Puaasamiinnerataluunniit oqaluussisarnera unitsissinnaanngilaa

Allaat inuuniarnerinnaq ilaannikkut sapiissusermik pisariaqartitsiffiusarpoq. Oqaluttuaq una taamatut sapiissuseqartariaqarsimasumik oqaluttuaavoq. Laurel Nisbetimik ateqarpoq.

LAUREL 1912-imi Los Angelesimi inunngorpoq, arnaasimavorlu eqiasuitsoq ilaquttaminik inuunermillu asannittoq. Uiminik meeqqanillu marlunnik isumaginninnera pissutsini nalinginnaasuni ajornanngitsuuvoq, 1948-mili inuunermik asanninnera paasiuminaassinnaasumik misilinneqarpoq. Katsorsarneqarsinnaanngitsumik poliovirusimik eqqorneqarpoq.

Ullualuit nualluttutut eriarluni nikissinnaajunnaarpoq. Uiata napparsimmaviliaappaa. Tassani poliomik eqqugaasimasorpassuit akornanniippoq. Napparsimmaviullu ulikkaartup torsuusarsuata naqqani puaasamik saviminermik  atorunnaartoqarnissaa utaqqisariaqaleramiuk sioorasorujussuanngorpoq. Anersaariarnerit tamarmik artornartorujussuupput. Puaasamillu atugassaqalerami tassunga ikineqarnini iluaallaatigeqaa. Anersaartorsinnaanngoqqippoq, anersaartorsinnaajunnaangajavissimagaluaramimi.

Puaasaq saviminiusoq sananeqarsimavoq poliomik eqqugaallutik sakissamik nukiinik nukillaarsimasunut. Utaqqiisaagallartumik atortussatut eqqarsaatigineqarsimagaluarpoq napparsimasup nukeqalernissaata nammineerlunilu anersaartorsinnaaleqqinnissaata tungaanut. Laurelimulli tupaallaataasumik silarsuullu annilaarutaanik anersaartuutit taakkua amerlasuunut ataavartumik angerlarsimaffinngorput. Laurel ukiut 37-t, puaasami nalalluni, inuusimasoq. Poliomik eqqugaasimasuni silarsuarmi sivisunerpaamik puaasamiilluni inuusimavoq.

Tamannaannaq pissutigalugu tusaamaneqalersimava? Naamerluinnaq. Laurel puaasammut ikineqarami arnaavoq inuusuttoq 30-t missaani ukiulik. Marlunnik perorsagassaminik meeraqarpoq uiveqarlunilu isumagisasssaminik. Aallaqqaammut isumatsangaarsimavoq. Ullorli ataaseq imminut naakkigereerluni aalajangersimavoq atugarisani ajunnginnerpaamik pissarsiffiginiarlugit. Uiata angerlaappaa, inuuninilu allanngortitilerpaa. Puaasaminngaaniit illumi suliassat aaqqissuunisssai ilikkarpai.

Takorlooriaruk puaasami saviminermiinneq qanoq innersoq. Anersaartuummit niaqua kisimi nuisavoq. Plasticimik qungasequt unngersarlu savimineq, qutuanut sukarussimatitsisoq, puaasaq ussissuutippaat. Puaasap ataani supoorutip puaasap iluani silaannaap naqitsinera allanngortittarpaa. Minuttimut 15-it missaani supoorutip puaasaq silaannaartarpaa. Taamaalilluni silaannaq sorlukkut qanikkulluunniit ilummoortarpoq, napparsimasup sakiaanik qaffatsitsisumik. Supoorut ilummooraangat silaannaq puaasamut ilummoortarpoq, sakiaanillu naqitsilluni napparsimasorlu silammut anersaartillugu. Taamaattumik qungasequt ussissuusariaqarpoq silaannaammi naqitsinerata allanngornerata puaasap saviminiusup pitsaasumik sulinera aalajangertarmagu. Laurelip niaqqi aalatissinnaavaa, allamilli naamik. Qungatsiminiit ammut tamaat nukillaavissimavoq. Tarrarsuut anersaartuutip qulaani nivingasoq taannalu tarrarsuummut iikkamut akianiittumut nivingasumut tarrarsortoq atorlugu avatangiisini malinnaaffigisinnaavai. Taamaallilluni matu silarleq qanillisullu tamaasa takusinnaavai.

Jehovamut nalunaajaasunngorpoq

Ullut ilaanni Del Kuringimit, Jehovamut nalunaajaasumit, pulaarneqarpoq. Laurelip inaanut isersimavoq Biibilillu sallusuissutaanik nuanningaartunik ilinniartilerlugu. Laurelip Guutip oqaasia ataqqivaa isummamillu uummammillu ammasumik tusaarnaarluni. Biibilimik atuaqqissaarneq aallartinneqarpoq, 1965-imilu imminut tunniulluinnarluni Jehovap nalunaajaasuinut ilaalerpoq. Maannalu suli inuunissamut pissutissaqalerpoq. Nuna pisuffigeqqilerumaarpaa Guutillu aallaqqaammut inunnut paratiisiliaa nuannaarutigisinnaassallugu! Nuannaangaarporlu panimmi Kayip upperisartaani aamma qinermagu.

