Nuannaaqaaq inuugami!

“Nuannaaqaanga inuugama!“ Bernice nuannaarpaloqaluni oqarpoq. Bernice niviarsiaraavoq peqqissoq qulingiluanik ukiulik Tysklandip kujasissortaani najugalik. Nuannaarnissaminut immikkut pissutissaqarpoq.

Ullut ilaanni Bernice suli anaanami naavaniitillugu qatanngutaa napparsimalerpoq. Aappaluaralersimavoq! Anaanaa annilaangasorujussuanngorpoq, nappaammi tunillaattartoq tamanna naluneqanngitsutut naartunermi naartumik tunillaasinnaavoq naartorlu iloqianngortissinnaallugu.

Aava misissoreerlugu nakorsaq sukataaqaluni kajumissaarivoq naartuneq kipiteqqullugu. Aammik misissuinerit tunngavigalugit nakorsap qularutiginngilluinnarpaa anaanaq naartualu tamarmik tunillatsissimasut aappaluaralerlutik. Misissuinerit aamma takutippaat meeqqap iloqianngornissaa aarlerinaateqartorujussuusoq.

Angajoqqaat aalajangiusimavaat naartuersinneq Guutip inatsisaanik unioqqutitsinerusoq. Jehovap nalunaajaasuusutut naartuersinnissaq akueriumanngilaat. Nakorsarli kimigiisertuarsinnarpoq naartuerseqqullugu, naartuersinngippallu qanoq kingupiloqassasoq annilaanganarsaaqalugu oqaluullugit. Annertuumik iloqiaasumik meeraqarluni qanoq ajornartorsiuteqarnartigisoq tikkuarpaa. Angajoqqaalli aalajangiusimannittuarput aalajangiusimanninnertillu Biibilip naartuersinnermut isiginninneranik tunngaveqarnerarlugu. Qanorluunniit pisoqassagaluarpat meeraq pigiumavaat asajumallugulu.

Nakorsaq tupigusuttorujussuuvoq. Nassuerpoq naartuersittarnermik tapersersuisuunani isumaqarlunilu taamaaliorneq ileqqussatigut kukkusuusoq, pisussaallunili pissutsit piviusut kingunissaalu ersarissumik saqqummiunnissaannut.

Ukiut qulingiluat qaangiuttut Bernice, meeraq innarluuteqanngitsoq peqqissorlu, nakorsamukarpoq. Tassani aavanik misissuinermi qulaarneqarpoq aappaluararsimanngisaannartoq. Inunngunnginnerani misissuinermi paasisat nalunanngitsumik kukkusuusimapput. Qujanaqaarmi angajoqqaavisa upperisartik aalajangiusimalluinnarsimammassuk! Tupinnarpallaanngilaq Bernice nillermat: „Nuannaaqaanga inuugama!“ (gD 22/6 92)