Biibili qanoq oqarpa?

Kuiseqqittariaqarpa?

LUCILLA eqqissisimanngilaq. Katuullisut peroriartorsimagaluarluni qanittukkut ikinngutini arnaq katuuliunngitsoq Biibilimik ilumoorullugu atuaqqissaaqatigisalersimavaa. Takusinnaavaa Biibili naapertorlugu kuisinneq meeraagallarami ileqqulersuutitut kuisissimanerminit allaanerusoq. „Tassa imaappa kuiseqqissasunga?“ ilumoorluni aperisimavoq. „Annilaangagaara tamanna Guutimut iluarissanngissasoralugu.“

Inuit hundredemillionilikkuutaat, katuullit naaggaartullu, meeraanerminni imermik masatserneqarlutik kuisissimapput. Millionilikkuutaat allat utoqqaaneruleramik arlaatigut morsutsitaallutik kuisissimapput. Kristumiulli kuissutaat sunarpiaava? Kuiseqqinnissaq arlaatigut pisariaqalersinnaava?

Pocket Catholic Dictionary-mi kuisinneq tassaanerarneqarsimavoq „sakramente, inuup imikkut Guutillu oqaasiatigut ajortimut minguiarneqarfia Kristusimilu ernioqqissitaallunilu illernartitaaffia inuunermut naassaanngitsumut“. Aamma tassani kuiseqqinneq pillugu allassimavoq „kuisinnikkut tarneq piiagassaanngitsumik naqissuserneqartarmat kuiseqqinnissaq pisariaqarunnaartartoq“. Biibilili qanoq oqarpa?

Ajoqersorsigit kuillugit

Matîuse 28:19, 20-mi Kristusip makititaasimasup qilaliannginnermini ajoqersukkaminut kuiseqqusissutaa atuarsinnaavarput: ’Taamaattumik aallaritsi, inuiaqatigiillu tamaasa ajoqersuganngortissigik, Ataatap Ernerullu anersaallu illernartup aqqanut kuillugit; ajoqersorsigillu ilissinnut peqqusakka tamaasa maleruaqqullugit.’ Ersarippoq kueqquneqartut tassaammata kristumiut ajoqersukkat, Kristusip peqqussutaanik maleruaanissaminnik ilinniarsimasut — tassa naalungiarsuunngitsut. * Tamanna Biibilimi eqqartorneqartumut inuit inersimasut imermut morsutsitaallutik kuisissimanerannut naapertuuppoq. Aammaa Kristus Jesus taamatut Johannes Kuisisumit kuisissimavoq. Biibilimi oqaluttuarineqarpoq Jesus Jordanip kuussuani kuisereerami ’erniinnaq imermit qaqisimasoq’. (Matîuse 3:16) Aap, Biibilimi eqqaaneqarpoq Johannes naammattumik imilimmi kuisivissarsiortarsimasoq. — Juánase 3:23.

Kingorna Etiopiamiup kuisinnerani pisimasoq Biibilimi ima oqaluttuarineqarpoq: ’Tamarmillu imermut  aqqarput, Filipilu kunngillu kiffarsua; kuivaalu.’ Taavalu oqaatigineqarpoq ’imermit qaqisimasut’. (apustilit suliait 8:38, 39) Kuisinerit taakku oqaatsip griikerisuup baptiʹzōp, „kuisineq“-p, bapʹtōmik, „misuppaa, morsutsippaa“-mik isumaqartumik, nagguillip isumaanut nalinginnaasumut naapertuupput.