Immaqa aperivutit: ’Qanoq ililluni kuisissinnaagami?’ Kuisissinnaanngilaq. Nammineerluni anersaartorsinnaannginnami imaanut morsutsinneqarsinnaanngilaq. Rigssaliliarsimanngisaannarpoq ataatsimeersuartunullu  ilaasimanngisaannarluni. Panini kuisittoq takunngilaa. Kristumiunilli innarluuteqanngitsunit amerlasuunit Jehovamut kiffartuussinerusimavoq.

Laurel tusagassamik nuannersumik oqaluussisuuvoq. Ukiut 37-t nikissinnaangiffigisami ingerlaneranni, inuit 17-it ilisimassummik eqqorluartumik Biibilimeersumik ilinniartissinnaasimavai. Qanoq ililluni? Soorunami oqaluussisartut amerlanerit immikkut pisinnaaffigisaattulli illumiit illumut angalaarsinnaanngilaq. Niviarsianulli oqaluussisinnaasimavoq, uangalu taakku ilagisimavaannga.

1972-imi peqqinissamut ikiortitut ilinniartuuvunga Laurelimullu ikiortitut sulisarlunga. Suliakka naammassereeraangakkit Laurelilu oqaloqatigiinnissatsinnut immitsinnullu ilisarisimalernissatsinnut piffissaqartarpugut. Ullut ilaanni oqarpoq: „Atuffassinnaasuugummatoq.“ Piumavunga, atuagarlu mikisoq sagdlusuíssut inûnigssamut nâgssáungitsumut sangmissoĸ-mik atilik tigoqquaa. Suminngaaniit aallartissanerlunga aperivara, akiinnarpoq: „Kapitali 1-imit aallaartiinnarit.“ Taamaalilluni Biibilimik atuaqqissaartarneq aallarnerneqarpoq, uangalu tunniulluinnarsimasutut Jehovamut kiffanngorpunga.

Illup saqqaani igalaarsuakkut Laurelip anersaartuutaa takuneqarsinnaavoq. Aqqusinermi angallaffioqisumi La Crescentami najugaqarpoq, sanioqquttullu tamarmik anersaartuuta takusinnaavaat. Sanioqquttut naakkinnittaqaat alapernaattaqalutillu, takornartanillu pulaarneqartaqaaq. Inunnik naapitsinissani nuannarisaqaa taamaalillunilu ikinngutitaartoqaluni oqaluussiffigisakkaminik. Nakimaalluni oqaluussinera siunissamillu neriuutaa pulaartut killitsissutigisaqaat, Jehovallu aqqa nalunaajaatigilluartarpaa.

Laurel sinnakeqaaq. Uagutsitulli qasusinnaangilaq, aalasinnaannginnami. Supoorutip nipaata anersaartuutillu ataani aalajuarnerata eqqumatittarpaa. Sulerisarpami? Ataatani qilammiusoq oqaluuttarpaa, eqqarsaatini ilorliit qinnutimini ilumoortuni anittarpai. Qularutiginngilara nukissaminik naammagittarnermillu qinusartoq, qatanngutinili kristumiut eqqarsaataaniikkajunnerupput. Misiginneqataalluartuusarpoq ullullu tamaasa Jehova pilluaqqussutaanik qutsavigisarlugu.

Jehovap Nalunaajaasuisa angalalluni nakkutilliisui tikikkaangamik Laurel pulaartuaannarpaat. Angutit taakku ilarpassui pulaareerlugu oqartarput namminneq nakussatsinneqarsimallutik! Pissusia pisuuvoq. Isumalluartuujuaannarpoq nuannaartuujuaannarlunilu sallusuissumillu nalunaajaasinnaanini eqqumaffigiuaannarlugu.

Misilinneqartuarsimavoq — taagusallugit amerlavalaartunik. Ataatsimik tuaviortumik inalugaaqqaminik pilatsittussanngorpoq biilinillu napparsimmaviliaassisussamik aaneqarpoq. Inalugaaraalu qaarsimammat biilinut ikinasuarneqarpoq napparsimaviliaanneqarlunilu, nakorsamillu pilanneqarpoq ilisimajunnaarteqqaarnagu. 1950-ikkunnimi napparsimasut puaasamiittut qanoq ilillugit ilisimajunnaartinnissaat ilisimaneqannginnami.

