Inuusuttut aperipput

Uppinngitsumut asannilersooraluaruma, taava?

„Ajornartorsiuteqarpunga,“ niviarsiaq kristumiu nassuerpoq. „Sanilera ajuutigeqaara. Pitsaaqaaq isumassuiumatoqalunilu — kisianni Jehovamik asannittuunngilaq. Nalunngilara taassuminnga nuannarinninnera kukkusuusoq, taassumunngali misigissutsikka qanoq aqussallugit naluara.“

Mark 14-inik ukioqarluni taamatut misigisaqarsimavoq. Niviarsiaq uppeqatiginngisani ajuutigilersimavaa. * „Najortigiilluni, katissimalluni, qanoq innersoq takorloortarsimavara,“ oqarpoq. „Nalunngilarali tamanna kukkusuusoq.“

Inuusuttuaraatilluni misigissutsit sakkortuseruttorfianni ajuutiginnilersooqqajaanarlunilu asannilersooqqajaanartarpoq. (Naleqqiuguk 1 Korintumiut 7:36.) Misigissutsit taamaattut tutsiffissaqartinnagit inuusuttuaqqat ilaat ilinniartitsisunnarinerpaasaminnut, isiginnaartitsisartunut assigisaannulluunniit ajuutiginneqqajaasarput. Inersimasunik taama ittunik peeraqarnissaq amerlasuutigut anguneqarsinnaaneq ajormat ajuutiginninnerit taama ittut sivikitsuinnaagajupput perlasinarpiaratillu. * Taavami peqatinnut — aamma ilinnik ajuutiginnittumut attaveqarfiginnikkusuttumullu — ilittulli upperisaqanngitsumut asannileruit?

Ilaasa tamanna ajornartorsiutitut isiginavianngikkaluarpaat, oqarlutik inuusuttorpassuit upperisarsiornermut soqutiginnilaartuusut, allaallu allamik upperisaqaraluarlutik iluarinartuusut. Allaat inuit akaarinnittuusut tamanna akuersaarumassavaat. Inersimasorpassuilli peerariinnerit taamaattut ajornartorsiutinik nassataqarnerat nalunngilaat, amerlanertigummi katinnermik kinguneqartarmata. Taamaattumik atuakkiortoq Andrea Eagan inuusuttunik ima siunnersuivoq: „Arlaannarsiluunniit upperisarsiornermik pingaartitsisuunngippat taava upperisarsiornikkut tunuliaqutarisat pingaaruteqartorsuunngillat. Upperisarsiornikkulli iliuuseqarneq arlassinnut tamassinnulluunniit pingaaruteqarpat taava upperisassi assigiinnginnera eqqarsaatigineqartariaqarpoq. Uppeqatigiittariaqanngilasi . . ., inooqatigiissinnaanasariaqarpusili.“

Siunnersuutit taama ittut silatuujorpasikkaluarput. Iluamilli oqaatigalugu ’ilisimassutitut silap matuma piatut nipeqarput’. (1 Korintumiut 3:19) Biibilimi ersersinneqarpoq uppertup uppinngitsullu akornanni ajuutigiinneq apeqqutinik aappariittut inooqatigiinnermit pingaarneroqisunik attuisartoq. Jehovap nalunaajaasuisa akornanni inuusuttut nalunngilaat tamatumani Guutip oqaasianut naalannissaq pineqartoq, tassanimi kristumiut kajumissaarneqarmata taamaallaat  ’Naalakkami’ katinnissaminnik. (1 Korintumiut 7:39) Peerariinneq aliikkutaannaani aappriinnermut aallarniutaammat Guutip kiffaa Jehovamut tunniulluinnarsimanngitsumut asanninniarsariguni Guutimit iluarisaanavianngilaq.

Taamaakkaluartorli nalunaajaasut inuusuttut ilaat uppinngitsumut ajuutiginnittarput. Qanoq ililluni tamanna pisarpa? Illit taamaalissagaluaruit qanoq iliortariaqassavit?

