Meeqqat atornerlugaappat

ATORNERLUISARNEQ unitsinneqassappat malugineqartariaqarpoq. Tamanna pillugu atuagarpassuarni ilisarnaatit erseqqissut assigiinngitsorpassuit angajoqqaat eqqumaffigisinnaasaat eqqartorneqarput. Ilaatigut imaapput: meeraq quinermi anarnermilu anniaateqarpat, kinguaassiuutini tunillatsinneq imaluunniit amiiakalatserneq ikeqalernerlu, siniffimmi quisalerneq, neriumannginneq nerivallaarnerlu, piaarpallaartumik atoqatigiinnermik soqutigisaqalerneq, sumiiffinnik aalajangersimasunik — soorlu atuarfimmik imaluunniit angerlarsimaffiup ilaanik — ersigisaqalerneq, sinnattupiluit, annilaanganeq, atisaajarnissamik ersigisaqalerneq, nalunngisamik aalajangersimasumik ersigisaqalerneq imminullu aqqunartiterneq.

Kisianni nukingerpallaartumik isummernissat mianersuutigissavat. Ilisarnaatit eqqartorneqartut tamatigut isumaqartariaqanngillat meeraq ilumut atornerlugaasimasoq. Tamarmik ajornartorsiutinut allanut ilisarnaataasinnaapput. Meeqqamili malunnaatit isumakulunnartut takugukkit inussiarnersumik atornerluisarneq eqqartulersinnaavat, immaqa ima oqarsinnaallutit: „Kialuunniit nuanniitsumik misigitillutit attorpatit, nalussanngilat uannut oqaluttuarisinnaallugu sapinngisannillu illersorniassavakkit. Tamatuminnga misigisimasaqarnikuuit?“ — Ussatit 20:5.

Meeqqavit atornerlugaasimanini miserratiginngippagu qularnanngitsumik tupassaqaatit. Eqqaamajulli: Qanoq qisuariarnerit meeqqappit ajorunnaarnissaanut pingaaruteqassaqaaq. Meeqqat erloqinartorsiuteqarsimaqaaq illillu pisariaqartippaatit inersimasuugavit erloqinartoq tamanna nammanniassagakku. Meeqqat nersoruk sapiilluni pisimasoq oqaluttuarisimammagu. Neriorsoqqissaaruk sapinngisamik illersussallugu. Arlaleriaqalutillu oqaluttuutissavat atornerluisoq pisuusoq, meeqqat pisuunngitsoq; meeqqat „ajortuunngitsoq“; asagit.

Taava pingaartumik aalajangigassaqarputit. Inatsisinik ilisimatuut ilaasa pitsaanerutippaat pisimasup ingerlaannaq politiinut nalunaarutigineqarnissaa. Nunat ilaanni eqqartuussisut taama piumasaqarput. Nunani allani atornerluisup eqqartuunneqarnissaanut periarfissaqarpallaanngilaq.

Taavami atornerluisoq tassaappat aappat asasat? Ajoraluartumik nuliaasut amerlasuut iliuuseqanngitsoortarput. Soorunami meeqqanik atornerluisumik aappaqaraanni akueriuminaatsorujussuussaaq. Misigissutsikkut aningaasatigullu atassuteqarneq sakkortuusinnaavoq. Nuliaasup immaqa paasivaa iliuuseqaruni uiata ilaquttani, suliffini ataqqisaassutsilu katassinnaagai. * Kisianni siaruartikkat naapertorlugit katersuisariaqarpoq. (Galâsiamiut 6:7) Meeqqallu pisuunngitsut amerlanerungaartunik annaasaqarsinnaapput upperineqanngikkunik illersorneqanngikkunillu. Siunissaat ulorianartorsiorpoq. Taakku inersimasutut nukeqanngillat. Tarnikkut ajoqusigaanerup inuunerata sinnera ilusilersorsinnaavaa. Taakku naakkinnittuliorfigineqartariaqarput. — Naleqqiuguk 1 Moses 33:13, 14.

Taamaattumik angajoqqaat sapinngisamik meeqqatik illersortariaqarpaat! Angajoqqaat amerlasuut akisussaassuseqarluartut meeqqamut atornerlugaasumut ilinniarsimasunik ikiortissarsiortarput. Soorlu nakorsaliaraangavit paasiniaruk ikiuisussap upperisarsiornikkut isumat ataqqiumaneraa. * Angajoqqaatut asajuarlugu meeqqat ikioruk imminut ataqqinnera ajoquserneqartoq iluarsaqqullugu.

[Quppernerup ataani ilanngussat]