Akunnerit pingasut inuuninnik allanngortitsisut

QULINIK ukioqarlunga juullimi aallaaseeqqamik tunissutisivunga. Puiaasat qillertuusallu eqqoriaqattaartarpakka, sivitsunngitsorli pissanganarnerusunik eqqorniagaqartalerlunga — timmissat, pulateriaarsuit, naatsumik oqaatigalugu suut aalasunnguit tamaasa. Timmissanik eqquinerit tamaasa aallaaseeqqama ipua kigartarpara. Erniinnarlu kigarnerit 18-it igeriallaqqissutsinnut takussutissaalerput.

Pisoqarporli igeriallaqqissiartuaarninnik tassanngaannaq kipititsisumik. Ullut ilaanni timmiaararniartillunga qupaloraarsuk orpiutitta qaavaniittoq takulerpara. Umeqqissaariarlugu aallaavara. Eqqorluavillugu! Pisama 19-issaat!

Qupaloraarsuk nunamut nakkarmat ornippara meqquilu aaginnaat takullugit. Isigaanga. Soorlumi isaannarminik oqarniartoq: ’Kia toqoqqugaminga?’ Taava niaqquni arriitsumik nakkartippaa toqullunilu. Misigaanga qamuuna annerlunga. Qissaserpunga. Anaanaga ornipallappara susoqarsimaneranillu timmissallu toqulersup uannut qanoq oqartutut inneranik oqaluttuullugu. Tamatuma kingorna timmissanik pisaqarniartarunnaarpunga aallaasinnilu nalunaaqutsersuisarunnaarlunga. Ulloq manna tikivillugu timmiaarannguaq aammik ulikkaartoq taanna takorloortarpara. Meeraaninni misigisama tamatuma qupaloraarsuugaluaraanni inuugaluaraanniluunniit inuunerup qanoq naleqartigilluinnassusianik paasinnilersippaanga.

Aamma allanik inuuninni siusissukkut ilikkagaqarpunga — ilaatigut unneqqarissuseq, utoqqarnut ataqqinninneq, ileqqorissaarnissamik misigineq ilumoortumullu asanninneq. Memphisimi Tennesseemiittumi, USA-mi, inunngorpunga, Robbinsimili, Chicagomi Illinoisimiittumi, alliartorsimallunga. Meeraagallarama naalagiartinneqartarpunga, ileqqussatigulli najoqqutassat oqaluffimmi ilikkakka ukiut ingerlaneranni puioriartuaarsimavakka. Ilagiit palasilluunniit iliuusii oqaatsinut tusarnersunut tamakkununnga naapertuutinngillat; ilumoortuusaarniarnermillu takunnittuarpunga. Aamma inuiaqatigiit iluanni ileqqussatigut najoqqutassat tamakku atorsinnaanngitsutut sumiginnagaapput. Qupaloraarsunnguulli toqunerani ilikkagara puiunngisaannarpara — inuuneq naleqangaartoq.

Highshcoolimi atualerama angajoqqaama aliasuutigeqisaannik naalagiartarunnaarpunga. Nalunngeqatiginnissutiga misikkarlussivoq, eqqaamavaralu allat assigalugit oqaasipiluttalerama ajortup tungaanut ingerlalerlunga. Ilagisartakkakka ajorsiartuinnarput, ikiaroortalerpungalu kanngunartuliortalerlungalu. Biibilimi oqaatigineqartutorluinnaq ingerlalerpunga: ’Tammarnaveeritsi; ajortut ikinngutigalugit ileqqut ajunngitsut aserortarput.’ — 1 Korintumiut 15:33.

Taamaakkaluartorli suli ileqqussatigut misigissuseqalaarpunga. Ukiut pingajussaanni highshcoolimiinninni kammalaatikka marluk, aamma basketballeriaqatigisartakkakka, ilagiuartarpakka — unnuit ilaanni arnamik inuusuttumik naapitsinerput tikillugu. Ikinngutikka marluk taakku aalajangerput pinngitsaalillugu arneriffiginiarlugu. Arnap inuusuttup ilungersorluni  taamaalioqqunagit qinnuigigaluarpai, tigummannilu silaarutaasartutut nillialluni oqarpoq taamaaliornatik toquinnaqqulluni. Naak pinaaseraluaqisoq pinngitsaalillugu anneriffigaat. Ilaaqqugaluarpaannga. Maajungaarlunga ajuusaaqalungalu qunutuutut arnamut angutaasernerat peqataaffigiumanngilara. Kamaattorujussuuaannga oqaasipiluffigalungalu. Unnuk taanna killigalugu ikinngutigiikkunnaarpugut.

