Kiserliorneq — Ajugaaffigissallugu aalajangiusimaviuk?

KISERLIORPIT? Katissimagaluaraanni aappaqanngitsuugaluaraanniluunniit, angutaagaluaraanni arnaagaluaraanniluunniit, inuusuttuugaluaraanni utoqqaagaluaraanniluunniit inuunermi arlaatigut pissusissamisoortumik kiserliortutut misigiffissaqartarpoq. Kisimiinnerullu tamatigut assigisariaqanngilaa kiserliorneq. Paasiniaasartoq kisimiilluni misissueqqissaartoq kiserliortutut misigineq ajorpoq. Eqqumiitsuliortoq assilialiorluni qalipaasoq kiserliornissaminut piffissaqanngilaq. Aap, piffissat kisimiiffitik nuannaarutigisarpaat, kisimiinnerlu  taakkununnga ikinngutitut asanartutut ippoq.

Kiserliortutulli misigineq piviusoq qallikkut sunnertinnermit pinnani ilukkut misigissusiuvoq. Kiserliornerli pisunit nikallornartunit pilersinnaavoq — toqusoornermit, avinnermit, suliffissaarunnermit alianartunillu allanit. Isumalluartumik isumaqarnerup kiserliorneq millisissinnaavaa allaallu immaqa katatsikkiartuaarsinnaallugu, annaasaqarnerullu aliasuutigisap akuerinissaa ilikkarneqassalluni.

Misigissutsit eqqarsaatinit pilerfeqarput. Maqaasineq anigoraanni, misigissutsillu tamatuma pilersissimasai sakkukillippata, inuunermi ingerlaqqinniarluni eqqarsaatit ineriartornartut sallinngortinniartariaqarput.

Imminut tinnersarit. Inuunerit aquguk. Pitsaasunik naammassiniagassaqarpoq. Avammut sammisuuniarit. Arlaannut sianerit. Arlaannut allagit. Atuakkamik atuarit. Qaaqqusisarit. Ineriartornartunik oqaloqateqartarit. Ikinnguteqalerumaguit ilassiortuusariaqarputit. Qamuuna eqqarsaatitit misissukkit allanut saqqummiussinnaaniassagakkit. Annikitsunnguakkuutaanik ajunngitsuliortarit. Anersaakkut tuppallernartunik tunioraasarit. Taava Jesusip oqaasiisa ilumuussusiat misigilissavat: ’Tunisineq tigusinermit pilluarnarneruvoq.’ (apustilit suliait 20:35) Aamma paasilissavat ussat manna aamma ilinnut tunngasoq: „Allanik imeruersaasoq nammineq imeruersarneqarumaarpoq.“ — Ussatit 11:25.

Illit aalajangiisuuvutit

Taamaaliornissaq ajornakusoorpa? Oqaannarluni pineq ajornaqaa? Nalillit suulluunniit eqqarsaatigalugit taamaappoq. Taamaattuminguna iliuuseqarfigineri nalerisimaarnermik kinguneqartartut. Immikkummi ittumik iliuuseqartariaqarpoq. Allanik iliuuseqarfiginninneq imminermeersumik tunniussineruvoq, nalerisimaarnermillu nuannaarnermillu nassataqartarpoq. Kiserliorneq ilinnik artorsartitsiniarsarisoq peersinniarlugu immikkut iliuuseqarnissamut illit aalajangiisuuvutit. Atuagassiami Modern Maturity-mi ilanngutassiisartoq ima allassimavoq: „Illit kiserliorninnut allat pisuutissinnaanngilatit; illit kisivit iliuuseqarfigisinnaavat. Ataasiinnarmilluunniit ikinngutitaaruit inuunerit nutaanngortissinnaavat. Ilinnik ajuallatsitsisimasoq isumakkeerfigisinnaavat. Allassinnaavutit. Oqarasuaatikkut sianersinnaavutit. Illit kisivit inuunerit allanngortissinnaavat. Inuup allap taamaaliussussinnaangilaatit.“ Allagarsiarisimasani issuarlugit eqqorluartumik ima oqarpoq: „Inuit oqarfigisarpakka kiserliortutut naammanngitsutulluunniit misiginaveersaarnissaminnut namminneq aalajangiisuusut, iterlutillu namminneq iliuuseqarnialertariaqartut.“

