Qanoq ililluta meeqqavut illersorsinnaavavut?

„Oqaluttuassanngilat. Uagut kisitta nalussanngilarput.“

„Kialuunniit upperinavianngilaatit.“

„Oqaluttuarigaluarukku angajoqqaavit uumissulissavaatsit. Nalussanngilaat illit pisuusutit.“

„Ikinngutigiunnaarusukkamma?“

„Parnaarunneqarnissara kissaatiginngilat, ilaa?“

„Oqaluttuarigaluarukku angajoqqaatit toqussavakka.“

PISSUSISSAMISUUNNGITSUMIK kanngunartuliorusunnertik naammassiniarlugu meeqqat atoreersimallugit toqqissisimanerannik ilerasuuteqannginnerannillu piiaaffigereersimallugit, meeqqanik atornerluisut suli pinerluffigisaminnit kissaateqartarput — tassa NIPANGIUSSINISSAAT. Tamanna anguniarlugu kanngusutsitsineq, isertuisitsineq, allaat sioorasaarutit atortarpaat. Taamaalillutik meeqqat atornerluinermut sakkugisinnaasaminnik pitsaanerpaamik — inersimasumut illersorneqarnissamik qinnuigalugu oqaluttuarnissaminnik — piiaaffigineqartarput.

Ajoraluaqisumik inersimasut ilaannikkut nalullugu meeqqanik atornerluisartut ikiortarpaat. Qanoq ilillutik? Navianaat tamanna mianersuutiginnginnamikku, tamanna pillugu nipangiussiniartaramik eqqunngitsunillu paasissutissiinerit upperiniartaramikkik. Sumiginnaaneq, kukkusumik paasitinneqarneq nipangiussimanerlu atornerluisut, atornerlugaasut pinnatik, iluaqutigisarpaat.

Assersuutigalugu, Canadami biskorpit katuuliusut kattuffiat ungasinngitsukkut isummerput „nipangiussinissamik isumaqatigiissut“ pissutigalugu palasit katuuliusut ilaasa ukiuni qulilinni arlalinni meeqqanik atornerluisinnaasimasut. Atuagassiami Time-mi meeqqanik atornerluineq atugaangaartoq allaaserineqarmat eqqartorneqarpoq „nipangiussinissamik isumaqatigiissut“-ip ilaqutariinni „alianartuliornerit ataavartittarai“.

Taamaattoq Time-p eqqaavaa isumaqatigiissut  tamanna kiisami ajalulersoq. Suna pissutigalugu? Oqaaseq ataaseq atuinnassagaanni, ilinniartitsineq. Atuagassiami Asiaweek-imi ima allassimasoqarpoq: „Ilisimasakkaat tamarmik isumaqatigiissutigaat meeqqanik atornerluinermut illersuutissaq pitsaanerpaaq tassaasoq inuiaqatigiit eqiinganerat.“ Meeqqatik illersorniarlugit angajoqqaat navianaatip piviussusia paasisariaqarpaat. Paasinerluinerit atornerluisut illersuutigisaat ilisimaniakkit. — Takuuk qupperneq 6-imi ungalusaq.

Meeqqat ilinniartiguk!

Kunngip silatuup Salomonip ernini oqaluttuussimavaa ilisimassutip, ilisimasaqarnerup isumatusaarnerullu ’inunnit eqqunngitsumik mumingasumillu oqaluttunit’ annaassinnaagaa. (Ussatit 2:10-12) Tamanna tassaannginnerpa meeqqat pisariaqartitaat? Naqitaaqqami Child Molesters: A Behavioral Analysis-imi FBI-meersumi qulequttap „Atornerlugassaqqissoq“-ip ataani ima allassimavoq: „Meeqqat amerlanersaannut atoqatigiinneq tassaavoq eqqartorneqartussaanngitsoq, tamannalu pillugu iluamik paasitinneqarneq ajorput, ingammik angajoqqaaminnit.“ Illit meeqqatit tassaassanngillat ’atornerlugassaqqissut’! Atoqatigiinneq pillugu ajoqersukkit. * Assersuutigalugu,  meeqqat tamarmik inersimalilertinnatik paasisariaqarpaat timertik qanoq allanngorumaarnersoq. Tamanna sumiginnarneqarpat paatsiveerutissapput, kanngusussallutik — aamma pisariuminassallutik.

