Biibili qanoq oqarpa?

Guutip sumik tuppallersaatissaqartippaatigut?

„ALIASUNNERUP TAMATTA MEEQQATUT ILITITTARPAATIGUT — SILAQASSUTSIKKUT ASSIGIINNGISSUTSIT TAMAASA PEERTARPAI. ILISIMASAQARNERPAALLUUNNIIT ILISIMASAARUTTARPUT.“ — RALPH WALDO EMERSON, 1800-KKUNNI TAALLIORTOQ AMERIKAMIU.

TOQUP ALIANARTUA aliasutsitsiinnartanngilaq, aammali qimagaasumik uiugaluarpat, nuliaagaluarpat, qitornaagaluarpat ikinngutaagaluarpalluunnit, nukillaartitsisinnaasarpoq. Silatuut immaqa apeqquteqartaraluarput tuppallernartumilli akissutisissanatik, nukittuullu allaat aamma aliasuttarput tuppallersaatissarsissanatilli. Biibilimik atuartartut immaqa eqqaamavaat David ernermi pikititsiumatuup Absalomip toqutaanera tusaramiuk kappialasoq: „Ernera Absalom! Illit pinnak uanga toqusimasariaqaraluarpunga! Ernera Absalom! Ernera!“ (2 Samuel 18:33) Tamanna kunngip pikitsitsiumatooq pillugu nillernerinngilaa; tassaavorli ataatap ernermi toqunera pillugu kappialanera. Immaqa aamma illit ilaquttannik, qanigisannik ikinngutinnilluunniit annaasaqarlutit taamatut misigisimavutit.

Aliasuuteqartilluni apeqqutit imaattut qaffakaateqqajaanartarput: ’Sooq taama pisoqarpa? Guutip nalunngissimavaa taama pisoqassasoq? Nalunngissimaguniuk sooq pinngitsoortissimanngilaa?’ Naak Biibilip toqusunik makittoqarnissaanik neriorsuutaa nalunngilluaraluarlugu tuppallersaatissarsinissaq sioqqullugu sulissutigeqqaagassanik eqqarsaatersortoqarsinnaasarpoq.

Akissutit eqqunngitsut tupallernavinngillat, isumakkullu eqqissisitsineq ajorlutik. Qimagaasoq oqarfigineqaruni ’Guutip toqusoq angerlartissimagaa’, narrutsassimaalersinnaavoq Guutimillu tunussilluni. Ilumoortoq Biibilimi atuarneqarsinnaavoq, apeqqutinullu alisunnermut tunngasunut akissutaasa Jehova Guutimik ajattuilersinneq ajorpaatigut, taassumunngali qaninnerulersittarluta. Korintumiunut agdlagkat áipait-ni 1:3, 4-mi oqarfigineqarpugut Jehova tassaasoq Ataataq nallittuisoq aamma Guuti tamanik tuppallersaasoq.

Guutip ilisimassusia pissaaneralu oqimaaqatigiissut

Jehova Guutip, Ajugaqanngitsup, pinngortitarsuarmini pisut tamaasa malinnaaffigai. Tussiaat 11:4-mi ima allassimavoq: „Qilammi ippoq [Jehovap] issiavissaarsua, isai nakkutilliipput, isigernata inuit misissuiffigai.“ Eprîarit 4:13-milu apustili Paulus allappoq: ’Pinngortitamik taassumunnga ersinngitsoqanngilaq.’ Guutip sunik tamanik ilisimasaqaannanngilaq — aammali soqutigaatigut! Soorlu Jesus oqarsimasoq: ’Qupaloraarsuit marluk aningaasat minnertaannik akeqartarinnginnerpat? Taakkualu ilaat ataaserluunniit nunamut nakkarnavianngilaq Ataatassi peqqunngippani. . . .Qupaloraarsuppassuarnit pingaarneruvusi.’ — Matîuse 10:29, 31.

Ilaquttatta ikinngutittaluunniit ilaata toqujaarnera Guutip pinngitsoortissinnaasimagaluarpaa? Aap, taamaaliorsinnaagaluarpoq. ’Guutimut ajornartoqanngilaq’, Jesus oqarsimavoq. (Mákorse 10:27) Itsaq Jehovap Ezekiasip toqulersup  qinnutaa tusarsimavaa ajorunnaarsillugulu, ukiualunnillu inuunera ilallugu. (Jesaja 38:2-5) Qularutigineqarsinnaanngilaq Jehovap piumasani tamaasa naammassisinnaagai, paasisariaqarparpulli piumasani qanoq aqunnerai. Napparsimasorujussuarnik aqqunartiterujussuarsimasunillu ajorunnaartunik tamatta atuarsimavugut. Imaappa Jehovap piffissaatillugu akulerunneratigut ajorunnaarsimasut?

