Silarsuaq nutaaq — tamarmik nalerisimaarutissaannut

UPPERIUMINAASSINNAAGALUARPOQ, silarsuarmulli nutaamut iserluinnalerpugut! Silarsuaq nutaaq tamanna nunarsuaq suli annaanneqarsinnaagallartillugu atuutilissaaq — tassa inuusinnaanissatsinnut tunngavissatta aserorluinnarneqannginneranni. Inuiaallu inuuginnarsinnaanissaannik ulorianartorsiortitsisut tamarmik peerneqassapput. Qanoq ililluni tamanna pisinnagami?

Ukiorpaaluit matuma siornagut oqaluttuarisaanermik ilisimatuup Arnold J. Toynbeep pissutsit silarsuup atugai aarlerinartut tikkuarsimavai aperalunilu: „Qanoq iliussaagut annakkumalluta?“ Apeqqutini nammineq akivaa oqarluni: „Politikkikkut inatsisitigoortumik suleqatigiiffiusumillu silarsuaq tamakkerlugu naalakkersuinermik aaqqissuussamik pilersitsissaagut.“

Silarsuarmi nutaaq atuutilersussaq ’aaqqissuussaassaaq suleqatigiiffiusoq’, tassa isumaqatigiilluni  suleqatigiiffiussalluni, politikkikkulli aaqissuussaanerussanani. Silarsuaq nutaassaq tamanna demokratiimik aaqqissuussanilluunniit inuit pilersitaannik allanik tunngaveqarnavianngilaq. Naalakkersuisuni — silarsuarmut naalakkersuisut — pissutigalugit silarsuup nutaap anguniakkani angussavai. Silarsuarmut naalakkersuisut taakku qanittukkut tupinnarluinnartumik iliuuseqassapput ajornartorsiutillu ullumikkut inuiaat akiorniagaat tamaasa tulleriisungaannarlugit piiassallugit. Qanoq ilillutik? Ajornartorsiutinut pissutaasut aaqqiiniaraluarnermilu akornutaagajoqisut piiarnerisigut.

Ilumut qanoq tamanna pisinnaagami? Inuit tassani naalakkersueqataasussat suli naammalluinnanngitsuussannginnamik? Manna tikillugu inuit ajornartorsiutinik aaqqiisinnaasimanngillat. Takorlooriarulli silarsuarmut naalakkersuisunut ilaasut taakkua naammalluinnartuussapput, namminissarsioratik innuttaminnut ajunngitsussamik piniartut. Eqqarsaatigeriarullu ajornartorsiutinik aaqqiinissamut tamanna qanoq periarfissiissasoq.

Ataatsikkut ataatsimut aaqqiineq

Silarsuarmut naalakkersuisoqalerpat, naalakkersueqataasullu naammalluinnartuuppata, nunarsuaq nunanut immikkoortitaartunut namminersortunut tamarmik immikkut naalakkersuisulinnut aggorsimajunnaassaaq. Politikererpassuit inuillu allarpassuit inuiannik, naggueqatigiinnik inuiaqatigiinnillu taakkualu akornanni pissutsinik aqutsisussat pisariaarutissapput. Naalakkersuisoqarfippassuit allaffeqarfissuallit atorfilinnullu inissiartallit pisariaarutissapput. Tamakkununnga tamanut aningaasartuutaasartorpassuit atorunnaassapput — atorfillit ataatsimiigiartarnerinut, inatsisartut nunaminni nunamiluunniit allami ataatsimiinnerinut ataatsimeersuarnerinullu aningaasartuuterpassuit atorunnaassapput. Naalagaaffeqarnikkut qanganisalerisut direktørerpassuatik, direktørinut tullersortit, allatsit allaffissornermillu ingerlatitsisut qanganngussapput. Siumukarnissaraluamullu akornutaasut tamarmik piissapput.

Eqqissineq ulluinnarni atuutissaaq, oqartussaassuseq ataasiussuseqartoq silarsuarmut tamarmut atuuttoq ullumikkut inuiaassutsimik pingaartitsineq tunngavigalugu avissaartuunnermut taarsiullugu atuutissammat. Sakkutuut, umiarsuit timmisartullu sorsuutit, sakkussiat imaluunniit sakkutuut naalagaat, sakkutuunilu atorfillit nunanik ataasiakkaanik illersuisussat pisariaarutissapput. Aamma kilitsissiaqarunnaassaaq. Silarsuarmut tamarmut naalakkersuisut naammalluinnartunik aqutsisullit ataanni sakkussianik nioqquteqartoqartassanngilaq, akuerisaasumik inerteqqutaasumilluunniit naami. Aamma killeqarfilerngusaattoqartarnavianngilaq. Inuit nunarsuarmiittut tamarmik tassaassapput qatanngutigiissuit avissaartitassaanngitsut. Taamaattumillu inuiaassutsimik pingaartitsineq peerutissaaq.