Meeraatilluni Janet (ativiginngisaa) kinguaassiuutitigut atornerlugaasimavoq, ukiullu arlallit tamatuma kingorna nammineq meerai marluk aamma atornerlugaasimapput. Ima oqaluttuarpoq: „Perorsaanitsinni atoqatigiinneq eqqartorneqanngisaannarpoq. Taamaattumik alliartortillunga kanngusuutigisarpara. Namminerlu meeraqalerama suli taamaappoq. Inuit allat qitornaannut eqqartorsinnaavara, qitornannulli naamik. Maannakkut taamaaliorneq ajoqutaasoraara, meeqqammi pisariuminassapput tamakkuninnga oqaluttuunneqanngikkunik.“

Atornerluinissamik pitsaaliineq piaartumik ilinniarneqarsinnaavoq. Meeqqatit timip ilaasa atiinik, soorlu utsuit, iviangit, iteq usullu, ilinniartikkukkit oqaluttuutissavatit taakku ajunngitsut, immikkut ittuusut — kisianni namminerisassaasut. Inuit allat iliorfigissanngilaat — aamma anaanap ataatallu iliorfigissanngilaat — aammalu nakorsap iliorfigissanngilai anaanap ataatalluunniit tassaniinngippata imaluunniit akuerisimallugu. * Ajunnginnerussaaq angajoqqaat marluullutik imaluunniit meeqqamik akisussaaffillit tamarmik taama oqarpata.

Atuakkami The Safe Child Book-mi Sherryll Kraizerip eqqartorpaa massa meeqqat atornerluiniartoq nangaasumik itigartiinnarnagu nilliaffigisariaqaraluaraat imaluunniit qimaasariaqaraluartut taamaattoq meeqqat atornerlugaasimasorpassuit kingornatigut nassuiaasartut sorraatsutut iliornissartik kissaatigisimanagu. Taamaattumik meeqqat paasisariaqarpaat inersimasut ilaat ajortuliortartut allaallu meeqqat kinaluunniit eqqunngitsuliortitsiniartoq naalassanngikkaat. Taamaattoqaraangat meeraq akuersiumasariaqanngilaq, soorluttaaq Daniel ikinngutaalu naaggaarsimasut Babylonimiut inersimasut nerisassanik juutit upperisaat malillugu minguttuusunik nereqqummatik. — Daniel 1:4, 8; 3:16-18.

Ilinniartitseriaatsit pitsaasutut isigineqartut ilaat tassaavoq „Ima pisoqarpat . . .“ pinguarneq. Assersuutigalugu ima aperisinnaavutit: „Ilinniartitsisuit meeraq alla unataqqullugu qinnuigigaluarpatit, qanoq iliussavit?“ Imaluunniit: „(Anaanap, ataatap, palasip, politiip) illup qaliata qaavanit nakkaqquppatit qanoq iliussavit?“ Immaqa meeqqat tamatumunnga akissutaa naammassanngikkaluarpoq imaluunniit eqqornani, ingasattumilli qisuariassanngilatit. Taama pinnguarneq sioorasaarutinik ilaqartariaqanngilaq; tassami ilisimatuut naapertorlugit inussiarnersumik, asannipaluttumik nuannersumillu pinguarneqartariaqarpoq.

Taava meeqqat ilinniartariaqarput asanninnermik ersiutit naleqqutinngitsut imaluunniit nuanninngissorisatik itigarteqqullugit. Ima aperisinnaavatit: „Anaanap ataatalluunniit ikinngutigisaasa ilaata kunikkusuppatit eqqumiitsumillu misigitillutit qanoq iliussavit?“ * Amerlanertigut pitsaanerussaaq meeraq kajumissaassallugu qanoq  iliornissaminik takutitseqqullugu, „tassamigooq“-mik pinnguaqqullugu.