Ukiut arlallit qaangiummata paasilerpara iliuusiat Biibilimi oqaatigineqartumut naapertuuttoq: ’Tamakku pillugit tupigusullutillu mitallersarput, taama maajunnartuliorlutik qussalaatsuliortut ingiallussaarassigik.’ — 1 Pîtruse 4:4.

1965-imi, highshcoolimiinnerma ukiuisa kingullersaanni, Vietnamimut sorsunneq sakkortusiartuaartinneqarpoq, soraarummeereernermalu kingorna sussanerlunga nalornivunga. Sakkutuunngoriartoqqusaarusunngikkaluaqaanga, taamaappammi toqutsisussaassagama. Qupaloraarsuup inuulluunniit inuuneranik toqutsinissaq suli akerlerisorujussuuara. Ajornanngitsumik aniguiffissaqarpoq: Universitetip basketballimik unammisartuinut ilaanissamut aningaasanik tapiiffigitinneq. Taamaakkaluartorli sakkutuunut timmisartortunut nalunaarpunga, orpippassuarni akiuuteqataannginniassagama taamaalillungalu toqutsinnginniassagama.

Ukiuni sisamani sakkutuutut kiffartorninni timmisartumut mekaneritut sakkutuunut timmisartortunut ilaavunga. Tunngaviusumik ilinniagaqareerlunga Taiwanimi sakkutuunut timmisartoqarfimmut aallartitaavunga. Tassa 1968-imi januarimi. Sakkutooqatima amerlanersaat Vietnamimut, Thailandimut, Japanimut Filippinerinullu ilaannikkut aallartitaasarput. Suut tikkuakkatik tamaasa pisinnaavaat — aamma ikiaroornartut kimittuut soorlu heroin kokainilu. Uanga highshcoolimiitillunga ikiaroortalersimavunga, maannalu aamma tuniniaasalersimallunga. Qaammatit arfineq-pingasut qaangiummata sakkutooqatigiiusugut tamatta Okinawamut Japanimiittumut, taamani Amerikamiut naalakkersuisoqarfigisaannut, nuutsinneqarpugut. Ikiaroornartunik tuniniaanerput ingerlalluaqaaq.

Naalakkatsinnit uanga Vietnamimut qaaqquneqarpunga, taavani pissutsit qanoq ittuusut paasipajaarniassagakku. Aningaasanik piumatussutsinnit misigisaqarusussutsinnillu killinneqarlunga periarfissaq ilassivara. Vietnam nunaavoq qorsuusoq qaqortunillu sioralinnik sissalik. Vietnamimiut tupinnaannartumik inussiarnersuullutillu inoroorsaartuupput. Kasuttorfigigaanni nereqqusisaraat. Ima eqqarsarpunga: ’Sooruna sorsuuttoqartoq? Sooruna inuit taakku uumasutut toqorarneqartut?’ Saigonimili pinerlunniarnermik annertuumik, iliuutsinik ipertuunik ileqqorlungaarnermik soqutigittaatsumillu angutaasernermik takusaqaqaanga! Inuup inuunera naleqartutut isigineqanngilaq. Inuit eqqissillutik pilluarlutillu inuusinnaanerat inoorusussusiallu qularutigisorujussuanngorpara.

1970-imi sakkutuujujunnaarlunga Robbinsimut Illinoisimiittumut angerlarpunga. Suliffittaarpunga sungiussiniarnialerlungalu, sapernaqaarli. Suut tamarmik allanngorsimapput. Aap, aamma uanga allanngorsimavunga. Taavani angerlarsimasutut misigiunnaarsimavunga. Eqqarsaatikka kangiani ungasissumiipput; taavani misigisimasakka puiuikkiulluinnarsimavakka, puiorsinnaanngilluinnarlugillu. Taavunga uterusuttorujussuuvunga. Qaammatillu arfineq-pingasut qaangiuttut Okinawamut Japanimiittumut siumuinnaq billetisivunga.

Unnuk siulleq ornittagannaarisimasannukarpunga. Tina’s Bar and Lounge, imerniartarfik  nuannersunik pisoqartuartarsimasoq. Tupaallaatigeqisannik taamani ikiaroornartunik tuniniaasarallarama ikinngutigisimasama ilaat aamma tassaniippoq. Takoqqikkatta assut nuannaarpugut, pilersaarusiorasuarpugullu ikiaroornartunik anngiortumik Thailandimit annissiniarluta. Thailandimut isersinnaajumalluta sakkutuujusuusaarpugut, peqquserluttunik kinaassutsitsinnut uppernarsaateqarluta, sakkutuutut kiffartunngikkallarnermut allagartaqarluta, uniformeqarluta, ilaallu ilanngullugit. Taamaalilluta timmisartoqarfimmit aniguivugut Bangkokimullu iserluta.

