Paasinerluinerit nalinginnaasut

Paasinerluineq: Meeqqanik atornerluisartut tassaagajupput takornartat sianiilluanngitsut meeqqanik aallarussisartut nakuuserlutik atornerlunniarlugit.

Amerlanerpaartaatigut — pisimasut 85-90 procentiini — atornerluisoq tassaavoq meeqqap nalunngisaa tatigisaalu. Nakuusernatik atornerluisut meeqqat arriitsumik atoqatigiinnissamut kajumissaartarpaat, meeqqat killilimmik misilittagaqarnerat eqqarsarsinnaanerallu iluaqutigalugit. (Naleqqiukkit 1 Korintumiut 13:11 aamma Ussatit 22:15.) Atornerluisut taakku tassaanngillat eqqumiikujuut inunnik allanik peqateqarnianngitsut. Ilaat upperisarsiortuupput, ataqqisaallutik iluarisaallutillu. USA-mi FBI naapertorlugu „isumaqartoqassanngilaq inuk atornerluisuusinnaanngitsoq taanna inussiarnerami, naalagiartarami, sulilluartarami, uumasunik nuannarisaqarami ilaallu ilanngullugit“. Misissuinerillu nutaanerusut malillugit isumaqartoqassanngilaq atornerluisut tamarmik angutaasut atornerlugaasullu tamarmik arnaasut.

Paasinerluineq: Meeqqat atornerluineq pillugu takorluuisarput salluliorlutillu.

Amerlanertigut meeqqat atoqatigiinneq pillugu misigisaqannginnamik atornerluineq pillugu sukumiisumik salluliorneq saperput, meeqqallu minnerusut annikitsualuit pillugit paatsiveerussinnaapput. Allaat misissuisartut qulakujunnerusut akueraat atornerluinermik oqaluttuat amerlanersaat ilumoortut. Atuakkami Sex Abuse Hysteria — Salem Witch Trials Revisited-imi atornerluinermik oqaluttuat eqqunngitsut sammineqarput. * Taamaattoq atuakkami manna miserratigineqanngilaq: „Meeqqanik atornerluineq piviusuuvoq atugaangaarlunilu tamatuminngalu oqaluttuat amerlanerpaartaat (immaqa 95 procentii sinnerlugit) . . . ilumoorput. Meeqqat atornerluisimaneq oqaluttuarissallugu artorsaatigingaartarpaat. Tamanna pillugu sallugaluarunik taamaaliortarput ilumut pisimanera akueriumanagu.

Paasinerluineq: Meeqqat ajuutiginarput ilaannikkullu namminneq atornerluinermut pisuusarlutik.

Tamanna eqqunngivippoq, atornerlugaasoq pisuutinneqarmat. Meeqqat atoqatigiinnermik paasisimasaqanngillat. Naluaat iliuutsit tamakku sunik nassataqarnersut qanorlu taamaaliornikkut allanngortinneqarumaarlutik. Taamaattumik tunngaveqarluartumik isumaqarfigisinnaanngilaat. Atornerluisoq, taannalu kisimi, pisuuvoq. — Naleqqiuguk Lúkarse 11:11, 12.

Paasinerluineq: Meeqqat atornerluisimasoqarneq oqaluttuarippassuk, angajoqqaat ilinniartissavaat tamanna pillugu oqaloqqunagit puigoqqullugulu.

Meeraq tamanna pillugu nipangiussippat kia iluaqutigissavaa? Atornerluisup, ilaa? Misissuinerit takutissimavaat akuerinnikkumannginneq misissutsikkullu tunuartitsineq tassaasut tarnikkut ajoqusigaanermik ajorunnaarsitsiniaanermut iluaqutaannginnerpaaq. Tuluit Nunaanni atornerlugaasimasut inersimasut ajorunnaarsitseriaatsit qulingiluat assigiinngitsut misilimmatigik, paasinarsivoq tamatuminnga miserratiginnittut eqqartuiumanngitsullu inersimasutut misigissutsikkut ajornartorsiuteqarneroqisut. Illit annilaanganartumik ajoquserneqarsimaguit kissaatigissagaluarpat tamatuminnga nipangiusseqqusaanissat? Meeraq pinerluttuliornermut tamatumunnga pissusissamisoortumik qisuariarsinnaaguni, aliasulluni, kamalluni ajuallallunilu, ajorunnaarnissaminut periarfissaqarluassaaq.

[Quppernerup ataani ilanngussaq]