Misigissutsit nuanniitsut — Qanoq akiorneqarsinnaappat?

MISIGISSUTSIT nuanniitsut aqussinnaalerumagaanni siullermik eqqarsaatit nuanniitsut killilersimaarniartariaqarput.

Aappassaanik, eqqarsaatit nuanniitsut allanngortinniarsarisariaqarput. Soorlu ima eqqarsartaraanni: ’Eqqortumik iliunngisaannarpunga,’ ima eqqarsalerniarsarisariaqarpoq: ’Allatulli ippunga; eqqortunik iliuuseqartaqaanga, kukkuneqanngivinngilangali.’

Taamaalioreeruit ilimagissanngilat erniinnaq ilorraallannerussallutit (immaqa taamatut misigigaluarlutit) eqqarsaallu tamanna uninngavigiinnaqinagu. Taamaalioreernerit qularnaarluaannaruk ingerlaqqillutillu.

Pingajussaanik, eqqarsaatit nikallornartut niaqqunnit anisinniarsariaqarpatit. Sukataarlutit aalajangersimallutillu anisinniarsarikkit, soorlumigooq ajortuliorujussuarniarluni eqqarsaat anisinniarsarigit. Naak eqqarsaatinnik aaqqiiniarlutit ilungersornikkut anisissinnaagaluaritit, alloriarnerit sisamaat ikiortigilluarsinnaavat: Arlaannik suliaqarniarsarigit, sapinngisamik qiimmannartumik.

Tamanna pingaaruteqartorujussuuvoq! Eqqarsaatimmi nuanniitsut puiorniarsarisat qaffaqqajaajuartarput. Qujanartumilli arlalissuit ataatsikkut sammineqarsinnaanngillat. Marluinnaat ataatsikkut itisuumik eqqarsaatiginiarsareriakkit, taava qularutigiunnaassavatit. Eqqarsaatikkut allanik sammisaqaruit eqqarsaatit nuanniitsut qaffakaaqqajaannginnerussapput.

Dr. Maxwell Maltzip qanoq ililluni eqqarsaatit nuanniitsut ajunngitsunik taarserneqarsinnaanerat ima assersuusiorfigaa: „Oqaluttartut nuanniigisannik nipilersorpat nuannernerusumik appitsinniarlugu pinngitsaalisinnaanngilat  . . . Aap, nuummik allamik ikkussiinnassaatit. Taamatuttaaq pisakkit ’nipilersukkat’ illit nammineq iluit oqaluttartuaneersut.“

Eqqarsaatit nuanniitsut ima pigiliussimatigisinnaasarput imaaliallaannaq peerneqarsinnaasaratik. Peerneqarniarsinnaapput allanik taarsernerisigut. Allatut oqaatigalugu nuannernerusumik ’oqaluttartup nuutaa taarsertariaqarpoq’. Imaluunniit ’kanalimut’ allamut nuuttariaqarpoq, tassaniiginnarlunilu.

Oqitsuunngilaq

Alloriarnerit sisamat taakku tulleriiaarlugit allattussallugit ajornanngeqaaq, maleruarnissaalli artornarsinnaaqaaq! Taamaattumik tupaallassanngilatit eqqarsaativit misigissutsivillu nuanniitsut akiorniarnerini aallaqqaataani artorsassagaluaruit. Artornarnissaa naatsorsuutigissavat, eqqaamassavalli oqiliartuaassammat.

Cindy, ilinniartitsisoq, eqqaariartigu. Cindy alliartorsimavoq imerajuttumik anaanaqarluni. Ukiorpassuarni imminut pisuutittutut misigisimajuarsimavoq toqqissisimanngittuarsimallunilu. Taavali aalajangerpoq tamanna iliuuseqarfiginiarlugu. Qanoq iliorpa?

Cindy oqaluttuarpoq: „Paasiniaqqissaalerpara eqqarsaatima sorliit misigissutsinik nuanniitsunik tunisaraannga. Eqqarsaatit tamakku qaffakaagaangata tunngavii angullugit eqqarsaatigeqqissaartarpakka. Taamaalioreeraangama ajunngitsunik eqqarsaateqarniarsarisarpunga. Eqqarsaatikka pinngitsaalillugit atuartitannut qanorlu ilillugit taakku ikiorsinnaanerinut tunngatinniarsarisarpakka. Taamaaliornissara oqinneruleriartuaarpoq, misigaangalu misigissutsikka aqussinnaanerulerlugit.“

Taamaakkaluartorli ima eqqarsarsinnaavutit . . .

