Inuusuttut aperipput:

Imminorneq aaqqiissutissaava?

„Ullaat tamaasa itertarnera qatsuteqaara. Sapilerpunga. Kamaqaanga. Uummatikkut anniaqaanga. . . . Qimagunnissara eqqarsaatigaara. . . . Qimagukkusunngikkaluarpunga, allatulli ajornaqaaq. . . . Siunissara eqqarsaatigigaangakku taartoq anniaatillu kisiisa takusarpakka.“ — Peterip 21-nik ukiullip imminulerluni allagai. *

PAASISIMASALLIT missiliuuppaat USA-mi inuusuttuaqqat 2 millionit missaat imminoriaraluarsimasut. Alianaraluartumillu ukiumut 5000-it iluatsitsisarput. Missiliuunneqarpoq qallunaat inuusuttuaqqat ukiut tamaasa 4000-it imminoriartartut. Indiami inuusuttuaqqat 30.000-it missaat 1990-imi imminorsimapput. Canadami, Finlandimi, Frankrigimi, Hollandimi, Israelimi, New Zealandimi, Spaniami, Schweizimi Thailandimilu inuusuttuaqqat akornanni imminortarneq alianaqisumik annertusiartuinnarsimavoq.

Aliasunnermilli saperluinnalersutut misigigaanni — imaluunniit misigissutsikkut annersinneqarsimagaanni — aaqqiissutissamillu takusaqarsinnaanani? Imminornissaq ussernartorsiornarsinnaavoq, iluamilli oqaatigalugu tassaavoq annaasaqarneq alianartoq. Ikinngutit ilaquttallu aliasuttorujussuussapput artorsartorujussuussallutillu. Siunissaq qanorluunniit taarpasitsigigaluarpat qanorluunniillu ajornartorsiut angerpasitsigigaluarpat imminut toqunneq aaqqiissutissaanngilaq.

Sooq ilaat imminortartut

Angutip naapertuilluartup Jobip ernumatsangaarsimaneq qanoq ittuusoq paasisimavaa. Ilaquttani, pigisani peqqissutsinilu annaareerlugit ima oqarsimavoq: „Kissaatiginerussagaluarpara qiminneqarnissara, toqussaq naalliuinnarnermit piumanerullugu.“ (Job 7:15) Ullumikut inuusuttuaqqat ilaat taamatut misigisimapput. Tamanna atuakkiortut ilaata ima oqaatigisimavaa: „Tatineqarneq . . . anniarnermik (artorsarnermik siooranermillu misiginermik) nassataqartarpoq tamannalu illersorniarnermik (anniarneq qimarratiginiaralugu) kinguneqartarpoq.“ Tassa imminorneq anniaammit artorluinnalikkamit kukkusumik qimaaniarneruvoq.

Anniarnermut taama ittumut suut pissutaasarpat? Angajoqqaanik peeqqamilluunniit oqqateqateqarujussuarsimaneq pissutaasinnaavoq. Peeqqanilu qimakkamik Brad 16-inik ukiulik aliasuttorujussuusimavoq. Misigissutsinili oqaluttuarinngisaannarpai. Suut tamaasa kipitiinnarpai imminut qimilluni.

Sunita 19-inik ukiulik ernumatsattorujussuusimavoq angajoqqaami paasimmassuk  peeqqani kanngunartulioqatigisarini. „Misigigama taamatut inuuinnarsinnaananga,“ oqaluttuarpoq. „Taamaattumik unnuit ilaanni angerlarami aspirinerpassuit iiorarpakka. Aqaguani ullaakkut aammik meriartorujussuuvunga. Kipitikkusutara tassaanngilaq inuunera kisianni inooriaasera.“

Aamma atuarfik annertuumik tatineqarfiusinnaavoq. Angajoqqaaminit (tamarmik nakorsaasunit) nakorsanngornissaminut tatineqarnermini Ashish sinissaaruttalerpoq kisimiinniaannalerlunilu. Qutsissumik ilinniagaqarnissaminik angajoqqaami naatsorsuutiginninnerat eqqortissinnaanagu misigigami Ashish sininnartorpassuarnik iioraavoq. Tamatuma Biibilimi Ussatit 15:13-imik eqqaasippaatigut: „Uummatikkut aliasunnerup nikallunganeq pilersittarpaa.“

Ilaqutariinni erloqissutit

Ilaqutariinni atugarliuutit — soorlu angajoqqaat avinnerat averuserneralluunniit, toqusoorneq allamulluunniit nuunneq — inuusuttuaqqat imminortarnerannut pissutaasut ilagaat. Assersuutigalugu Bradip siuliani eqqaaneqartup ikinngutini qanittorujussuusani marluk qanigisanilu biilerlutik ajunaartut annaasimavai. Aammalu angajoqqaavi aningaasatigut ajornartorsiulersimapput. Brad saperluinnalersutut misigisimavoq. Tussiaasiortutut ima nillertutut misigisimassaaq: „Anniaatinik naammatseqigama . . . Ilusimajuarpaannga imertut uligarlunga.“ — Tussiaat 88:4, 18.

