Annertoqqutissat pitsaasut

„TOQUMUT siooraneq isumatsarujussuartarnerillu akiortariaqarsimavakka,“ Virginia, Argentinami Jehovap nalunaajaasuisa ilaat, taama oqarpoq. Iviangimigut kræfteqarnerminut akiuunnermini iviangini mannissaqarfinilu tamaasa peersissimavai. *

Ilumummi iviangikkut kræfterneq pissutigalugu toqunissamut siooraneq nunarsuaq tamakkerlugu atuuppoq. Siooraneq tamanna, atorpiarsinnaajunnaarnissamik aammalu tunniusimanermut arnaassusermullu attuumassuteqartumik annaasaqarnissamut annilaanngatiginninnermik ilalik, arnap misigissutsikkut inuunerani paatsiveerunnermik pilersitsisinnaavoq. Kiserliornermik misigineq oqimaatsoq isumatsalluinnarnermik kinguneqarsinnaavoq. Taamatut misigissutsikkut artorsaateqarnermut qanoq ililluni illersorneqarsinnaava?

Annertoqqusersorneqarnissamik pisariaqartitsineq

„Annertoqqusersorneqarnissani pisariaqartippaa!“ Joan Amerikamiu taama akivoq. Taassuma anaanaa aanaalu iviangimikkut kræftersimapput, maannakkullu aamma nammineq nappaammut tamatumunnga akiuuppoq. Ilaquttat ikinngutillu aalajaatsut tuppallersaasinnaapput ikiuisinnaallutillu. Joanip uia, Terry, Joanimik assut annertoqqusersuisimavoq. Terry nassuiaavoq: „Joanimut aalajaatsumik toqqavissaanera  suliassattut isigisimavara. Nakorsaariaatsimik akiuuttuarnissaminut nakkaannannginnissaminullu tatiginninnermik nakuussummillu tunisisinnaasumik qinersiniarnerani ikiortariaqarsimavara. Kræfteqarnini pillugu pilatsinnissaminut annilaanganera allinaveersaartittariaqarsimavarput, nakorsanillu oqaloqatiginnittarnitsinni apeqqutai annilaanganeralu eqqaaniarsarisarlugit.“ Terry nangippoq: „Ilaquttavut uppeqativullu ilaquttaminnit annertoqqusersorneqanngitsut taamatut ikiorsinnaavavut. Tassaasinnaavugut taakkua nakorsanut isaat, siutaat nipaallu.“

Katissimanngitsut uillarnerillu immikkut isumassorneqarnissaminnik pisariaqartitsipput. Dianap Australiameersup ima oqaluttuuppaatigut: „Uiga kræfteqarnini pillugu pilatsereerluni ukiut tallimat matuma siorna toquvoq, meeqqakkali imaqannginnersamik immersueqataasimapput. Inussiarnisaarfigisimaqaannga ingasattajaartumik misigissutsiminnik ersersitsiniarsarinngikkaluarlutik. Nukissannik tunisarsimaqaannga. Suut tamarmik sukkasuumik eqqarsaatigilluakkamilli suliarineqartarput.“

Iviangikkut kræfteqarneq ilaqutariinnik tamanik isumakkut eqquisinnaavoq. Taamaattumik allanit asannittumik isumassorneqarlutillu annertoqqusersorneqarnissartik pisariaqartippaat (Jehovamut nalunaajaasuugunik ingammik ilagiinni kristumiuni qatanngutiminnit angutinit arnanillu).

Rebecca, Amerikamiu, iviangimigut kræftersimasumik anaanalik nassuiaavoq: „Ilagiit tassaapput annertusisamik ilaquttat, kristumioqatillu iliuuseqarnerat misigissutsinut annertuumik sunniuteqartarpoq. Amerlasuut naak nakorsaariaaseq nalinginnaanngitsoq anaanama qinigaa namminneq iluarinngikkaluarlugu sianertarnermikkut pulaartarnermikkullu misigissutsikkut annertoqqusersorsimavaatigut. Allaat ilaat aggertarput immikkullu nerisassaanik piareersaanermut ikiuuttarlutik. Utoqqaanertat telefonikkut rigssalimut attavilerpaatigut taamaalilluta ataatsimiinnernik arajutsisaqanngisaannarluta. Allaat ilagiit aningaasanik tunissutinik nassippaatigut.“