Qanoq tamanna pisartoq

Siullermik paasiuk inuit tamarmik kukkuluttortartut. „Kia piaarinani kukkunini malugisarnerpai?“ (Tussiaat 19:13) Ingammik inuusuttut ajuutiginnerujussuartillutik kukkuluttorsinnaasarput. Sooq? Pissutaaginnarpoq paasisimasaqassuseq misilittakkatigut pilersartoq amigaatigigamikku. (Ussatit 1:4) Kristumiut inuusuttuaqqat nukappiaagunik nivissanik niviarsiaagunillu nukappissanik peqateqarneq misilittagakiffigeqigamikku ajuutigineqarnertik qanoq qisuariarfigissanerlugu nalusarpaat.

Sheila atuaqatiminit ajuutigineqarluni paasigamiuk taamatorluinnaq misigisimavoq. „Oqaluttuarisinnaavara nuannarigaanga,“ Sheila oqarpoq. „Ulloqeqqarninni ornittarpaanga nereqatigalungalu. Atuagaateqarfimmi ilinniagassaleritillunga ornittarpaanga.“ Sheilap nukappissamut misigissusii alliartulersimapput. Aamma Mark, eqqaaneqareersoq, ima oqaluttuarpoq: „Niviarsiaq taanna eqaarsaarnermi takujuaannarpara. Arlaannik iliuuseqartarpoq qanilliniarlunga oqaloqatiginiarlungalu. Taamaammat ikinngutigiilernissaq ajornarsimanngilaq.“ Pam 14-inik ukiulik nukappissap saniliata sukataarfigingaaramiuk assammiumik tunisimavaa.

Nassuerutigisariaqarporli sukataarfigineqartut tassaaginnarneq ajormata Jehovap nalunaajaasuisa inuusuttaat. Nukappissap kristumiup Jimimik atillip imminut soqutiginninnera niviarsissap qisuariarfigisimavaa. Nukappissap qanoq iliorsimanini allatut ajornartumik nassuerutigisariaqalersimavaa ullut ilaanni niviarsiaraq Jehovap nalunaajaasuisa ataatsimiittarfiannut isermat ujarluni!

Pissutsit qanorluunniit ikkaluarpata nalunavianngikkaluarpat taamaaliorneq kukkunerusoq. Ajuutigineqarnerli sumiginnarniassallugu ilaannikkut ajorkusoorsinnaasarpoq. Andrew eqqarsaatigeriaruk. Ilinniarnertuunngorniassatut atuarnerata ukiuata siulliup nalaani angajoqqaavisa avinniarnertik ingerlassimavaat. „Oqaloqatissannik pisariaqartitsisimavunga,“ oqaluttuarpoq.  Atuarfiani niviarsiaqarpoq Andrewimut qiimmannartunik oqaaseqartartumik. Erniinnaq kissalaarfigeqatigiilersimapput.

Navianaat

Misigissutsit taama ittut unitsinniarlugit iliuuseqarfiginngikkukkit annertuumik ajornartorsiulersinnaavutit. Ussatit 6:27-mi ima allassimavoq: „Kina aamanik saamioqarsinnaava atisani ikuallatsinngitsoorlugit?“ Niviarsissap Kimimik atillip misigisimasaa eqqarsaatigeriassagit. Naak kristumiutut peroriartorsimagaluarluni atuarfimmi nukappissamut misigissutsini maleruuffigiinnarsimavai. „Taanna atuarfimmi nuannarineqarnerpaajullunilu pissanganarnerpaavoq,“ Kim oqaluttuarpoq. Sivitsunngitsoq fistattunut isertuaratik ikiaroortunut isertortumik najuuttalerpoq. „Ersisorujussuuvunga, taassumunngali asannittupilussuuvunga. Naggataatigut naartulerpunga.“ Kim peeqqaminut katippoq, taannali kingorna sakkulersorluni tillinniarsimasutut parnaarussaavoq. Biibilip mianersoqqussutaa aamma tamatumuunakkut eqquussimavoq: ’Ajortut ikinngutigalugit ileqqut ajunngitsut aserortarput.’ — 1 Korintumiut 15:33.