Inuusuttut ajoraluartumik amerlaqisut allatut ittunik tatineqaqqapput: timikkut, misigissutsikkut kinguaassiuutitigullu atornerlugaanermik. Indiami naalagaaffik Kerala nunami tassani inuusuttuaqqat akornanni imminorfiunerpaavoq. Inuusuttuararpassuit niviarsiaqqat ataataminnit kinguaassiuutitigut atornerlunneqarnertik pissutigalugu imminoriarsimapput. Meeqqanik atornerluineq nunarsuaq tamakkerlugu nappaatitullusooq siaruaassimavoq, eqqorneqartullu pisuussuteqanngitsut erloqissutaat annertoorujussuusinnaavoq.

Isumakulunnermut pissutaasut allat

Imminorusulersitsulli tassaannaanngillat avataani pissutsit. Inuusuttuaqqanik katissimanngitsunik misissuinermi nalunaarusiami ima allassimasoqarpoq: „Nukappiaqqat niviarsiaqqallu kinguaassiuutitigut atoqateqartartut imigassartortartullu akornanni pinaveersaartuninngarnit [imminornissaq] ilimanaateqarneruvoq.“ Sunitap tamalikannera naartulerneranik kinguneqarsimavoq — naartuninilu naartuersinnermigut kipitissimavaa. (Naleqqiuguk 1 Korintumiut 6:18) Pisuusutut misigaluni toqorusulersimavoq. Taamatuttaaq Brad 14-inilli ukioqarluni imigassartorniakujuttalersimavoq akuttunngitsumillu ernguterujussuartunut ilaasarsimalluni. Aap, imigassamik atornerluigaanni ’naggataatigut pulateriaarsuttut kiisisinnaavoq’. — Ussatit 23:32.

Aamma allaat inuup nammineq ’eqqarsaatai eqqissiviilliornartut’ imminorusulersitsisinnaapput. (Tussiaat 94:19) Nakorsat oqartarput eqqarsaatikkut eqqissiviilliorneq timimi ingerlaatsinik assigiinngitsunik peqquteqarsinnaasoq. Assersuutigalugu paasineqarsimavoq Peterip aallaqqaataani eqqartorneqartup imminornermi siornagut qarasaani kemiikkut pissutsit oqimaaqatigiinngissimasut. Misigissutsit isumatsassimatitsisut iliuuseqarfigineqanngitsut sakkortusisinnaapput; imminornissaq kisiat qinigassatut isigitilersinnaavaa.

Ikiortissarsiorit

Imminornerli qinigassatut isigineqartariaqanngilaq. Tamanna akuerigaluarutsigu akuerinngikkaluarutsiguluunniit isumakkut peqqissuunissamik suliaqartut Alan L. Bermanip David A. Jobesillu oqarnerattut pinngitsoqarata ’tatineqarnermik ajornartorsiutinillu iluatsittumik aniguinissatsinnut uatsinni avatitsinnilu nukissamaateqarpugut’. Nukissat ilaat tassaasinnaapput ilaquttat ikinngutillu.  Ussatit 12:25-mi ima allassimavoq: „Isumakuluuteqarnerup inuk artorsaatissittarpaa, inussiarnersumilli oqaaserisat nuannaalersittarpaat.“ Aap, inuup paasinnittup oqaasiisa ajunngitsut pissutsit allanngortilluinnarsinnavaat!

Taamaattumik isumatsassimagaanni ernumassuteqaraanniluunniit artorsaateqarnermi kisimiinnginnissaq inassutiginarpoq. (Ussatit 18:1) Artorsaateqartup inuk tatigisani uummammiuminik aniatitsiffigisinnaavaa. Oqaloqateqarneq misigissutsikkut oqiliallassutaasarpoq, artorsaatinillu nutaamik isiginnilersitsisinnaalluni. Ikinngummik asasamilluunniit toqukkut annaasaqarsimanermik artorsaateqartilluni ikinngummut tatigisamut artorsaammik eqqartueqattaartuarneq iluaqutaasarpoq. Taamatut annaasaqarnermi anniaat akuerineqareeraangat atorneqareeraangallu oqiliallannissaq tullinnguuttarpoq. (Nalunaajaasup oqaasii 7:1-3) Taamaakkaluartorli imminornissamik eqqarsaatit uteqqissagaluarpata ikinngummut tatigisamut attaveqarnissamik neriorsuinissaq iluaqutaassaaq.