Joan tamatumunnga atatillugu oqarpoq: „Asanninneq anersaakkut qatanngutima angutit arnallu ersersissimasaat eqqaagaangakku ulloq manna tikillugu suli qamuuna attortittarpunga. Sapaatit-akunnerini arfineq-marlunni, ullormut tallimariarlutik, qatanngutikka arnat asannittut paarlakaallutik napparsimmavimmut suliaritikkiartortunga utimullu biiliuttarpaannga. Aqqutikkut 150 kilometerisut isorartutigisukkut! Jehova qutsavigingaarpara kristumiunik qatanngutigiissuarnik tunissutaa pillugu!“

Qiimmassaassutigisinnaasarput alla tassa ineriartornartunik oqaaseqartarneq. Piaarinata nuanniitsunik oqaaseqartoornissarput mianersuutigisariaqarparput. June Afrika-kujallermeersoq nassuiaavoq: „Inuup kræftersimanngitsup naleqqulluinnartunik oqaaseqarnissaa naatsorsuutigineqarsinnaanngilaq. Uanga nammineq allat kræftersimasut ajunngitsumik kinguneqartitsisimasut kisiisa tusassallugit sapersimanngilakka.“ Noriko Japanimeersoq isumaqataavoq: „Inuit kræftersimasumik ajorunnaarsimasumik nangeqqissimanngitsumillu eqqartuiffigigaangannga taamatulli iluatsitsinissara kissaatigisarpara.“

Eqqaamajuk arnat ilaasa nuannarineq ajormassuk qanoq innerminnik apersorneqartuarnissartik. Allalli iviangikkut kræfternerminnik misigisartik, ingammik qanimut ikinngutiminnut, oqaluuserissallugu pisariaqartittarpaat. Iliuusissaq pitsaanerusoq qanoq ililluni paasineqarsinnaava? Helen Amerikamiu ima siunnersuivoq: „Aperisaruk oqaluusererusunneraa, namminerlu oqalutsiguk.“ Aap, „tusarnaarnissannut piareersimasarit,“ Ingelise Danmarkimeersoq oqarpoq. „[Iviangimigut kræftertoq] ilagisaruk, eqqarsaatini avaanngunartut kisimiilluni atunnginniassammagit.“

Isumalluarnissat sulissutigiuaruk

Iviangikkut kræfternermi suliaritinneq sapaatit-akunnerpassuini, qaammaterpassuarni ukiorpassuarniluunniit qasoqqanermik nassataqarsinnaavoq. Arnamut iviangimigut kræftertumut artornarnerpaat ilagaat siornatigutut sapinngitsigiunnaarnermik nassuerutiginninnissaq. Pisinnaasami killeqalernerat akuerisinnaajumallugu ’sakkukillisariaqarpoq’ ullullu ingerlanerani qasuersaartariaqarluni.

 Isumatsassimaneq pilerpat iliuuseqapallattariaqarpoq isumalluartumik isiginninnissaq atatinniarlugu. Neriko imminut ima oqaluttuarivoq: „Hormonit atorlugit nakorsarneqarnerma isumatsassimalersippaanga. Taamatut itsillunga iliuusererusutakka iliuuserisinnaasimanngilakka, taamaattumik misigilersimavunga Jehovamit kristumiulluunniit ilagiivinit atorneqarsinnaajunnaarlunga. Isumalluanngitsunik eqqarsaateqarnerujartuinnartillunga ilaquttama kræftimik toqquteqarsimasut naalliuutigisimasaat eqqarsaatiginerulerpakka. Sioorasorujussuanngorpunga eqqarsarlungalu: ’Taakkua anniaatigisimasaat uanga anigorsinnaassanerpakka?’