Naalakkersuisut naammalluinnartut naalakkersuinerat silarsuarmi inuiaqatigiinnut tamanut iluaqutissartarpassuaqassaaq. Niuertut pissaanillit, soorlu sakkussialiorfiutilissuit, sanaanik ulorianartunik iluanaarnartunik sanaartortuaannarumallutik politikerinik tatisisarnerat atorunnaassaaq. Politikkikkut immikkut soqutigisat siunnersortinit akuerineqartinniarsaralugit tatisiniartarneq atorsinnaajunnaassaaq. Ministereqarfilernguttoqartarunnaassaaq, imaluunniit akerleriit tamarmik immikkut anguniagallit pilersaarutinut iluaqutaanngitsunut inunnullu ikittuinnarnut iluaqutaasussanut aningaasarpassuarnik atuillutik suliniartut peerutissapput. Niuertorsuit namminissarsiorlutik mingutsitsinermik akiuiniarnermik unitsitsiniaasarunnaassapput. Suliniaqatigiiffiit pissaanillit uumasunik ulorianartorsiortinneqartunik illersuiniarnermik akornusiiniartarunnaassapput.

Ajornartorsiutit allat aaqqinneqartussat

Silarsuarmut naalakkersuisut naammalluinnartut taama ittut naapertuilluanngissutsimut akuersaartuunavianngillat. Inatsisinik unioqqutitsisut eqqortumik naapertuilluartumillu pineqarnissaat qulakkiissavaat. Taamaattumik innuttaasut toqutsisimasunik iperagaaqqaannartunik ersiuutiginnittarunnaassapput.

Qanormi pineqassappat nunarsuaq tamakkerlugu pinerlunniartartut aaqqissuussaasut ikiaroornartuerniartartullu pissaaneqaqisut? Silarsuarmut  naalakkersuisunit naammalluinnartunit ajugaaffigilluinnarneqassapput. Pinerlunnianut illersuutaasumik nunat assigiinngitsut akornanni inatsisitigut isumaqatigiissutit atorunnaassapput. Aaqqissuussamik pinerlunniartartut peqqusersuumik politikerinut attaveqarnerat inatsisinillu atornerluisarnerat qanganngussapput. Aap, pinerlunniartarnerup peerneqarnerinnaa nunarsuarmi ileqqorlunnerit allat piiarneqarnerannik kinguneqassaaq, soorlu hasarderneq, pinerlunniaqatigiikkuutaat aporaanneri, atuakkat filmillu kanngunartouliornermik imallit, atortittartuuneq anngiorlunilu nioqquteqartarneq tamarmik peerneqassapput. Ilumut, iluarsaanissaq sunniuteqarluartoq!

Aap, ajornartorsiuterpassuit paatsiveqanngitsut tamakku ullumikkut allaat ilisimatoorsuarnit aaqqinneqarsinnaanngitsut silarsuarmi nutaami aaqqilluinnarneqassapput. Erloqinartorsuit tamakku tamarmik peerluinnarneqassapput — ataavartussamik. Kinguaariit takkuttussat ajornartorsiutinik tamakkuninnga nalaanneqanngisaannassapput.

Takorluuinerinnaanngila?

’Kisianni,’ immaqa oqarumassaatit, ’isumaliutersuutaannaruna. Silarsuarmik nutaamik taamaattumik pilersitsisinnaajumalluni naalakkersuit naammalluinnartut suminngaanniit pissarsiarineqassagamik?’ Akissut tassa inuiaat Pinngortitsisaata tamanna isumagiumaarpaa! Upperissallugu ingasappallaarpa? Taava makku eqqarsaatigeriakkit: Illit pissaaneqartuuguit pissutsit ullumikkut nunarsuarmi naalliuutaasut tamaasa peersikkusussagaluarpigit? Aap, soorunami! Soormi taava upperissannginnerpiuk Pinngortitsisoq taamaaliorusussasoq?

Pinngortitsisuttalu siunertaraa silarsuarmik nutaamik pilersitsinissani silarsuarmut naalakkersuisut naapertuilluartut ikiortigalugit. Naalakkersuisut taakku Ernerata, Jesus Kristusip, atuutilernissaat qinnutigeqqullugu ilinniartissimavaatigut: ’Naalagaaffiit tikiulli; peqqusat qilammisut nunamissaaq pili.’ — Matîuse 6:10.