Taamaalilluta oqarnianngilagut inuusuttut Jehovamut nalunaajaasuunngitsut tamarmik ileqqorluttuusut imaluunniit ikiaroortartuusut. Inuusuttulli tamakku inuusuttut nalunaajaasut eriagisaannik, isumaannik anguniagaannillu peqatiginngilaat. 1 Korintumiut 2:14-imi nassuiarneqarpoq uppinngitsup ’Guutip anersaavata pii ilassineq ajorai, sianiitsutut isigalugit ilisarinerlu saperlugit anersaakkut ittumik misissortariaqarmata’. Eqqarsaatigiuk upperisarsiornikkut eriagisatit misigissutsinnut qanoq sunniuttartigisut — kristumiut ataatsimiinnerini nuannaartarnerit, inummut tusarumasumut Biibilimik tusarliigaangavit angorniortarnerit Biibilimillu namminermik atuaqqissaaraangavit iluarusuttarnerit. Misigissutsinnik taama ittunik uppinngitsup paasinniffigisinnaassanerpaatit — nuannaaqatigisinnaassanerpaatilluunniit? Taamaannavianngilaq.

Taamaattumik Paulusip kristumiut ima oqaappai: ’Uppinngitsut uniaammik allanertamik uniaqatigeqinasigik. Iluarnerummi iluaanneq sukkut peqatiginerpaa? Qaamasorlu taartorlu sukkut ilagiissuteqarpat? Belial Kristusip sukkut isumaqatiginerpaa? Uppertulluunniit uppinngitsoq sukkut agguaqatiginerpaa?’ (2 Korintumiut 6:14, 15) Inuusuttuaqqap Sonyap tamanna paasigasuarsimavaa uppinngitsumik ajuutiginnileraluarnermini. Ima nassuerpoq: „Ilungersuussininnik Jehovamillu asanninninnik avitseqatiginninngitsumut attaveqarneq kiserliornerit misigineqarsinnaasut kiserliornarnerpaartaraat. Misigissutsikkut artorsarnartorujussuuvoq. Sallusuissut inuuninni ingerlaasigigukku arlaannut avitseqatigisariaqarpat — pinngitsoornak! Sallusuissut aappannut avitseqatigiissutigisinnaanngikkukku imaqanngitsutut misigissaatit, uppinngitsuummammi.“

Aappariinni taama ittuni upperisarsiorneq tunngaveqatigiiffiunani oqqassutaanerusarpoq. Oqqatinnginniassagassi anersaakkut soqutigisatit nipangiusimasariaqarlugit misigeqqajaasassaatit. Taamaalioruilli anersaakkut peqqissutsit aseruinnassaaq. Arnaq inuusuttoq ima oqaluttuarpoq: „Nukappissamut nalunaajaasuunngitsumut qanittuararsuanngorsimavunga. Ikinngutigiittulli qanilliartuinnartilluta paasilerpara asannilerfigalugu. Arriitsuararsuarmik Jehovamut attaveqarnera uannut pingaarutaarukkiartorpoq; nukappissamut taassumunnga attaveqarnera uannut pingaarnerpaanngorpoq. Ataatsimiigiarusukkunnaarpunga, kristumiutut qatanngutikka ilagerusukkunnaarlugit oqaluusserusukkunnaarlungalu. Tamanit kissaatiginerpaasara tassa taassuma najornissaa. Ukiuni tulliuttuni marlunni nalunaajaasutut uninngavunga. Taamaakkaluartorli asanninninnik ’ikinngutima’ akinngisaannarpaanga. Eqqarsaatiguartarpara ullut arlaanni asanninnera akiumaaraa, taamaaliunngisaannarporli.“

Aap, upperisarsiornikkut ileqqussatigullu eriagisannik ilinnik avitseqatiginninngitsumik attaveqalerneq aliasuutinik pilluaannermillu nassataqarsinnaaqaaq. Silatusaarneruvoq ’uniaammik allanertamik uniaqatiginninnissap’ tunuarsimaarfigilluinnarnissaa. (gD 22/5 94)

[Quppernerup ataani ilanngussat]

[Qupp. 11-mi assiliartaq]

Anersaamut tunngasunik angorniuutiginninnikkut uppinngitsup avitseqatigiumassanerpaatit?