Inuit ilaat nakorsaruminartaqaat, inoorusungaassusermik pigisaqarlutik. Tamanna tupinnartuliatut misinnartumik ajorunnaartarnerannut nassuiaataasinnaavoq. Immaqaluunniit nutaamik nakorsarneqalernerminnut ajunngitsumik qisuariarsimapput. Taamaattumik taamaattoqartillugu ingerlaannaq isumaqassanngilagut Jehova akuliussimasoq. — Filípimiut 4:13.

Sooq inuit toqusartut Guutip oqaasiani nassuiarneqarpoq

Rûmamiunut agdlagkat 5:12-mi apustilip Paulusip paasiuminartumik nassuiarpaa siuaasarput Adam Pinngortitsisiminut pikitsisigami naapertuilluartumik toqumut pillagaasimasoq. Adamip kinguaavisut ajortiliuvugut taamaattumillu toqusarluta. Inuuginnarnissatsinnut qularnaveeqqutissaqanngilagut. Kunngip silatuup Salomonip uparuuppaatigut tamatta periarfissap nalaatsornerullu ataanniittugut, taamaattumillu sukkulluunniit ajunaarnikkut toqusinnaasugut toqussutaasinnaasumilluunniit nappaateqalersinnaasugut. Nappaammilluunniit inunnguuserisamik inuunerput sivikillisarneqarsinnaavoq. Salomonip aamma eqqaavaa Guutimut suna tamarmi aalajangersagaasumik piffissaqartoq, aamma katsorsaanissamut — ataasiakkaanuinnaanngitsoq ikittunuinnaanngitsorlu, uppernermilli ilumoortumik ersersitsisunut tamanut. Tamanna Jesus Kristusip aqutsinerani pissaaq. — Nalunaajaasup oqaasii 3:1; 9:11; 1 Korintumiut 15:25, 26.

Eqqaamajuartariaqarparput kristumiut ajunaarnernut inuiaat nalaattagaannut immikkut sernissugaanngimmata. Inuit allat tamarmik atortagaat atortarpavut. ’Allamik usserneqanngisaannarpusi kisianni inuit atortagaannik.’ — 1 Korintumiut 10:13.

Aliasunneq qanoq qaangerneqarsinnaasoq

Toqusoorluni aliasuuteqaraanni silatusaarnerussaaq qamannga pisumik ilumoortumillu Jehovamut, qinnutinik tusartartumut, qinunissaq. Guuti qanilliuk, aatsaat taama qanillitigalugu. Uummatinnik aammaaffigiuk siornatigornit annermik — siuneqassusermik atugarilikkannullu nutaamut naleqqussarsinnaanermut nukissanik qinnuvigiuk. Biibilip taamatut kajumissaarpaatigut. Peter oqarpoq: ’Isumakuluutisi tamaasa taassumunnga pisissigik, isumassormasi.’ (1 Pîtruse 5:7) Guutillu oqaasiani Jesaja 57:15-mi tuppallernartumik allassimasoqarpoq: „Ima oqarpoq tamanit qutsissisitaasoq, naassaanngitsumut issiavissaarsuarmi issiasoq, aqqa tassaasoq Illernartoq: Ineqarpunga qutsinnermi illernassutsimilu, aammattaarli sequmisitaasumi anersaakkullu nikallorsimasumi.“ Aliasungaartoq Ataataminut tunniusimasarpoq qaninnerulerlugulu. ’Guutimut palligunniaritsi, taava ilissinnut palligutissaaq,’ Jakob allappoq. (Jâko 4:8) Neriorsoqqissaarpaatigut Guutip ilisimassummik nukissanillu pisariaqartunik tunissagaatigut aliasunnitsinnut qaangiissutaasussamik.

Aammaattaaq allat ajornartorsiorneranni nalaataqarnerannilu misiginneqataasinnaaneq ineriartortinneqartarpoq. Allat qanoq misigineri tuppallersarniarlugillu neriuuteqalersinniarlugillu qanoq oqaaseqarsinnaaneq ilikkarneqartarpoq. Immaqa allat aliasunnerini annertoqqutaalersoqarsinnaavoq. Aap, allat aliasunnerini misiginneqataanerulernarpoq. — Filípimiut 2:1.

Qanigisamik ikinngummilluunnit annaasaqarneq artornarsinnaavoq, immaqalu aliasunnerup peernissaanut piffissaq sivisusinnaalluni. Sivisunerusorli eqqarsaatigalugu aliasuuteqarnani Guutimut kiffartornissamik neriuut misigisap uummarissarsinnaavaa. Immaqalu kristumiutut pissutsitsigut nakuunerulerluta aliasunneq qaangersinnaavarput. — 1 Pîtruse 1:6, 7.

Taamaattumik aliasuuteqaraangavit nakkaannartaqinak! Aalajaallutit ilumoorlutillu Guutip kiffartuuttuarnissaa aalajangiusimajuk, taassumunnga ataqqinaataasumik naalannaataasumillu naassaanngitsussamullu annassutissannik. (gD 8/3 94)