Aamma ikiorneqarneq tamatigut inunninngaanneersuusariaqanngilaq. Uumasut nakorsaat ima oqarsimavoq: „Utoqqaat ajornartorsiutaat annerpaaq tassaanngilaq timikkut innarluuteqarneq, tassaallunili atorfissaarunneqartutut kiserliortutullu misigineq. Piffissami inuiaqatigiinnit ajattugaasutut misigiffimminni utoqqaat inuunerat uumasuutit (soorlu qimmit) tunniusimarpaluttumik pissuseqarnerata imaqarnerulersissinnaavaat.“ Atuagassiami Better Homes and Gardens-imi ima nassuiaateqarpoq: „Misigissutsikkut akornusersugaanerit nakorsarniarneranni uumasuutit iluaqutaasarput; timikkut nappaatilinnik, innarluutilinnik ajuutilinnillu nutaamik akiuukkusulersitsisarput; utoqqarnillu kiserliortunillu nutaamik inoorusussuseqalersitsisarput.“ Atuagassiami allami ilanngutassiami inuit uumasuutitaaqqammersut oqaluttuarineqarput: „Napparsimasut isumakuluutikillipput, uumasuutitillu asanninnermik ersersitsivigisinnaasarpaat tunuartinneqarnissartik sioorassutiginagu. Kingorna ammarput inunnillu allanik oqaloqateqartalerlutik, aallaqqaammut uumasuutiminnik qanoq paaqqutarinninnertik pillugu. Akisussaassutsimik misigisaqalersimapput. Pisariaqartinneqartutut misigilersimapput. Pinngitsoorneqarsinnaajunnaarsimapput.“

Kiserliortup nukissaq imminut ikiornissaminut, isumatsassimanerup itinersuanit imminut qaqitinnissaminut, pisariaqartoq amerlasuutigut atorusunneq ajorpaa. Ilungersorpallaarnissani ornigineq ajorpaa, kiserliornerminulli pissutiviusoq paaserusukkuniuk pinngitsoorani taamaaliortariaqarpoq. Inuit siunnersuutit akueriuminaatsitatik qanoq ilillutik akiortaraat pillugu dr. James Lynch ima allagaqarsimavoq: „Uagut inuit  paasissutissat akuerisinnaanngisavut tusarnaarusunneq ajorpavut, imaluunniit taakkua malillugit ileqqoqalernissatsinnut pinaasertarluta.“ Immaqa inuup kiserliornini qaangerusuppaa, piumassuserli tamatuma qaangernissaanut pisariaqartoq sakkortusarusunnagu.“

Ileqqup misigissutsit sunnersinnaavai

Isumatsassimajuarneq sakkortooq ajugaaffigiumagaanni nuannaarnissaq inussiarnersuunissarlu ilungersuutigiuartariaqarput. (Naleqqiuguk apustilit suliait 20:35.) Tassa kiserliukujuttuaannarneq kipitittariaqarpoq kiserliornerup nukillalaarnassusiata akerlerluinnaanik iliuuseqarnikkut. Nuannaarniarit, qittasertarlutit, qiimasumik erinarsuataartarlutit. Arlaannik nuannaarpaluttumik iliuuseqarit. Ingasattajaarlutit avaanngusukujuttuarneq eqqarsaatinik qaamasunik qamiguk. Eqqarsaatinik qaamasunik sunik?