Taavani angalasunut siuttuusartoq ilisimatinneqareersimasoq attaveqarfigaarput. Umiariaq atorlugu orpippassuit akornanni masarsukkut qeqertamut avinngarusimasumukarpugut. Tassani Thailandip ikiaroornartunik tuniniaasartorsuannit tikilluaqquneqarpugut. Inoroorsaarluangaarmat politiinut nalunaarutiginninnissaa ilimaginngilluinnarparput. Taamaaliorsimavorli — nammineq inatsisinik unioqqutitsisuunerminut matooriniutitut.

Bangkokimi busstationimi politiit utaqqisimavaatigut — kuffertinniippullu ikiaroornartut 29 kiilut! Busstationip isertarfiagut iserpunga, tassanngaannarlu saviminermik nillertumik pukusukkut attorneqarpunga. Thailandimiut politiivisa oberstiata illuinnarsuut kaliber .38 niaqqunnut tutseqqallugu nukillaarnaannartumik eqqissisimarpalulluni oqarfigaanga: „Pinaaserniarsariniaqinak.“ Taava tigusaavugut politeeqarfiliaanneqarlutalu.

Okinawami perlulioqatiginiagarput kamippaat puukuinik pingasunik heroinimik imalinnik nassartoq naapittussaagaluarparput. Ikioqatigiipilunnitsigut naatsorsuutigisimagaluarparput Okinawami ikiaroornartunik tuniniaaneq aqulissallutigu. Suleqatitta kamippaat puukui nassatat kaavittut akornannut aavai, politiilli qimmiisa heroin nassaaraat. Taassuma heroiniutini annaavaa, uangalu kuffertera marihuanamik speedimillu ulikkaartoq annaavara, taamaalilluni niuerniarnikkut suliluunniit aallartinnata nakkaattoorpugut. Parnaarussivimmut Klong Premmimut pivugut. Tamaani pissutsit pitsaanngeqaat. Ullormut marloriarluta aalisagamininnguanik tarajortikkanik niaquusamullu qaqorteqqasunik nerisassinneqartarpugut. Qaammatini marlunni parnaarussivimmiinninni 45 kiilumik oqilivunga.

Parnaarussivimmi angummit angisuumit akimasorpaluttumit pulaarneqarpugut. Amerikamiut aallartitaqarfianneersuunerarpoq. Oqarpoq ikiorniarluta paasissutissanilli arlalinnik peqqaartariaqarluni. Tatiginngilarpulli. Nassuiinnarpoq Asiap kujataa-kangiani tamarmi ikiaroornartuerniarnermik paasiniaasartuulluni, ikiaroornartumillu nunamit annissisarnerput ilumut uppernarsiniaraluarlugu. Aqaguani takkuteqqippoq kisima oqaloqatigiumallunga.

„Tamaasa oqaluttuariinnakkit,“ oqarpoq. „Taamaaliunngikkuit neriorsussavakkit asiunissat tikillugu maani parnaarussivimmiissasutit.“ Akuersiinnarpunga tamaasalu oqaluttuaralugit. Taava aperaanga: „Isertortumik uannut sulisoorusussinnaavit?“ Neqeroorut tamanna tupaallaatigeqaara, naggataatigulli akuersillunga.

Iperagaavunga Okinawamilu politiinut ikiaroornartorsiortartunut sulisuulerlunga. Suliassara tassaavoq ikiaroornartumik niueqatiginninnissamik isumaqatigiissuteqartuusaarlunga ikiaroornartumik tuniniaasartunik politiinut nalunaarutiginnittarnissaq. Ukiulli ataatsip affallu missaanni taamatut sulereerlunga allamik sammisaqalerpunga.

Ikinngutigalugu imiartarfimmik Papa Joe’simik taasatsinnik ammaavugut. Nivissanik pulaartunut ’inoroorsaartussanik’ sulisoqarpugut. Suliassaat tassaavoq sakkutuunik sapinngisamik annertuumik imertitsisarnissaq. Unnuit ilaanni angutip imerniartarfiup nerriviusaani  issiasup aperilerpaanga: „Jimmy-san-iunngilatit?“

„Taannaavunga.“

„Ingerlalluangaaravit.“

„Ajorpianngilaq. Soormi?“

„Siunnersuut pitsaasoq malinniaruk: Tuniniaasartunngoqqinniaqinak! Taamaalioruit tigusarissavatsigit peersillutillu.“

Paasivara ikiaroornartuernianik paasiniaasartuusoq, marserneqarsimasungalu. Ilisimasaqarpallaarsimavunga, nigorsimanissannillu siunnersorneqarpunga. Soqutiginngilarali. Tuniniaasarunnaarnikuuvungami. Inooriaaserisimasara kanngunartoq qimassimavara.

