Inuusuttut aperipput:

Kanngunartuliornermik qanillattuineq — Navianaateqarpa?

„Ullut ilaanni anaanaga angerlarsimatinnagu peerara aggerpoq, fjernsyneriaannarunarluni,“ Laura oqaluttuarpoq. * „Siullermik assaga tigummiinnarpaa. Tassanngaannarli assai uniffeerupput. Unitsinnissaa annilaanngatigaara, narralluni aneqinammat.“

LAURAP peeraatalu eqqunngitsuliortarneri amerliartuinnarput. Kunissuunnerit ajornerusunut aqqutaapput. Ullutsinni ikittuinnaat taamaaliorneq ippinnartutut isigaat. Misissuinerit takutippaat USA-mi inuusuttut amerlanersaat 19-inik ukioqalernerminni kinguaassiuutitigut atoqateqartareersimasut. Kunissuuteruloorneq kinguaassiuutitigullu atortunik attualaarineq amerlasuut aliikkutaannartut isigaat. Inuusuttut ilaasa kinguaassiuutitigut sammisaqarnerminni qanoq iliortarsimanitik usorsitsaarutigisarpaat.

Ajoraluartumik kristumiut inuusuttut aamma taamaaliortarsimapput. Isumaqartarsimagunarput killissaq qaanginngikkunikku ajortumik iliornaviarnatik.

Anersaakkut ajoquserneq

Tamannali ilumuunngilluinnarpoq. Angutaagaanni arnamut arnagaannilu agummut katissimanngisamut qaninngoorineq Biibilip avoqqaaraa. Ilaasa tiinganermik „ajoqutaanngitsumik“ taasaat Biibilip minguttuutut, kanngunartuliornertut uersaanertullu taavai. Ajortuliorneruvoq ingasattoq kristumiut ilagiiviniit anisitaassutaasinnaasoq. — Galâsiamiut 5:19, 21.

Taamaattumik kanngunartuliornermut qanillattuineq soqutaanngitsutut isigineqartariaqanngilaq. ’Uinimmut anersaamullu mingunnartuuvoq’ Guutimut attaveqarnermut ajoqutaangaarsinnaasoq. (2 Korintumiut 7:1) Taamaaliorneq ’eqqarsaatinik aseruinermik Kristusimullu peqqusersuikkunnaarnermik’ kinguneqarsinnaavoq. (2 Korintumiut 11:3) Inuusuttup mingunnartulioqataatinneqartup, mingunnartuliortitsisulluunniit ’uummammigut minguilluni tarnimigullu ilerasuutigisaqarnani uppernermigut pisuusaarnani’ kristumiutut asanninneq nittarsinnaanngilaa. — 1 Timûtiuse 1:5, 19.

Eqqunngitsuliornerminni killissaminnik qaangiisut misigissutsikkut ajornartorsiulersinnaapput. Soorlu atuagassiami Seventeen-imi ilanngutassiami tikkuarneqartoq, tamanna pissuteqarpoq „inuit attualaarinneriaasii assigiinngitsut . . . ima qaninnartigalutillu sakkortutigisinnaasut soorlu atoqatigiiginnarluni“. Kunissuunneq tiinganerlu immaqa timikkut nuannersinnaasarpoq, kingornatigulli ingammik  niviarsiaqqat imaqanngitsutut peqquserlussimasutullu misigisinnaapput. Journal of Marriage and the Family allappoq: „Arnat oqaluttuarput kingornatigut annilaanganeq, pisuuneq, isumakulunneq, peqqusiileqineq aammalu maajunneq misigisarlugit.“

Asanninnerua?