Tassaasinnaapput Filípimiut 4:8-mi eqqaaneqartut: ’Aammattaaq, qatanngutikka, ilumoortut suulluunniit, assuarnaatsut suulluunniit, iluartut suulluunniit, minguitsut suulluunniit, asanartut suulluunniit, nersornartut suulluunniit, suut ileqquulluartuunersut, suut ataqqinartuunersut, tamakku eqqarsaatiginiarsigik.’

Inuunermi siunertaqarnissaq pisariaqarpoq. Misigigaanni inuuneq siunertaqartoq siunertaq tamanna ilungersorluni malinneqartarpoq, piviusunngortillugulu. Inuuneq siunertaqarpat kiserliortorujussuartut misigilernissaq ilimanaatikitsuararsuussaaq. Tamanna soqutiginartumik ersersinneqarpoq Viktor Frankl-ip atuakkiaani Man’s Search for Meaning-imi. Hitlerip tigusanut katersuutsitsivianut sanillillugu tamanna eqqartorpaa. Inuunerminni siunertarisaqanngitsut kiserliornermut nakkaannarput inoorusussuseerullutillu. Kisianni „inuttut naleqassutsimik misigineq qutsinnerusunut anersaakkullu tunnganerusunut atassuteqarpoq, parnaarussivimmillu peerneqarsinnaanani“. Nangippoq: „Naalliuutit siunertaqaleraangamik, soorlu pilliuteqarnerup siunertaanik, qanoq ilillutik pinerpoq naalliuutaajunnaartarput. . . . Inummut pingaarnerpaaq tassaanngilaq nalerisimaarnerup angunissaa imaluunniit anniaammit eqqorneqarnaveersaarnissaq, tassaallunili inuunerup siunertaanik paasinninnissaq. Taamaammat inuit naalliuutit siunertaqarnerannik qulakkeerinnissimaannaraangamik naalliunnissamut piumassuseqartarput.“

Ikinngutigiinneq pingaarnerpaaq

Inuunermut isuma piviusoq anersaakkullu ittoq angujumagaanni Guutimut oqaasianullu, Biibilimut, imminut tunniutivittariaqarpoq. Guutimut uppernerup ilumoorlunilu taassumunnga qinusarnerup inuuneq siunertaqalersissinnaavaa. Taamaattumik ikinngutigiinnerit aseroraluarpataluunniit kisimiilernavianngilagut, kiserliornermut qimagaanavianngilagut. Soorlu Frankl oqarsimasoq naalliuutit siunertallit nammanneqarsinnaapput, aap allaat nuannaarnermik kinguneqarsinnaapput. Inuup pissusiinik misissuisartoq ima oqarsimavoq: „Marteeri ikuallagaasoq kunngip  issiavissaarsuarmiittup usorisaanik ilumigut pilluassuseqarsinnaavoq.“

Kristusip apustilii qinugisaagaangamik nuannaarnermik Jehovameersumik misigisaqartarsimapput; naalliuutit taamaattut taakkununnga assut pingaaruteqarsimapput. ’Pilluarput iluarneq pissutigalugu qinugineqartut, qilammiup naalagaaffia pigigamikku. Pilluarpusi uanga pillunga mitaatigippasi qinugalusilu, nalinginnarnillu oqaatiginerluppasi sallullutik. Tipaatsullusi qiimmattaritsi, akissarsiassarsi angeqimmat qilammi. Pruffiitimmi siulisi taamatut qinugisarpaat. (Matîuse 5:10-12) Qisuariarneq tamatumunnga assingusoq apustilit suliait 5:40, 41-mi eqqartorneqarpoq: ’Apustilillu qaaqqugamikkik iperartortippaat inerterlugillu Jesusip aqqani oqaluusseqqunagit; iperarpaallu. Taakkuli killisiuisoqatigiit saannit aallarput tipaatsullutik, aqqa pillugu mitaatigineqaqqusaagamik.’