Kuiseqqinnermik Biibilimi oqaluttuaq

Inuimmi millionilippassuit naalungiarsuunerminni kuisissimasut imaluunniit morsutsitaalluinnarsimanngitsut? Kuiseqqissagunik tulluarpa? Pisimasup apustilit suliáinik agdlagkat 19:1-7-imi eqqartorneqartup akissutississavaatigut. Qularnanngitsumik ukiumi 52/53-imi ukiukkut apustilip Paulusip illoqarfimmut pigissaarfiusumut Efesusimut Asiaaqqamiittumut tikeraarnerani tamanna pisimasuuvoq. Tamaani ajoqersukkat kuineqaqqittariaqartut naapippai. Paasigamiuk angutit taakku Johannesip kuissutaanik kuisissimasut ’Naalakkap Jesusip aqqani’ kuivai. Paulus isumaqanngilaq taamaaliorneq Guutip iluarissanngikkaa. Nalunanngitsumillu kuisinermik tamatuminnga iluarinninnini Guutip ersersippaa kuisittut anersaap illernartup tunissutaanik tunillugit.

Angutit aqqaneq-marluk taakku kuissut Messiasillu, Kristus Jesusip, inissisimanera pillugit ajoqersuutini akueriumasimanngitsuuppassuk Paulusip kuinavianngikkaluarpai. Piumasarisat eqqorteqqaarlugit aatsaat kuisissinnaasimapput. Taamaattumik Guutimit iluarineqarlutik kuiseqqipput.

Kuisinnissamut piumasaqaatit

Kuisinniaraanni piumasarisat suut eqqorteqqaartariaqarpat? Inuppassuit ukiumi 33-mi piinsip ulluani kuisissimasut eqqarsaatigikkit. Piumasarisat suut eqqorteqqaartariaqarsimavaat? Juutisut juutinullu ilanngussimasutut Jehova Guuti, taassuma innuttaminik iliorfiginneriaasii kiisalu Messiasimik taassuma neriorsuutigisaanik siulittuutit pillugit ilisimasaqarluareerput. Aammalu ullormi tamatumani Peterip oqalugiaataatigut isumassarsiarititaasukkut aamma suli allanik ilisimasaqalersimapput. Tamanna qanoq kinguneqarpa?

’Tamannali tusaramikku uummatimikkut killinneqarput, Peterimullu apustileqataanullu oqarput: „Angutit qatanngutivut ukorsii, qanoq iliussaagut?“ Peterillu oqarfigai: „Allamik isumataaritsi, nungullusilu kueqqugitsi Jesus Kristusip aqqagut ajortit isumakkeerneqaatissaannik; taava anersaap illernartup tunissutaa pigilerumaarparsi.“’ (apustilit suliait 2:37, 38) Malugiuk Peter qarsupittumik nalunaajaanngimmat. ’Allanillu oqaatsinik amerlanernik nalunaajaaffigai kajumissaarlugillu.’ Tunngavilersuutaanit qularunnaarsinneqarput, oqaasii akueralugit kuisillutillu. ’Ullormilu tamatumani [tarnit, NV] pingasunik tuusintillit missigisaat ilanngutitaapput.’ — apustilit suliait 2:40, 41.

Ullumikkut kuisinneq Biibilimit atortussaatinneqassappat piumasarisat suli taakkuupput: (1) eqqorluartumik ilisimasaqarneq, (2) ilumoorluni isumataarneq aamma (3) allamut saanneq, tassa ’kinguaariit uku killormoortut’ tunullugit Guutimut saanneq. Aammalu kuisinneq Biibilimit atortussaatinneqartoq ’Jesus Kristusip aqqani’ pisariaqarpoq, tassa ajortinik isumakkeerneqaatissatut utertitsissutitut taassuma pilliutaa akueralugu Guutillu kunnginngortitaatut naalatsigitiffigalugu. — apustilit suliait 2:40, (NV); Rûmamiut 5:12-19; 7:14-25.

Inuit eqqortumik isumallit kuisinnissamut Biibilimi piumasaqaatigineqartunik eqqortitsisut kuiseqqinnermikkut Guutimit iluarisaannginnissartik annilaangassutigisariaqanngilaat. Akerlianimmi Guutip nuannaarutigisarpaa inuit piumasaqaatinik eqqortitsisut Biibili naapertorlugu kuisikkaangata. (gD 8/1 94)

[Quppernerup ataani ilanngussaq]