Taamaalinerani Kangiani upperisarsiornerit misissornerisigut inuunerup siunertaanik paasiniaaleraluarpunga. Erniinnarli paasivara upperisarsiornerit tamakku kristumiuuneraqatigiit ataasiullunilu pingasuussutsimik ajoqersuutaattulli paasiuminaatsigalutillu eqqumiitsigisut. Silaqassutsimut naapertuutinngillat.

Ullut ilaanni kisima angerlarsimatillunga matukkut kasuttortoqarpoq. Mapperakku takuara arnaq Japanimiu utoqqasaaq inussiarnersumik qungujulasoq. Allat maluginianngilakka isai kisiisa. Soorlumi uisorilasut. Isaasigut takusinnaavara unneqqarissuusoq nakutitsiniartuunngitsorlu. Misigaanga tusarnaartariaqarluinnarlugu. Nassuiarsinnaanngilara sooq, kisianni arnaq sumiginnaannarsinnaanngilara. Taamaattumik iseqquara.

Aatsaat igaffimmi ingikkatta iluamik tusarnaalerpara. Meeraagallarama naalagiakulasarsimaqaanga, eqqarsaatilli Biibilimeersut arnap eqqartugai tusarsimanngisaannarpakka. Arnap takutippaanga sooq taama ajortoqartigisoq, Satan tassaasoq silap matuma Guutia, tamakku tamarmik ullussani kingullerni inuunitsinnut nalunaaqutaasut, kiisalu qanittukkut Guutip tamakku tamaasa taamaatitikkumaarai silarsuarmillu nutaamik minguitsumik naapertuilluartumillu pilersitsilluni. Akuttunngitsumik eqqarsaatigisarsimavara sooq inuusugut, suna inuunerup siunertarineraa nunarsuarlu alianaatsoq sooq pinngortinneqarsimanersoq. Tamakkununnga tamanut akissutissat Biibilimi nassaassaapput, nassaassaajuaannarsimallutillu. — Tussiaat 92:7; Nalunaajaasup oqaasii 1:4; Jesaja 45:18; Daniel 2:44; 2 Korintumiut 4:4; 2 Timûtiuse 3:1-5, 13; 2 Pîtruse 3:13.

Nangilluni oqaluttuartillugu soorlumi aatsaat itilersunga. Soorlu inerittussaq ukiorpassuarni sialoqanngiffiusuni issumiittuartoq siallilillatuarpat erniinnaq puttuttartoq, eqqarsaatit tamakku Guutimeersut ukiorpassuarni isumanni tissorussaasimasut sallusuissutip ernga uannut kuerarneqarmat puttallartutut ileriataarput. — Evfisumiut 5:26; sarĸúmersitat 7:17.

Inuuneq naassaanngitsoq, qilammiunngitsoq, nunarsuarmili paratiisiusumi Edenip naatsiiviatut ittumi, toqungasut millionilippassuit makititaallutik, anniartoqarunnaarluni, qiasoqarunnaarluni, naalliuttoqarunnaarluni, pinerluttoqarunnaarluni, napparsimasoqarunnaarluni imaluunniit toqusoqartarunnaarluni — allassimaffippassuit Jehovap naalagaaffiani Kristusip naalakkersuinerani tamakkorpassuit pilluaqqussutisaanerannik ersersitsisut nuannerluinnartumik takorluuisilersippaannga Guutip inunnik naalattunik qanoq siunertaqarfiginninneranik. — Tussiaat 37:10, 11, 29; Ussatit 2:21, 22; Juánase 5:28, 29; 17:3; sarĸúmersitat 21:1, 4, 5.

Upperissallugu ingasappallaarpa? Naamik, arnammi oqaatsini tamaasa Biibilimi allassimaffinnik tunngavissaqartittarpai. Oqalutsillugu Biibili aatsaat taama paasiuminartitsigilerpara. Marluk paasilerpakka: Siullermik, taanna sallusuissutaasoq Guutimeersoq allanngorsagaanngitsoq, sallusuissut oqaluffiit ajoqersuutigisaannit eqqunngitsunit mingutsitaanngitsoq; aappassaanillu, inooriaasera allanngortittariaqarlugu Guutillu najoqqutassiaanik  inatsisaanillu maleruaasariaqarlunga. — Tussiaat 119:105; Rûmamiut 12:1, 2; 1 Korintumiut 6:9-11; Kulorsamiut 3:9, 10.