Ruusaatit paaqqutarigaanni naasupilunnut inissaqassanngilaq

Isumavit issutaa inerittussanik eqqarsaatinit kusanartunit isumalluartuneersunik ikkussuiffigiuk; inerittussanut isumatsassimanermit nuanniitsumeersunut kiserliornermillu avaanngunartumeersunut inissaqartitseqinak. (Naleqqiuguk Kulorsamiut 3:2; 4:2.) Tamanna maleruassallugu ajornakusoorpa? Pissutsini aalajangersimasuni taamaaliornissaq ajornarluinnartutut ittarpoq. Taalliortoq ima allassimavoq: „Ruusaatit paaqqutarigaanni . . . naasupilunnut inissaqassanngilaq.“ Tamatumani isumalluarluni iliuuseqarnissaq aalajangersimalluarlunilu piumassutsimik atuinissaq pisariaqarput. Taamaaliornissarli ajornanngilaq, taamaaliortoqartarporlu.

Laurel Nisbet eqqarsaatigeriaruk. Taanna polioviruseqalersimavoq, 36-nillu ukioqarluni nukillaarsimasut anersaartuussuannut ikineqarsimalluni, ukiunilu 37-ni tassani innangasimalluni. Taamaallaat niaqquni aalatissinnaavaa. Qungasianit ammut timaa tamarmi nukillaarsimavoq. Aallaqqaataani nikallorluinnaraluarpoq. Ullorli ataaseq imminut naakkigerujussuariarluni aalajangerpoq pissutsit atulikkani nutaat sapinngisamik ajunnginnerpaamik atorniarlugit. Marlunnik perorsagassaminik meeraqarpoq isumagisassaminillu ueqarluni. Inuunini allatut aaqqissuutilerpaa; anersaartuussuarmi innangalluni illumi suliassat aaqqissuunnissaat ilinniarpaa.

Laurel sinnakitsuararsuuvoq. Unnuarpassuit sininngiffini sumut atortarpai? Kiserliornermut nakkaannarpa? Naagga, Ataatani qilammiusoq, Jehova, oqaloqatigisarpaa. Nakussatsinneqarnissaminik qinusarpoq, qatanngutini kristumiut qinnuttarpai Guutillu naalagaaffianik oqaluussissutiginninnissaminut periarfissanik qinnutiginnittarluni. Oqaluussinissamut periarfissanik nassaarniartarpoq Jehovallu aqqanik oqaluussissutiginninnermigut inuppassuarnit malugineqartarluni. Kiserliornerup naasupiluinut inissaqartitsinngilaq; ruusanik naggorissaaneq ulapputigaa.

Aamma Napasuliaq Alapernaarsuiffiup Peqatigiiffiata ajoqersuiartortitaasa ilaat, Harold King,  maligassaalluarpoq. Kinamiut parnaarussivianni ukiuni tallimani kisimiittussanngortinneqarsimagami kiserliornermut nakkaannarianngortinneqarsimavoq. Isumali nuanniitsoq tamanna tunuartippaa, piumassutsimilu pimoorullugu atorneratigut isummani allamut saatsippaa. Kingorna ima oqaluttuaraa:

„Anersaakkut uumajuaannartinniarlunga oqaluussinermut immikkut pilersaarusiorpunga. Inimili kisimiittarissamiillunga kimut oqaluussissagama? Takuat, eqqaamasakka naapertorlugit Biibili tunngavigalugu oqaluussissutinik sananialerpunga eqqarsaataannakkut inunnut oqaluussiniarlunga. Taava ’sulillunga’ aallartippunga. Matumut peqanngitsumut kasuttoriarlunga angummut peqanngitsumut nalunaajaavunga. Taava matup tullianut ingerlaqqippunga ullaap-tungaalu tamanna ikinngitsut pulaarpakka. Kingunerileraa mrs. Carter, aamma piviusuusaartitara, soqutiginninnermik ersersitsisoq naapippara, arlaleriarlungalu pulaaqqereerlugu Biibilimik atuaqqissaaqatiginissaanik isumaqatigiissuteqarfigaara. Atuaqqissaarnermi atuakkami ’Gud Maa Være Sanddru’-mi qulequttat pingaarnerit, eqqaamasinnaasannguakka naapertorlugit, sammivavut. Nipituumik oqaluttarpunga tamaasa puiuikkiulluarsinnaanerujumallugit.“