Immaqa tatigisaqarnissaq ajornakusoorsinnaagaluarpoq. Inuunerli immini annaaneqaratarsinnaammat tatigisartaarniarnissaq sapiiserfigissallugu ulorianannginnerpa? Taamatuttaarlu imminut ajoqusernissamik eqqarsaatiginneqqajaaneq qaangiutissaaq tamanna arlaannut oqaloqatigiissutigisarukku. ’Kinami oqaloqatigissagakku?’ immaqa aperisoqassaaq. Angajoqqaatit Guutimik mianerinnittuuppata misilinniaruk ’uummatit taakkununnga tunniullugu’. (Ussatit 23:26) Amerlasuut ilimagisaannit paasinninnerujussuussapput ikiuisinnaassallutillu. Paasisimasaqarluartumit ikiorneqartariaqaruit, soorlu nakorsamit misissorneqartariaqaruit, tamanna isumagiumassavaat.

Ilagiinnut kristumiunut ilaasut aamma ikiortissaapput. Ingammik ilagiinni utoqqaanertat anersaakkut ingerlalluartut isumatsassimasunik annertoqqusersuinissaminnut ikiuinissaminnullu piginnaaneqarput. (Jesaja 32:1, 2; Jâko 5:14, 15) Imminoriaraluareernermi kingorna Sunita piffissaq tamaat oqaluussisartumit (Pionerimit) ikiorneqarsimavoq. Sunita oqaluttuarpoq: „Sutigut tamatigut annertoqqusersorpaanga. Taannaqanngikkaluarpat niaqulaalersimassagaluarpunga.“

Aniguinissamut nukissat

Aamma inuk nammineq iluatsitsinissamut nukissamaateqarfeqarpoq. Assersuutigalugu, pisuusutut misiginermik anniaateqarneq eqqunngitsumik iliorsimanermik pissuteqarpa? (Naleqqiuguk Tussiaat 31:11) Tassami, misigissutsit taamaattut sakkortusiartuinnartinnissaannut  taarsiullugu toqqaannartumik iliuuseqarfiginissaat pitsaaneruvoq. (Jesaja 1:18; naleqqiuguk 2 Korintumiut 7:11.) Alloriarneq siulleq pitsaasoq tassaassaaq angajoqqaannut nassuernissat. Soorunami qularnanngitsumik aallaqqaammut qisuariapiluussapput. Tamatumali kingorna ikiorusussavaatsit. Aamma qularutiginngilarput ilumoorlutik peqqissimisunik Jehova ’isumakkiineertoorujussuusoq’. (Isaia 55:7) Jesusip utertitsissutissatut pilliutaa peqqissimisut ajortuliaannik matusivoq. — Rûmamiut 3:23, 24.

Kristumiut aamma uppernertik, ilisimasatik Biibilimeersut Jehova Guutimullu attaveqarnertik annertoqqutissaraat. Ilaanni tussiaasiortoq David erloqisorujussuulluni ima oqarsimavoq: „Akeqqama . . . nunamut tullaaraannga.“ Taamaakkaluartoq nakkaannanngilaq. Ima allassimavoq: „Nipituumik [Jehovamut] torlulavunga, [Jehova] qinnuigaara saammaateqqullunga.“ „Naammassisatit tamaasa eqqarsaatigaakka isumaliutigeqqissaarlugillu assappit suliaat.“ — Tussiaat 142:2; 143:3-5.

Imminut ajoquserniarluni eqqarsaat sakkortusivallaarpat qinunikkut Jehova saaffigisariaqarpoq. Taanna aliasuutinik paasinnittuuvoq artorsaateqartullu inuuinnarnissaa kissaatigaa! (Tussiaat 56:9) Taanna ’pissaanermik angingaartumik’ anniaatip nammannissaanut ikiortissamik tunisisarpoq. (2 Korintumiut 4:7) Aamma eqqarsaatigisariarpoq imminorneq ilaquttanut, ikinngutinut Jehovamullu aliasuutaassasoq. Tamakku eqqarsaatigigaanni inuunerup atatiinnarnissaanut iluaqutaasinnaapput.

Naak artorsaateqarneq qaangerneqarsinnaanngilluinnartutut issinnaagaluartoq taamaattoq qularutigineqassanngilaq aamma allaqarmat taamatut misisaqarsimasunik. Namminneq misigisimasartik naapertorlugu oqarsinnaapput pissutsit allanngorsinnaasut allanngortartullu. Pissutsit pitsaanerulersinniarlugit imminut toqunnissaq tulluanngilaq. Artorsarnerup anigornissaanut allat ikiuussinnaapput. Isumatsassimasut pisariaqartitaminnik ikiorneqarnissartik ujartortariaqarpaat — inuuginnarlutillu! (gD 8/4 94)

[Quppernerup ataani ilanngussaq]

[Qupp. 24-mi assiliartaq]

Misigissutsit anniaataasut allamut oqaloqatigiissutiginissaat pitsaaneruvoq