Misigissutsit nuanniitsut — Akiorneqarsinnaappat?

„NAAMERLUINNAQ! Misigissutsit nuanniitsut nukittuallaarput. Allatut iliorsinnaanngilanga kisianni qaangiunnissaat utaqqiinnarlugu.“

Misigissutsit soorlu ernumanerup, siooranerup, kamannerup, isumakulunnerup, pisuusutut misiginerup, imminut naakkiginerup nalornisoorluinnarnerullu akiorniarnissaat eqqaaneqaraangat inuppassuit taamatut qisuariartarput. Misigissutsilli taama ittut akiorneqarsinnaapput. Nakkarfigiinnarnissaannut taarsiullugu qanoq ililluni sakkukillisarneqarsinnaanerat immaqalu allaat peerluinnarnissaat ilinniarneqarsinnaavoq.

Soorunami misigissutsit nuanniitsut nalinginnaasut tamatta misigisartakkavut aammalu neriuutaarulluinnartutut misigineq assigiinngissuteqangaatsiarput. Kingulleq ilisimasalimmit ikiorneqarnissamik pisariaqartitsiffiusinnaavoq, misigissutsilli nuanniitsut aqunnissaat nammineq ilikkarneqarsinnaavoq.

Iluamik oqaatigalugu misigissutsit nuanniitsut tamakkeratik ajoqutaasarput. Assersuutigalugu, kukkuluttorujussuarsimavutit. Peqqissimeqaatit, peqqissiminerlu tamanna iluaqutigalugu ajunngitsumik ingerlaqqilerniarsarivutit kingornalu taamaalioqqinnaveersaarlutit. Taava misigissuseq nuanniikkaluartoq taanna, peqqissimineq, ajunngitsumik sunniuteqarpoq. Imaluunniit ajornartorsiummik arlaannik isumakuluutiginninnerup ilungersuussisumik  iliuuseqalersittarpaatigut silatuumillu aaqqiissutissarsiortittarluta. Tamanna aamma tassaavoq qisuariarneq ajunngitsumik sunniutilik.

Taavami kukkuluttoreerluni aaqqereeraluarlugulu kingunersuanut allaat imminut pisuutittutut misigiuaannarlunilu nikallungajuaannaraanni? Imaluunniit pisinnaasaq tamakkerlugu ajornartorsiut aaqqinniarsarereeraluarlugu isumakulukkiartuinnaraanni? Misigissutsikkut kingunipilutsitsinerit tamakku nikallorujussuartitsisinnaapput. Misigissutsit tamakku qanoq ililluni akiorneqarsinnaappat? Aaqqiissutissaq immaqa tassaassaaq eqqarsaatitsinnik aqutsineq:

Eqqarsaativut aqussinnaavavut

Eqqarsartaatsimut tunngasunik suliaqartut amerlasuut aalajangiussimavaat misigissutsivut eqqarsaatitsinnik aallaaveqartut. Soorlu dr. Wayne W. Dyer ima oqarsimavoq: „Misigissutsit pilersut tamavimmik eqqarsaatinik aallaaveqarput.“ Dr. David D. Burns ima ilaliivoq: „Misigissutsit nuanniitsut tamarmik isummanik kukkusunik nikallornartunik pilerfeqarput.“

Soqutiginarpoq aamma Biibilimi misigissutsitta ilarpassui eqqarsaatiginerorusutatsinnut atassuteqarnerarneqarmata, eqqarsaatillu aqunneqarnissaata pisariaqassusia erseqqissarneqarluni. Allassimaffiit tulliuttut maluginiakkit:

„Qunutitaasumut ullut atoruminaatsuusarput, qiimasaartorli nalliuttorsiortuartutut ippoq.“ — Ussatit 15:15.

„Silap matuma inui ileqqoqatigeqinasigik, allanngoritsili isumassigut nutaanngorlusi, sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ — Rûmamiut 12:2.

’Eqqarsaatit tamaasa tigusatut kiffartortippavut Kristusimut naalattunngorlugit.’ — 2 Korintumiut 10:5.

’Inutoqaq siornagut angalaaserisarsi iperarsiuk, taanna pileritsannernik salloqittaataasunik imminik aserorniartoq; nutaanngortigitsili anersaassigut isumaqaatissigut, inuttaarlu Guuti assilillugu pinngortitaq atillugu iluartillugu illernartillugulu ilumoornikkut.’ — Evfisumiut 4:22-24.

’Ilumoortut suulluunniit, assuarnaatsut suulluunniit, iluartut suulluunniit, minguitsut suulluunniit, asanartut suulluunniit, nersornartut suulluunniit, suut ileqquulluartuunersut, suut ataqqinartuunersut, tamakku eqqarsaatiginiarsigik.’ — Filípimiut 4:8.

„Pavaniittut pilerigisigik nunamiittut pinnagit.’ — Kulorsamiut 3:2.

Misigissutsivut eqqarsaatitsinnik pilerfeqarmata misigissutsinik nuanniitsunik akiuiniarnissaq tassaassaaq eqqarsaatinik aqutsiniarneq. Piffissap naammattup ingerlanerani ilungersuussillunilu suliniuteqarnikkut eqqarsaatit aqulluarsinnaanerulernissaat ilinniarneqarsinnaavoq taamaalioreeraannilu misigissutsit aqunneqarsinnaassapput.

Misigissutsit nuanniitsut akiorneqarsinnaasut oqaannassalluni ajornanngitsuararsuuvoq, iliuuseqarnissarli taamaanngilaq. Misigissutsit naalakkersimaarniarniaraanni qanoq iliortoqarsinnaava? (gD 8/10 92)

[Qupp. 21-mi issuagaq]

Misigissutsit nuanniitsut tamakkeratik ajoqutaapput