Nalunaaquttap-akunnerini pingasuni oqaloqatigiippugut — nalunaaquttap-akunnerini pingasuni inuuninnik allanngortitsisuni. Haruko Isegawap — taamatummi ateqarami — aninnginnermini oqaluttuuppaanga sumi Jehovap Nalunaajaasui ataatsimiittartut. Sapaatip-akunnerata tulliani siullermeerlunga Jehovap Nalunaajaasuisa ataatsimiinnerannut najuuppunga. Taava Haruko Isegawap sapaatip-akunneri tamaasa atuaqqissaaqatigisalerpaanga. Ilikkakka eqqarsariartaatsinnut pissusilersorninnullu sunniuteqartorujussuupput. Oqapajaarsinnaavunga ullormiit ullormut inuunera allanngortillugu. Ikinngutitoqqama tamanna ingasageqaat, taamaattumillu alarlunga. Taamaalillunga ikinngutitoqqama ilaat annaavakka Jesusillu neriorsuisimaneratorluinnaq nutaanik ikinngutitaarlunga. (Matîuse 19:29) Augustip 30-ani 1974, qatanngutip Isegawap pulaaqqaarneranit qaammatit qulit qaangiuttut, Jehovap nalunaajaasuatut kuisippunga.

Qaammammi tulliuttumi USA-mut angerlarpunga angerlarsimaffinnilu Robbinsimi ilagiinnut ilaalerlunga. Aappaaguani Jehovap Nalunaajaasuisa qullersaqarfiat New Yorkimi Brooklynimiittoq, Betelimik („Guutip illua“) taaneqartartoq, pulaarpara. Tassani 3000-it kajumissutsiminnik suleqataapput — 1000-illu Watchtower Farmsimi naalagaaffiup New Yorkip avannarpasinnerusortaaniittumi — nunarsuaq tamakkerlugu siaruarterneqartartunik atuagassianik Biibililersaarutaasunik sanaartorlutik. Pulaarnerma tassani kiffartornissamik kissaatiga sakkortunerulersippaa, 1979-imilu kissaatiga tamanna Jehovap piviusunngortippaa.

Qaammatit marlussuit kingorna qatanngut angut alla immikkoortortami uanga suliffigisanni sulilerpoq. Soorlumi siornatigut takusimallugu, eqqaamanaguli sumi. Immitsinnut ilinniarlualeriaratta paasilerparput Okinawameeqatigiissimalluta, inissiarsuarmi ataatsimi ineqarsimalluta tamattalu ikiaroornartuerniartartuusimalluta. Takoqqinnerput nuanneqaaq. Maanna taanna nulianilu Mikronesiami piffissartik tamaat atorlugu oqaluussisartuupput, specialpioneriullutik.

1981-imi nuliamik asannittumik Bonniemik Jehovap pilluaqqusaatippaanga, marluullutalu maani Betelimi kiffartornitsinni pilluaqqussutisiassarpassuarnik nuannaarutiginnissimavugut. Tussiaasiortup Davidip oqarsimaneratut misigaanga, taanna Tussiaat 23, versi 6-imi, ima allassimagami: „Tassami ajunngissutsip unneqqarissutsillu malittarissavaannga inuunera tamaat, illillu illunni ineqassaanga ullussanni tamani.“

Ullut ilaanni Matîuse 10:29, 31 atuarpara. Eqqarsaatikka meeraaninnut utersaariasaarput: ’Qupaloraarsut marluk aningaasat minnertaannik akeqartarinnginnerpat? Taakkualu ilaat ataaserluunnit nunamut nakkarnavianngilaq Ataatassi peqqunngippani.“ Qupaloraarsuk toqukkiga Jehovap ilumut takusimanerpaa? Eqqissiallappunga nanginnera atuarakku: ’Taamaattumik erseqinasi; qupaloraarsuppassuarnit pingaarneruvusi.’ — Oqaluttuartoq: James Dyson. (gD 22/7 90)

[Qupp. 15-mi issuagaq]

’Sooruna inuit taakku uumasutut toqorarneqartut?’

[Qupp. 16-mi issuagaq]

Tassanngaannaq saviminermik nillertumik pukusukkut attorneqarpunga

[Qupp. 17-mi issuagaq]

Politiit qimmiisa heroin nassaaraat

[Qupp. 18-mi issuagaq]

Misigaanga tusarnaartariaqarluinnarlugu

[Qupp. 19-mi assiliartaq]

James nulialu, Bonnie