Naalagaaffik tamanna tassaavoq naalakkersuisut piviusut, silarsuarmut naalakkersuisut. Tassani kunngiusoq, Jesus Kristus, „immamit immap illuanut naalagaassaaq“. (Tussiaat 72:8) Naalakkersuisullu inunnit pilersitaasut tamaasa naalakkersuisunit taakkunannga erniinnaq taarserneqassapput, soorlu Guutip oqaasia Daniel 2:44-mi neriorsuuteqartoq: „Naalagaaffinnguit taakkua kunngii inuutillugit Guutip qilammiusup naalagaaffik [naalagaaffik Guutip kunnginngortitaanit, Jesus Kristusimit aqunneqartoq] qaqugumulluunniit atasussaq pilersikkumaarpaa, kingornalu inuiaat allat naalagaaffimmik pilersitsisinnaassanngillat. Guutip naalagaaffiata naalagaaffiit taakku tamaasa [maanna atuuttut] aserussavai sequmisillugit, namminerli soraajuitsumik atassaaq.“

Silarsuarmut naalakkersuisut taakku qilaap Guutianit ivertinneqartussaagamik inunnillu pissaaneqarnerusunik ilaasortaqartussaallutik ajunngitsorsiassanik tamanik nunamiut naalakkersuisuisa pilersissinnaasimanngisaannik pilersitsisinnaassapput. Guutip naalakkersuisuutitai taakku qilammiittutut Jesus Kristusimillu kunngeqartutut 144.000-inillu anersaajusunik ilaasortaqartutut Biibilimi eqqartorneqarput. Naalakkersueqataasut taakku tamarmik unneqqarissuupput, nunami inuugallaramik — tassa qilammi inuunermut makitinneqanngikkallaramik — isornaatsumik pissuseqarsimasut. Namminneq misilittakkatik tunngavigalugit inuit pisariaqartitaat nalunnginnamikkik inuiaat ajunnginnerpaamik sulissunnissaannut asseqanngitsumik periarfissaqassapput. — sarĸúmersitat 14:1-3.

Eqqarsaatigeriaruk tamanna qanoq ajornartorsiuterpassuit aaqqinneqarnerannik kinguneqassasoq. Qilammiit naalakkersuisut taakku toqujuitsuussagamik qasulinngisaannassapput toqunngisaannassallutillu. (1 Korintumiut 15:50, 53) Akilerlugit peqquserlutsinneqarsinnaassanngilaat imaluunniit najoqqutassiat naapertuilluartut sanioqqullugit assigiinngisitsisinneqarsinnaassanatik. Aammami anersaaq toqujuitsoq sunik akilerlugu peqquserlutsinneqarsinnaassagami? Aningaasanik, imigassanik akisuunik karsimut, nunamut kiattumut feeriarnermik, imaluunniit isiginnaartitsinermut pissanganartumut tusarnaartitsinersuarmulluunniit isissutissamik? Naamik, tamakku uinilimmut aalimmullu immaqa ussernartorsiortitsisinnaagaluarput, anersaatulli pinngortitamut toqujuitsumuunngitsoq. Taamaattumik naalakkersuisut  taakku naalakkersuineranni innuttaasut ullumikkutut atugarliortitaanavianngillat.

Silarsuaq nutaaq — illit nalerisimaarnissannut

Utoqqaavit? Taamaappat inuunerpit ingerlanerani ilisimalersimasatit, kakkaffigilersimasatit misigisimasatillu eqqarsaatigeriakkit. Naak ilorlikkut piginnaassutsinnik suli atuilluarsinnaasutut misigigaluarlutit qularnanngitsumik malugisimavat timikkut arriitsumik qularnaatsumilli sanngiilliartorlutit. Timit qangatut sukkatigisumik qisuariartarunnaarsimavoq. Nukitit ikiliartorput akiuussutissatillu milliartorlutik. Aamma isikujooraluttuinnarputit tutsarlussiartuinnarlutillu, nukittoorsuujunnaarputillu. Anniaatissatillu ikiliartunngillat.

Eqqarsaatigeriaruk ukiut ingerlaneranni misilittakkatit 20-nik ukiullip timaatut nukissaqartigisumik  timitassaqartissinnaasuugukkit! Aap, takorlooriaruk isumattulli eqiingatigisumik timissaqartuuguit, qanormitaava naammassisaqartigisinnaassagaluarpit. Timikkut nukissaqarluarlutit isumakkullu inerissimallutit suliaq aallartitat sunaluunniit nuannisaatigalugu naammassisinnaassagaluarpat. Taamaalillutit misilittagarilikkatit iluaqutigalugit qangarnit pitsaaneroqisumik suliaqarsinnaassaluarputit, soorunalumi nalerisimaarnermik suli annerusumik misigisaqarlutit. Ullumikkullu inuusuttuuguit takorlooriaruk qanoq nuannertigissagaluartoq inuusunninni nukitit pigiinnarsinnaasuugukkit tamannalu ilutigalugu ilisimasatit misilittakkatillu naassaanngitsumut alliartortittuarlugit.