Meeqqat aamma taamaalillutik atornerluiumasut periaasii allat assortussallugit ilinniarsinnaapput. Assersuutigalugu ima aperisinnaavutit: „Ima oqarfigineqaruit, ’Nalunngilat, nuannarinerpaasarigikkit. Kissaatiginngiliuk ikinngutigissagikkit?’“ Meeqqap tamakku akerlilernissaat ilikkarpagit, allat sammineqarsinnaapput. Ima aperisinnaavutit: „Ima oqartoqarpat, ’Misigissutsikkut annersikkusuppinga?’ qanoq oqassagaluarpit?“ Meeraq takutiguk qanoq ililluni oqaatsikkut timikkullu aalajangersimavilluni naaggaarsinnaasoq. Eqqaamassavat, atornerluisut amerlanertigut arriitsumik qanilliniarnerit atorlugit meeqqat misilittaraat. Taamaattumik meeraq ilinniartariaqarpoq naaggaavissinnaallugu ima oqarluni: „Oqaatigissavakkit.“

Peqqissaartumik ilinniartitsigit

Tamakku pillugit ataasiaannarnak meeqqatit oqaluttuuttassavatit. Meeqqat uteqqiittarneq pisariaqartippaat. Naliliisinnaassutsit atorlugu paasiniaruk qanoq annertutigisumik tamakku uteqqinneqartariaqartut. Peqqissaarniarit.

Assersuutigalugu, atornerluisup isertortukkut isumaqatigiissuteqalernissaa sioqqullugu iliuuseqartariaqarputit. Meeqqat paasisariaqarpaat inersimasup allap angajoqqaaminnut isertuusseqqusinera sunaluunniit eqqortuliornerunngitsoq. Paasitinniakkit tamatigut oqaluttuartariaqarlutik — allaat nipangiussinissartik neriorsuutigisimagaluarlugu. (Naleqqiuguk 4 Moses 30:12, 16.) Atornerluisut ilaasa nalunngikkaluaramikku meeraq arlaannik naalanngissimasoq tamanna nakkaannartitsissutissatut atortarpaat. „Oqaatiginngikkumma oqaatigissanngilakkit,“ taama oqarput. Meeqqat paasisariaqarpaat oqaluttuaraluarunik ajornartorsiulernaviaratik. Oqaluttuarneq navianaateqanngilaq.

Ilinniartitsinerpit aamma meeqqat ikiussavaat sioorasaarutit akiorsinnaaqqullugit. Atornerluisut ilaasa uumasut piaraat meeqqat isigitillugit toqussimavaat sioorasaarlugit angajoqqaavisattaaq toqukkumaaraat. Allat atornerluffigisatik sioorasaartarpaat qatanngutaat minnerusut atornerlussallugittaaq. Taamaattumik meeqqat paasisariaqarpaat sioorasaarutit suugaluarpataluunniit atornerluisoq tamatigut oqaatigisassallugu.

Tamatumani Biibili iluaqutaasorujussuusinnaavoq. Tassani Jehovap ajugaqanngitsup pissaanera erseqqissarneqarmat atornerluisut sioorasaarutaat sakkukillisinneqartarput. Meeqqat paasisariaqarpaat sioorasaarutit qanoq ikkaluartulluunniit Jehovap innuttani ikiorsinnaagai. (Daniel 3:8-30) Allaat Jehovap asasai inupilunnit ajoquserneqarpata, Taassuma ajoqusiineq iluarsarluinnarsinnaavaa. (Job, kapitali 1, 2; 42:10-17; Jesaja 65:17) Paasitinniakkit Jehovap suut tamaasa isigigai,  inuit ajortuliortartut aammalu inuit sapinngisamik taakkununnga akiuisut. — Naleqqiuguk Eprîarit 4:13.