Noriko nangippoq: „Taamaalinerani Jehovap Nalunaajaasuisa atuagassiaataat atorlugit eqqarsaatikka ajunngitsumut saatinniarlugit iliuuseqartalerpunga paasiniarlugu Jehovap qanoq isigigaanga. Ilikkarpara qanoq ililluni Guutimik mianerinninnermik ersersitsisoqarsinnaasoq, qanoq annertutigisumik naammassisaqarneq apeqqutaanngitsoq, kisianni pissutigisaq apeqqutaasoq. Kissaatigaara Jehovap uummatima eqqarsaatimalu qanoq issusii iluarissagai, taamaattumik aalajangerpunga nuannaarlunga uummammillu tamakkiisumik kiffartuunniarlugu, naak kristumiutut kiffartornermi annikitsuinnannguamik naammassisaqarsinnaagaluarlunga.“

Iviangikkut kræfternermut akiuunnermi sivisuumik qularneq inuunermut isumalluartumik isiginnittaatsimik aseruisinnaavoq. Diana nassuiaavoq iluaqutiginerpaasimallugu eqqarsaatini uummatinilu ulikkaaqqatissimagamigit Jehovap imminut asannittumik tunissutaanik: „Ilaquttanik, ikinngutinik, nipilersukkanik tusarnersunik, imaannarsuarmik seqernullu tarrilerneranik alianaaqisumik isiginnaarnermik.“ Ima kajumissaarivoq: „Allat Guutip naalagaaffianik oqaluttuuttakkit. Qilanaaralugillu eqqarsaatigiuaannakkit Guutip naalagaaffiata ataani pissutsit atuuttussat, nappaatit atuukkunnaarnissaat!“ — Matîuse 6:9, 10.

Aamma Virginia isumatsattarnermi akiornissaanut nukissaqalertarsimavoq inuunermi anguniakkami eqqarsaatigeqqissaartarnerisigut: „Inoorusuttorujussuuvunga, pingaaruteqaqisumimmi suliassaqarpunga.“ Annilaanganersuarmik tikinneqartarnini pillugu ima oqarpoq: „Jehova tunaarilluinnarpara, nalunnginnakku qimanngisaannassagaanga. Eqqarsaatigisarparalu Biibilimi versi Tussiaat 116:9-miittoq, ’inuusut nunaanni Jehovap kiinaata saani inuusinnaanngornissannik’ neriorsueqqissaarisoq.“

Arnat taakkua tamarmik Biibilip Guutia, Jehova, tunaarilluinnarpaat. Korintumiunut agdlagkat áipait, kapitali 1-imi, versini 3-mi 4-milu, Jehova taaneqarpoq ’Guuti tamanik tuppallersaasoq, annikilliuutivut tamaasa pillugit tuppallersaasartoq’. Tuppallersarneqarnissaminnik pisariaqartitsisut annertoqqusersorniarlugit Jehovap qanoq ililluni assani isaattarpai?

Mieko Japanimeersoq akivoq: „Qularutiginngilluinnarpara Jehovamut kiffartortuarnikkut tuppallersaanera ikiuineralu pissaasut pissallugit.“ Yoshikop ima oqaatigaa: „Naak anniaatikka inuit paasinngikkaluaraat Jehovap suut tamaasa nalunngilai, qularutiginngilluinnarparalu pisariaqartitsinera naapertorlugu ikiortarsimagaanga.“

Joan aamma ima oqarpoq: „Qinunerup pissaanera nikallorujussuarnermit qaqititsisinnaavoq makeqqitsitsisinnaallunilu. Jesusip nunamiikkallarami ajorunnaarsitsisarsimaneri misinnartut silarsuassamilu nutaami tamakkiisumik ajorunnaarsitsinissaa eqqarsaatigigaangakkit assut tuppallertarpunga.“ — Matîuse 4:23, 24; 11:5; 15:30, 31.

Takorloorsinnaaviuk silarsuaq iviangikkut kræfterfiuneq ajortut, aap sumilluunniit nappaateqarfiunngitsoq? Guutip tamanik tuppallersaasup, Jehovap, tamanna neriorsuutigaa. Jesaja 33:24-mi piffissaq nunarsuarmi inuup kialuunniit napparsimaneranngiffissaa eqqartorneqarpoq. Neriuut tamanna erniinnaq piviusunngussaq Guutip naalagaaffia taassuma erneranik Jesus Kristusimik kunngeqartoq nunarsuarmut naalakkersuilerpat, nappaatinullu, aliasuutinut toqumullu pissutaasut tamaasa peerlugit! Neriuummut nuanningaartumut tamatumunnga tunngasoq sarĸúmersitat 21:3-5-miittoq atuariassagit. Annertoqqut piviusumik tuppallersaasoq ikiortigalugu siunissaq sapiillutit isigilerniaruk.

[Quppernerup ataani ilanngussaq]