Jehovap nalunaajaasui tuusintilikkuutaat Hitlerip tigusanut katersuutsitsiviiniittut upperisartik iperarumallugu uppernarsaaginnaraluarunik iperagaasinnaasimagaluarput. Ikittuinnaat taamaaliorsimapput. Tuusintilikkuutaat aalajaallutik toqupput — ilaat pillakkatut toqutaapput, allat nappaammik nerisakilliornermilluunniit toqquteqarput. Jehovap nalunaajaasuisa ilaat parnaarussivimmiittoq — Josef — tigusanut inissiani allani marlunnik angutinik qatannguteqarsimavoq. Aappaa [pillakkatut toqutaanermini] nallangatitaasimavoq niaquersissussuup savittarsua nakkariartortoq isigisinnaaniassammagu. Josef oqaluttuarsimavoq: „[Jehovap nalunaajaasuisa] allat tamaaniittut tamanna tusaramikku ornippaannga pilluaqqullungalu. Isumalluartumik isumaqarnerat killitsissutigeqaara. Ilumoortuaannarneq aniguinissamit pingaarnerutikkatsigu.“

Qatanngutaata aappaa sakkutuut toqutsisussat sanileriiaarsimasut saavanni aperineqarsimavoq arlaannik oqaaseqarusussoralugu. Qinunissaminut  akuereqqusimavoq, akuerineqarsimallunilu. Qinnutaa killitsinnangaarmat, qamuuna nuannaarpalussuseqangaarmat, aallaaqquneqarmat arlaannaalluunniit igissimanngilaq. Peqqussut uteqqinneqarsimavoq, ataasiinnarmillu igittoqarsimavoq timaatigut eqquisumik. Sakkutuut naalagaata kamaqaluni nammineq aallaanni tigusimavaa toqullugulu.

Suna inuunermik siunertaqalersitsisinnaasoq

Tamakkunani tamani Guutimut upperneq sakkortooq pisariaqarsimavoq. Suut allat tamarmik misilinneqareeraangata iluatsinngitsoorlutillu, upperneq atajuaannarpoq kiserliornermullu ajugaasarluni inuunerlu imaqarsimanngikkaluaqisoq siunertaqalersittarlugu. Silamiut isiginnittaasiannit inuppassuit inuunerat siunertaqarluartutut isigineqartarpoq, uffa iluamik oqaatigalugu siunertaqanngitsoq. Qanoq ililluta taama oqarsinnaavugut? Toqusussaammata issunngoqqillutik, puiorneqarlutillu. Inuiaat imarsuaannut malimmik qimataqarneq ajorput, piffissallu sissaani sioralimmi tuminik qimatsissanatik. Nalunaajaasup oqaasii 9:5-imi allassimasutut ippoq: „Uumassuseqartummi nalunngilaat toqusussaagamik, toqungasulli sunnguamilluunniit ilisimasaqanngillat. Pissarsiassaqanngillat, taakkuninnga eqqaamannittoqanngilaq.“ Inuuneq Jehovap siunertaanik malittarisaqanngitsoq imaqanngilaq.

Ullorissat qilammiittut qimerlooriakkit, qilaap isusisassaanngitsup taarnera malugeriaruk, taava misigissaatit suunngitsuararsuullutit. Tussiaasiortup Davidip misigissusii paasinarput: „Takugaangakkit qilak pigisat, assappit pinngortitaat, qaammat ullorissallu tassa ivertitatit — taava inuk suummat eqqaasarpiuk? Inuup qitornaa suummat isumagisarpiuk?“ Davidip ernerata Salomonip inuit piliaat ilalinngitsutut tunuartissimavai oqarluni: „Suut tamarmik nungujasuupput suiallannerinnartut illutik,“ oqaatsinilu naggaserpai ima: „Taava oqaaserineqartut tamarmik ataatsimut katinneqarsinnaapput imaalillugit: Guuti mianeruuk inatsisaalu maleruarlugit, tamanna inunni ileqqussaammat.“ — Tussiaat 8:4, 5; Nalunaajaasup oqaasii 12:8, 13.