Pilatsinnerpassuit — aattaqanngitsumilli

Kræftimik ataavartunillu amikkut nappaateqarpoq, annertuunillu pilatsittariaqartarluni. Ungillerileraangami kumikkusukkaluarluni ilungersortaqaaq niviarsiamullu kumitsittariaqartarluni. Timaani tamarmi nukii nukillaarsimagaluartut sianiutai ajunngillat. Tamanna iluaqutigaa, taamaannerata nalaannarnerminit  ikeqalernissaralua pinngitsoortittarpaa. Amimi paarilluaqqissaarnissaa nakkutigeqqissaarpaa. Sapaatip akunneranut ataasiarluni uffarneqaleraangat sisamaallugu illuanut saatittarpaat. Laurelip uffalerneq misilinneqangaarnertut misigisarpaa, inuunerminili allatulli atorluartarpaa.

Laurelip ilaginera aliikkutaalluartarpoq nuannersuullunilu naak taammanniarnini ajornakusoortittaraluaraa. Qungasequtaa kaajallatsikkaangatsigu sapaatip akunnera suli atasinnaaniassammat, ussissunngortinniarlugu passukkaangatsigu, oqaatsini illugalugit akuersiinnartarpoq: „Ah, Diaavulup piliarsua!“ Aap, Laurelip nalunngilaa naalliungaarnerminut kina pisuunersoq. Satan — pileqqaarnerani inuit siulliit Jehovamut tunutikkamigit taamaalillunilu inuiaat ajorteqalersillugit, nappaateqalersillugit toqusussanngortillugillu.

Laurel timikkut nukillaarsimagaluarpoq, anersaakkulli taamaanngilaq. Periarfissarisinnaasani tamaasa atorluartarpai paratiisimik neriuutigisaminik inuit oqaluttuullugit. Inuunermilluunniit naggataani tuaviortumik pilatsittussanngorami, naapertuilluassuseq sorsuutigaa. 1985-imi tamanna pivoq, Laurel 72-inik ukioqartoq. Pilatsiffissa nallilermat nakorsap iserfigaa oqarlunilu aattaqanngitsumik pilassinnaanagu. Nukillaanganermik oqalussinnaangingajammat paniata Kayip nassuiarpaa aammik ingalassimanninniarluni aalajangiussisimanera. Toqqusaavanut slangilersorneqarsimavoq isussuinnarsinnaallunilu. Timaa tamarmi ajortissimavoq erlaviisa suliunnaarsimaneri pisuullutik toqungasutullu isikkoqalersimavoq.

Nakorsarli oqarpoq Laurelimit namminermit tusaajumallugu. Isussuffigaarput: „Laurel, aak pillugu nakorsaq nammineerlutit oqarfigisariaqarpat.“ Tupaallaatigisannik ueriataarpoq nipituumillu ersarissumillu aak pillugu aalajangersimanini pillugu nakorsaq oqaluttuullugu. Allassimaffinnik issuaavoq nassuiaallunilu Jehovap nalunaajaasui aalersortikkaluarunik Guutimut ajotuliartutut misigissasut. Tulliullugit oqaaserisai puigunngissaanarpakka. „Nakorsaq! Inuunera annaakkukku iterumalu paasigukku kanngunartuliorfigisimagimma, toqunissara kissatigissavara, suliallu asuliinnassaaq.“ Tamatuma kingorna nakorsap nalorniseriunnaarpaa ilumut aalajangiussisimasoq nukittuneralu tupaallatigeqaa kissaatigisaalu malikkumallugu.

Laurel akunnerit sisamat ilaatigut iluatsittumik pilatsippoq. Pilatsereermat ukiut 37-t ingerlaneranni siullerpaamik nakorsat puaasaminngaaniit siniffimmut nuuppaat. Anersaartuummut nutaaliaasumik trakeostomi (toqqusaap ataaniitup qinersip ataatungaatigut torlua ammarlugu) atorlugu atortulerpaat. Annilaangassutiginerpaasaa, anersaartuutip nutaaliap toqqusaavanut trakealtubemik atassuserneqarnerata oqalussinnaajunnaartippaa. Silaannarmik amigaateqarluni misigigami paatsiveeruppoq. Ullut pingasut qaangiuttut, augustusip 17-ianni 1985, pilatsinnermi kingunipiloqarnera toqqutigaa.

Ilisimajunnaartinnani uannut oqaaserisai kingulliit — oqaaserisimasaanit kingullersaagunartut — eqqaamavakka. Oqarpoq: „Chris, qimanngisaannannga.“ Pissutsit aaqqissuussaanerat maannakkut atuuttup atorunaarsinneqarnissaa makititaaffissarlu qilanaareqaakka, takorloortarpara ikinngutima Laurel Nisbetip pakkunnissaa oqarnissaralu: „Maaniippunga. Qimanngissaannarpakkit.“ — Oqaluttuartoq Christine Tabery. (gD 22/1 93)