Biibilimi oqaluttuaq Ussatit kapitali 7-miittoq eqqarsaatigeriaruk, angut inuusuttoq atortittartumik kanngunartuliorfigineqartoq. Arnaq ileqqorluttoq angummut inuusuttumut oqarpoq: „Qaa, naammatsilluta atoqatigiikkiartorta, tutissaagut qaanissaata tungaanut.“ Qularnanngitsumik angutip inuusuttup asaneqarnissaminik eqqarsaat kajungerisimassavaa. Iluamilli oqaatigissagaanni atortittartup „piutsersunik oqaluffigalugu maleruutiinnartippaa, oqaatsimigut nakutinniarlugu ussernartumut saatsippaa“. Aap, arnap angut inuusuttoq asanngilaa. Aningaasannanniutigalugu atornerluppaa. — Ussatit 7:18-21.

Taamatuttaaq ullumikkut inuusuttorpassuit — ingammik niviarsiaqqat — atornerlunneqartarput. Ileqqorisassat qaangernissaannik amerlanertigut niviarsiaqqat kimigiiserfigeqqaarneqartariaqartarput. Atuagaq The Compleat Courtship Nancy Van Peltip allataa naapertorlugu „misissuinerup takutippaa [nukappiaqqat] periaasiat nalinginnaanerpaasoq, imatut oqarneq: ’Asagumma angissavarma’“. Atuakkiortoq oqarpoq „pileqqaarneraniilli“ angutit taamatut periaaseqarsimasut.

Guutimilli ajugaqanngitsumit iluarineqanngitsumik iliortitsiniartup ilumut asavaatit? Guutip oqaasia malillugu taamaanngilaq. Biibilip eqqaasippaatigut ’asanninneq ippinnartumik iliortarinngitsoq’. (1 Korintumiut 13:4, 5) Atuakkiortoq Nancy Van Pelt aperivoq: „Piumasani pereerpagu, asanninneranut suna uppernarsaatigisinnaaviuk? Atornerluinnarsimassavaatit.“ — Naleqqiuguk 2 Samuel 13:15.

Nukappiaqqap niviarsiaraq kristumiutut ilinniarsimasaanut akerliusumik ilerasuutigisinnaasaanillu iliortiitigalugu asallugu oqaruni mitaatigiinnassavaa. Nukappiararlu kristumiuuneraruni, kristumiutut upperisani mitaatigissavaa. Sioorasaarinermullu niviarsiaraq nakkaannaruni atornerlunneqassaaq narrunarsarneqassallunilu. Ajornerusorli tassa mingunnartuliussaaq, immaqa allaat kanngunartuliorluni, Guutip inatsisaanik ingasattumik unioqqutitsilluni. — 1 Korintumiut 6:9, 10.

Niviarsiaqqat ilaat piumalluartaraluarput. Piumaqatigiinnerulli ajortuliaq eqqortunngortinneq ajorpaa. „Inuup ingerlavini eqqortuusorigaluarpaguluunniit taamaattoq toqumik isuliffeqaannarsinnaavoq,“ Ussatit 14:12-imi taama allassimavoq.

 Attaveqatigiinnerup ajoqusernera

Isumaqartoqarpoq timikkut tunniusimanerup attaveqatigiinneq nakussatsittaraa. Eqqunngitsumilli atoqatigiinnerup aappassiariinneq nakussatsinneq ajorpaa. Ajornerulersittarpaa. Ataqqeqatigiinneq tatigeqatigiinnerlu millisittarpai. „Kingornatigut angut nuannariunnaarpara,“ niviarsiaraq minguttuliorsimanermut peqataasimasoq nassuerpoq. Imminut naalakkersinnaaneq, naammagittarneq namminissarsiunngissuserlu aappariittut atoqatigiinnermi iluarusussinnaanermut tunngaviupput. (1 Korintumiut 7:3, 4) Amerlasuulli aappassiariinerminniilli namminissarsiorneq ineriartortittarpaat. Imminut naalakkersinnaajunnaarnerup aappassallu misigissusiinik soqutigisaqannginnerup aappariinneq ajortumik aallarnissavaa.