Kiserlioraluaraanni kiserliunngikkaluaraanniluunniit manna apeqqutaavoq: Inuuneq qanoq ililluni siunertaqalertarpa? Guutimik mianerinnilluni taassumalu inatsisaanut naalalluni inuunikkut. Aatsaat taamaalioraanni Guutip, qilammik nunamillu Pinngortitsisup, siunertaanut naleqquttunngortoqarsinnaavoq aaqqissuussaanullu naassaanngitsumut ilaalerluni.

Guutip ilagippatit kisimiinngisaannaassaatit

Afrikami Jehovamut nalunaajaasoq aalajaatsoq, sakkortuumik qinugisaaneq nikallujuilluni atoreerlugu qimagaasutullu misigisimareerluni, oqarsimavoq naak ikinngutini sumiginnaagaluartut kisimiissimanani. Tussiaat 27:10 issuarpaa: „Ataatamami anaanamalu qimakkaluarpannga [Jehovap] ilasiarissavaanga.“ Aamma Jesus taama misigisimavoq: ’Ata, ullut nalliukkumaarput, maannakkummi nalliussimapput, taava nungullusi namminissinnut siammarumaarpusi uangalu kiserngorullunga; massali kisimiinngitsunga, Ataatap najormanga.’ — Juánase 16:32.

Jesusip kisimiinnissani annilaangagineq ajorsimavaa. Amerlasuutigut kisimiinniarsarisarsimavoq. Kisimiikkaangami kiserliorneq ajorsimavoq. Guutip anersaavanut inissaqartitsisarsimavoq, Guutillu pinngortitaanit avatangerneqarsimagaangami taassumunnga qanittutut misigisarluni. Ilaannikkut Guuti kisimeeqatiginiassagamiuk inunnik allanik ilaqarusuttarsimanngilaq. ’Guutimut palliguttarsimavoq, Guutilu taassumunnga palliguttarsimalluni.’ (Jâko 4:8) Nalunanngitsumik tassaasimavoq Guutip ikinngutiginerpaasaa.

Ikinngutitut Biibilip eqqartugaatut ittoq tassaavoq tunissut naleqangaartoq. (Ussatit 17:17; 18:24) Abraham ’Jehovap ikinngutaanik’ taaneqarsimavoq Jehova Guutimut upperluinnarnini naalalluinnarninilu pissutigalugit. (Jâko 2:23, NV) Jesus ajoqersukkaminut ima oqarsimavoq: ’Inassutikka malikkussigik ikinngutigissavassi. Kiffanik taassaarpassi, kiffap naalakkami suliai nalummagit; kisianni ikinngutinnik taavassi, Ataatannik tusakkanik tamanik nalunaarfigigassi,’ — Juánase 15:14, 15.

Uppertut Jehova Guutimik Jesus Kristusimillu ikinnguteqartut kiserliornermut akiuunnermi qanoq aamma ajugaanngitsoorsinnaassappat? (gD 22/9 93)

[Qupp. 8, 9-mi assiliartat]

Qinuneq allanillu suliaqarneq kiserliornaveersaarutaasinnaapput

[Qupp. 10-mi assiliartat]

Harold Kingip Jehovamullu nalunajaasut tuusintilikkuutaat allat parnaarussivinni tigusanillu katersuutsitsivinni atorsimasaasa takutippaat Guutimut uppernerup kiserliorneq matusinnaagaa — allaat ajornerpaanik atugaqartitaanermi

[Suminngaanneernera]

U.S. National Archives-imit asseq