Taama takorluuinerit ingerlatiinnariaruk, takorlooriarullu ilaquttatit, suleqatitit, ikinngutitit taamatorluinnaq ingerlasut. Assersuutigalugu sanaartornikkut  allatigulluunniit assassornikkut qanormitaava naammassisaqarsinnaatigissagaluarpisi! Aap, qalipaallaqqissunut, nipilersortartunut, ilusilersuisartunut, illussanik titartaasartunut, naatsiivilerisunut naasorsiuunullu siunissaq qanormitaava pissanganartoqartigissagaluarpa! Tupinnarluinnartunik suliaqarsinnaassagaluarput! Qalipakkat kusanaqisut, angerlarsimaffiit, naatsiiviit naatsiiviliarsuit alianaatsut, tamakkulu saniatigut immaqa nipilersuutit nutaat tamakkununngalu piginnaaneqarneq.

Silarsuarmut naalakkersuisut taakku ilaatigut siunertaraat inuiaat timikkut naammalluinnartunngortinnissaat. Inuup malugissutai tamarmik, ilaatigut tusaasinnaassusia isigisinnaassusialu, tamakkiisumik ingerlalissapput. Qanoq sivisutigisumik? Aap, ullumikkut naalakkersuisut akikitsumik suliaritinnissannik, ukiumi ataatsimi timivit ingerlaasiisa tamarmik 50 procentimik pitsanngornerannik kinguneqartussamik neqeroorfigigaluarpatsit ingerlaannaq akuersissanngikkaluarnerpit? Guutilli silarsuarmut naalakkersuisuutitassaasa nutaat akeqanngitsumik 100 procentimik inuusussarnissannik neqeroorfigaatsit. Peqqissarneq tamanna ukiumi ataasiinnarmi, tallimaannarni 50-iinnarniluunniit pinnani, naassaanngitsumilli sunniuteqassaaq.

Qularutissaanngilaq, pissutsit nuanningaartut tamakku nunarsuarmi maani inunnit misigineqarumaarput. Taamaattumik siunissap taama ittup upperiuminaatsinnera pissutigiinnarlugu tunuartitseqinak. Pilluaqqussutissalli Guutimut ikinngutaasut misigiumaagassaat quppernermi 25-miit 28-imut takutinneqartut maluginiaqqissaariakkit.

[Qupp. 25-28-mi assiliartat]

Pissutsit silarsuarmi nutaami atuuttussat

Nakuuserneq pinerlunniarnerlu asuussapput

„Guutiitsut piiagaassapput.“ — Ussatit 2:22.

Sorsunneq atorunnaassaaq

„Saffiussavaat panatik assallatserummut savissaliaralugit, qalugiusatillu saviliaralugit viinnequtilerissutit; inuiaat panamik imminnut silugutissaassapput, sakkunik atuinissamut sungiusarunnaassallutik.“ — Jesaja 2:4.

Tamarmik nerisassaqarluassapput

„Karrit naammangaartut nunami naasimassapput, qaqqat qaanni aalataarumaarput.“ — Tussiaat 72:16.

Tamarmik pitsaasumik angerlarsimaffeqassapput siunertaqarluartumillu suliaqassallutik

„Illuliorumaarput namminneq inigisassaminnik . . . Illuliussanngillat allamiut inissaannik ikkussuissanatillu takornartat nerisassaannik.“ — Jesaja 65:21, 22.

Inuit uumasullu akornanni eqqissineqassaaq

„Amaqqup najussavaa savaaraq, milakulaallu savaasaaraq aqupeqatigissavaa . . . nukappiarannguullu paariumaarpai.“ — Jesaja 11:6.

 Nappaatit, utoqqarpalussisarneq toqulu atorunnaassapput

’Qulliillu tamaasa isaannit allarterumaarpai, toqulu perunnaassavoq, aliasuttoqarunnaarlunilu nilliasoqarunnaarlunilu anniartoqarunnaassaaq, siulliit peermata.’ — sarĸúmersitat 21:4.

Toqungasut makititaassapput

’Ullut nalliukkumaarput, taava iliverniittut [Jesusip] nipaa tusarumaarpaat; anillutillu makissapput.’ — Juánase 5:28, 29.