Sooq taama ajornakusoortigaa?

Ileqqut pitsaanngitsut, soorlu nerivallaarneq pujortartarnerluunniit, qaangerniassallugit oqitsuua? Naamerluinnaq! Piffissap annertungaatsiartup ingerlanerani aalajangersimalluarluni iliuuseqarnikkut aatsaat qaangerneqarsinnaapput. Inuit ilaasa nuanniitsunik eqqarsaateqarneq ileqqoraat, ileqqoq ileqqupalaatulli allatut qaangeruminaatsigisoq.

Nuanniitsunik eqqarsarneq ileqqorilersimagukku tamatumalu qaangernissaa kissaatigigukku inuup sanigorsartup imaluunniit pujortartarunnaarniarsarisup aalajangersimalluinnarneratulli aalajangersimasariaqarputit.

Pingaarnerpaasoq tassa nakkaannannginnissaq nikallunnginnissarlu, ajornannginneruneri pissutigiinnarlugit. Eqqarsaatit nuanniitsut akiortuaannakkit, qaammaterpassuarniluunniit ilungersussagaluaruit nakkartoortassagaluaruilluunniit. Timersuummik unammersuarnermut ilaasussap sungiusarnermini ilungersussusiatut ilungersorlutit iliuuseqartuaannarit. Sivikitsumik iluarusunnissamut taarsiullugu ungasinnerusumut kingunissai eqqarsaatigikkit.

Peerluinnarneqarsinnaappat?

Misigissutsit nuanniitsut peerluinnarneqarsinnaappat? Pilluarnermik tamakkiisumik maannakkut angusinissaq  naatsorsuutigigukku pakatsissaatit isumatsassallutillu. Naammalluinnangitsuussutsitsinni pilluarneq angusinnaasarput tamakkiisuunngilaq. Pilluarnermilli tamatuminnga pigisaqarluni inuuneq nikallornartunik nuanniitsunik misigissuseqartuarluni inuunermit pitsaaneruvoq.

Ima paasisariaqarpa misigissutsit nuanniitsut ajugaaffiginngisaannarsinnaagivut? Naamik, Biibilimi eqqortumik nassuiarneqarpoq pissutsit naammalluinnanngitsut suli atuukkallalaarallartussat atorivut, piffissarli tamakku naassaanngitsussamut atuukkunnaarfissaat aalajangerneqarsimasoq. Tamanna qanittukkut pissaaq, tassa Guutip qilammi naalagaaffiata Kristusimit aqunneqartup nunami naalakkersuinera atuutilerpat inuiaallu naammalluinnartunngoriartuaartilerpagit. Pisoq tamanna Jesusip taasimavaa ’pinngoqqiffik’ [imaluunniit „ernioqqiffik“, atuaqqissaassutissami ilanngussaq]. — Matîuse 19:28; takukkittaaq Tussiaat 37:29; Matîuse 6:9, 10; sarĸúmersitat 21:3-5.

Inuttulli naammalluinnanngitsutut piginnaanitta killeqarnera miserratiginagu akuerigutsigu pilluarnerulissaagut, isumakkullu peqqilluinnarnissarput ingasattajaarluta ujartornagu inuunitsinni allanik sammisaqarnissatsinnut annerusumik kiffaanngissuseqartissalluta. Misigissutsit nuanniitsut aaqqinneqarnissata Guuutip Ajugaqanngitsup assaaniinneranik ilisimanninnitta pillualersissavaatigut isumakkullu eqqissitilluta.

Siunnersuutit tamakku isumaliutersuutaanaappat? Atorluarneqarsinnaappat? Atorluarneqarsinnaapput. Misigisimasat tulliuttut tamanna erseqqissassavaat. (gD 8/10 92)

[Qupp. 23-mi issuagaq]

Eqqarsaatit nuanniitsut nuannersunik taarserneqarsinnaapput

[Qupp. 23-mi issuagaq]

Ajornannginnerunera pissutigiinnarlugu nakkaannaqinak nikalloqinallu

[Qupp. 24-mi assiliartaq]

Misigissutsinik akiuiniarneq ilikkassagaanni piffissaq kipisuissuserlu pisariaqarput — soorlu sanigorsarniaraanni taamaattoq