalugu“. Inuusuttut imminortarnerannut pissutaasunut ilaapput, psykiaterit isumaat naapertorlugu, unammillerneq allanillu angusaqarnerorusussuseq, atuarfimmi siusissukkut aallartittartut.

’Psykiaterit isumaqarput ilaqutariit ataqatigiinnginnerat aliasunnermut kiserliortutullu misiginermut meeqqanik imminorusulersitsisartumut pissutaaqataasorujussuusoq,’ atuagassiami nangilluni taama allassimavoq. Dr. S. G. Dastoor, psykiateriusoq, oqarpoq: „Angajoqqaat meeqqatik ilaginerusartuugunikkik ajornartorsiutaallu paasiniartarlugit, meeqqamik inuunerat annaassimasinnaassagaluarpaat. Eqqarsaatigisarpara siunnersorneqartariallit tassarpiaasut angajoqqaat.“

Angajoqqaat kristumiut Biibilimi kajumissaarneqarput piffissamik meeqqaminnut atuisaqqullugit najoqqutassiallu Guutimik miannerinnittut puiuikkiutsinniartaqqullugit. (5 Moses 6:4-9) Peqqussutigineqarportaaq angajoqqaat meeqqaminnik paamisaarisassanngitsut ’perorsarlugilli inertertassagaat Jehovamit’. — Evf. 6:4.

Kristumiut inuusuttut ulluinnarni ajornartorsiutit anigoruminartinnerussavaat Biibilimi siunnersuut Filípimiunut agdlagkat 4:6, 7-imiittoq maleruarunikku: ’Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ (gD 22/8 92)