Pulateriaarsuttut silassorisut

Atornerluisut ikittuinnaat nakuusertarput meeqqat atoqatiginiarlugit. Amerlanertigut meeqqat ikinngutiginiartarpaat. Taamaattumik Jesusip kajumissaarmatigut „pulateriaarsuttut silassoreqqulluta’ tulluartuuvoq. (Matîuse 10:16) Angajoqqaat asannittut nakkutilliilluarnerat tassaavoq atornerlunneqarnissamut illersuutissaq pitsaanerpaaq. Atornerluisut ilaasa meeqqat kisimiitillugit ornittarpaat oqaloqatigalugit alapernaatsinniarlugit. („Snescooterit nuannaaraagit?“ „Qimmiaraatikka takorusuppigit?“) Soorunami meeqqatit tamatigut ilagisinnaanngilatit. Meeqqanillu ilisimatuut meeqqat ilaatigut kiffaanngissuseqarnerat pingaaruteqartippaat. Kisianni angajoqqaat silatusaartut meeqqatik piaarpallaartumik kiffaanngissuseqalernissaat eqqarsaatigalugu mianersortarput.

Taamaattumik inersimasut inuusuttullu tamaasa meeqqannut qanittartut ilisarilluartariaqarpatit,  ingammik peqannginninni meeqqannik paarsisussat kikkuunerat mianersuullugu. Paarsisut ilaasa meeqqatit eqqumiitsumik misigitippatigik imaluunniit meeqqavit naammaginngisaat eqqumaffiginiakkit. Aammalu inuusuttuaqqat namminneq ukioqatiminnik ikinnguteqanngitsut meeraaqqanik soqutigisaqarniarpallaartut eqqumaffigissavatit. Paasiniaruk meeqqerivik atuarfillu qanoq ittuunersut. Pulaartakkit tassanilu sulisut oqaloqatigalugit, malugalugu meeqqat qanoq iliorfigineqartartut. Piffissani ilimaginngisani aggertarsinnaanngikkuit meeqqat allanut nuutsiguk.

Ajoraluartumilli angajoqqaat peqqissaarnerpaasut allaat meeqqamik misigisaat tamaasa nakkutigisinnaanngilaat. — Nalunaajaasup oqaasii 9:11.

Angajoqqaalli suleqatigiikkunik manna nakkutigisinnaavaat: angerlarsimaffik. Meeqqanillu atornerlunneqarnerit amerlanersaat angerlarsimaffinni pisarmata tamanna ilanngutassiami tulliuttumi sammineqassaaq. (gD 8/10 93)

[Quppernerup ataani ilanngussat]

[Qupp. 7-mi ungalusaq]

Suaartarluni ikiortissarsiorsimavoq

„Jehovamut ikioqqunerup atornerluiumasup inuusuttumut saassussiniarnerigalua unitsippaa,“ USA-mi aviisimi The Arizona Republic-imi maajip 5-ani 1993 taama qulequtaqarpoq. Atornerluiniarnerarneqartup aallaat atorlugu nukappiaraq 13-inik ukiulik tigullugu iniminut aallaruppaa. Inuusuttoq ima suaarmat: „Jehova, ikiunnga!“ atornerluisup ersingaalerluni nukappiaraq iperarpaa. Kingorna politiit angut tigusaraat.

Taamaattoqarnerani Jehovap aqqanik torlulaffiginninneq naleqqulluartuuvoq, imali isumaqartariaqanngilaq maanna ’ulluni kingullerni’ nalorninartuni Guutip kiffai ajoquserneqarnavianngitsut. (2 Timûtiuse 3:1-5, 13) Taamaattumik angajoqqaat kristumiuusut meeqqatik ilinniartittariaqarpaat nalusaannut tamanut, naak oqaasisaqarpasikkaluartut, mianersuutigeqqullugit.

[Qupp. 8-mi assiliartaq]

Meeqqat ilinniartikkit qanilliniarnerit eqqunngitsut oqaatsikkut timmikkullu assortoqqullugit