Kunissuutileraanni illigutsannartumillu attualaaleraanni, siuneqartumik oqaloqatigiinneq unittarpoq. Qanimut oqaloqatigiinneq — siunertarisat, kissaatit misigissutsillu pillugit — isumaatsuliornermik pileritsatsitsisumit taarserneqartarpoq. Ussatit 15:22-mi allassimavoq: „Siunnersuisoqarsimanngikkaangat pilersaarutit asuliinnartarput.“ Aappariippassuit aappassiariinnerminni tunngaviliilluarsimanngitsut, katikkaangamik pakatsisutut pisuusutullu misigisarput.

Kissaatipiluit tunuartikkit

Eqqarsaatigisariaqagaq alla Biibilimi Kulorsamiunut allakkani 3:5-imi allassimavoq: ’Avatisi nunamiusut toqulersissigik: uersaaneq, mingunnartut, illigunneq, pilerissutsit ajortut piumatuunerlu, tassa guutipilussiorneq.’ Kunissuunnerup kinguaassiuutitigullu atortunik attualaarinninnerup ’pilerissutsit ajortut’ peersissinnaanngilai eqeersaannassavaali. Angutip inuusuttup Jackimik atillip oqaluttuaraa peeqqanilu taamaalisimallutik: „Aallaqqaammut kuniinnartarpugut. Kunissuuttarnerpulli pikkunarsigaluttuinnarpoq attualaartarnerpullu illigutsannarsigaluttuinnarluni; ataatsimik kanngunartuliungajaavippugut. Nalunngilara iliuuserput Jehovap ileqqoreqqusaanut naleqqutinngitsoq.“

Arnaq inuusuttoq Veramik atilik, assingusumik iliorsimasoq, nassuerpoq kunissuunnerup kinguaassiuutitigullu atortunik attuualaarinerup „atoqatigiinnissamik“ kissaateqalersissimagaani. Ilaatigut ajutoortoqartarpoq. Tiinganeq ajornerusumik nassataqarajuttarpoq. Biibilip takutippaa ajortuliornerup tarnimik nalunngeqatiginninneq misikkarlersittaraa. (Eprîarit 3:13) Pissusissarinngissamik iliortarneq sungiukkaanni, ajortuliat amerliartorsinnaapput. Kanngunartuliornisamut qaninngoorineq tullissaanut aqqutaasinnaavoq. „Eqqarsariaqqaarnaniluunniit attualaaqatigiittoqalersinnaavoq,“ Laura (allaqqaataani taaneqartoq) nassuerpoq, „kingunitsianngua kangunartuliortoqartarpoq. Taamaalisimavunga.“

Ajoraluartumik inuusuttorpassuit taamaalisarsimapput. Ussatitoqaq mianersoqqusivoq: „Kina aamanik saarmioqarsinnaava atisani ikuallatsinngitsoorlugit?“ (Ussatit 6:27) Akissutaa ersarippoq. Kristumiut inuusuttut Guutip mianersoqqussutaa tusartariaqarpaat: ’Tammaqinasi, Guuti mitaatigeqquungilaq, inuk siaruartikkani naapertorlugit katersuiumaarmat.’ — Galâsiamiut 6:7.

Aammattaaq Guutip oqaasiini allassimavoq: ’Kinaluunniit uersaasorluunniit minguttoorluunniit piumatoorluunniit (tassa guutipilussiortoq) kingornussassaqanngimmat Kristusip Guutillu naalagaaffiani.’ (Evfisumiut 5:5) Taamaattumik kanngunartuliornermut qanillattuineq kingunerlussinnaavoq kristumiutullumi Guutip silarsuaani nutaassami naassaanngitsumik inuunissamik neriugisamik annaasaqaataasinnaalluni. — sarĸúmersitat 22:15. (gD 8/2 94)

[Quppernerup ataani ilanngussaq]

[Qupp. 19-mi issuagaq]

Navianarsinnaasut pinngitsoortinneqarsinnaapput arlaqarluni ineriartornartunik iliuuseqarnikkut

[Qupp. 20-mi assiliartaq]

Kinguaassiuutitigut eqqunngitsumik iliuuseqarnerup attaveqatigiinneq ajorsisittarpaa