Biibili qanoq oqarpa?

Apustili Paulus arnanut akerliusimava?

APUSTILIP Paulusip ajoqersuutaa „isummanut arnanut akeqqersimaarpaluttunut ilagiinni kristumiuni atuuttunut tunngavissatut atorneqartarsimavoq“. Eqqartuussisoq Cecilie Rushton New Zealandimi Aucklandimeersoq allakkiamini, Cypernimi Commonwealthip nunataani 1993-ip aallartilaarnerani inatsisitigut ataatsimeersuartoqarnerani saqqummiussamini, taama ilaatigut allassimavoq. Aamma ima allassimavoq: „Timoteusimut allagaani eqqarsartaasia qulaarneqarpoq: ’Akuerissanngilarami arnaq ajoqersuiniartoq uiminullu naalagaaniartoq, kisianni malunnarnaveersaartoq [nipaalluni inuusoq, NV].’“ — 1 Timûtiuse 2:12.

Arnap inissisimaffia Paulusip allaatigigamiuk imaaginnarpa nammineq inuttut isummani anikkaa, imaluunniit Guutimit isumassarsisitaalluni allassimanerpa? Paulusip allagai ataatsimut isigalugit arnanut akeqqersimaarpaluppat? Paulusip Timoteusimut oqaasii qulaani issuarneqartut sumut atatillugu oqaatigisaappat?

Paulusip piginnaaneri

Kristumiut Allagaataanni Griikerisuuni allakkat 27-iusut ilaat 14-it Paulusip allagarai. Anersaap illernartup Paulusimi sunniinera paasineqarsinnaavoq tupinnartuliakkut oqqanik oqalunnermik tunissummik pigisaqarneratigut. Aamma nammineq uppernarsarsimavaa qutsissumeersunik takorruuisitaasarsimalluni. (1 Korintumiut 14:18; 2 Korintumiut 12:1-5) Paulusip imminut pilliutigeriaannaassutsimigut, tamarmiusumik uummateqarnermigut asannittuunermigullu maligassiaa pissutaalluni taassuma kristumioqataasalu akornanni qatanngutigiittut asanninnerup nimia qanimut ataqatigiissutaalersimavoq. (apustilit suliait 20:37, 38) Allagai, ilaatigut arnat pillugit allagai, ’allakkanut tamarmiusunut Guutip anersaavanit isumassarsiarititaasunut ilinniartitsinermullu iluaqutaasunut’ ilaapput. — 2 Timûtiuse 3:16, NV.

Paulusip arnanik eqqartuisarnera

Paulusip allagaani naammattorsuarnik takussutissaqarpoq arnanut akuersaartuullunilu ataqqinnittuuneranut. Arnat ilagiinni ilaqutariinnilu pingaaruteqarfii assigiinngitsut arlaleriaqaluni eqqartortarpai. Anaanap milutsitsisup ilisarnaataa iluarinartoq allakkami ilaanni assersuutitut atorpaa kristumiut paarsisut qanoq ittuusariaqarnerat eqqartoramiuk. — 1 Tásalûníkamiut 2:7.

Apustilip allakkamini qatannguterpassuit kristumiut nersualaartarpai aqqisigullu taasarlugit. Ilagiinnut Romamiittunut ilaasut inuulluaqqussuteqarfigigamigit arnat marluk ’Naalakkami sulingaaqisut’ immikkut taasimavai. (Rûmamiut 16:12) Aammalu Evodia Syntykelu innersuussutigiitigalugit Filippimi  qatanngutit angutit kajumissaarsimavai ’arnat taakku iivangkiiliu pillugu assorooqatigisimasani ilitsersortuaqqullugit’. (Filípimiut 4:3) Timoteusimut allakkami aappaanni Timoteusip aanaa, Lois, anaanaalu, Eunike, uppernermikkut maligassiuilluarsimanerannik nersualaarpai. — 2 Timûtiuse 1:5.

Kristumiulli qatanngutit arnat Paulusimik qanoq isiginnissimanerannik ilisimasaqarpugut? Aappariit Akvila Priskalu qanimut attaveqarfigisani qutsavigisimavai Akvilaannaanngitsup aammali Priskap ’inuunini pillugu imminnut navianartorsiortissimanerannik’. — Rûmamiut 16:3, 4.

Paulus arnanut akeqqersimaartuusimava?

’Angut utoqqaq appisaluussanngilat, kisianni oqaanniassavat ataatattut ilillugu, inuusuttullu qatanngutittut ilillugit, arnallu utoqqaat anaanattut ilillugit, arnallu inuusuttut qatanngutittut ilillugit tamatigut minguillutit.’ (1 Timûtiuse 5:1, 2) Paulusip Timoteusimut oqaasii taakku arnanik ataqqinnilluarneranut takussutissaannginnerpat? Paulusip angutit arnallu ilagiinni kristumiuniittut naligiimmik ataqqinassuseqartutut oqaatigai ima oqarami: ’Naami juutillu griikerillu, naami inussiallu inussiaanngitsullu, naami angutillu arnallu, tamassi ataasiugassi Kristus Jesusimi.’ — Galâsiamiut 3:28.

Aappariinnermi inissisimaffiit Guutimeersut pillugit Paulus ima allappoq: ’Ilissi arnat, uisi naalassigik soorlu Naalagaq, arnap uini niaqorimmagu, soorluttaaq ilagiit Kristus niaqorigaat; taanna timaata annaassisigaa.’ (Evfisumiut 5:22, 23; naleqqiuguk Korintumiunut agdlagkat siugdlit 11:3.) Angutit arnallu pingaaruteqarfii assigiinngimmata imaanngilaq aappaa nikanarnerusoq. Aappariit tamarmik immikkut pingaaruteqarfimminni tapertareeqatigiipput, marluullutillu immikkut pingaaruteqarfitik eqqortikkunikkik ilaqutariinnut ajunngitsussamik siuarsaassapput. Uiusullu oqartussaassutsi naqisimannittumik asanninngitsumilluunniit atortussaanngilaa. Paulus ima nangippoq: ’Taama angutit nuliatik asasariaqarpaat soorlu timitik,’ nuliatik pillugit annertuumik pilliuteqariaannaallutik. (Evfisumiut 5:28, 29) Meeqqat ataataminnut aamma anaanaminnut naalattussaapput. — Evfisumiut 6:1, 2.

Aamma aappariittut inooqatigiinneq pillugu Paulusip oqaasii eqqarsaatigisariaqarpavut. Nakerisarsiunngivilluni Paulus allassimavoq: ’Angutip nulii ileqqussamisut ilassiliuk; taamattaaq nuliaasup uini. Uilik timiminut naalagaanngilaq, kisianni uia; taamattaaq nulialik timiminut naalagaanngilaq, kisianni nulia.’ — 1 Korintumiut 7:3, 4.

’Arnaq malunnarnaveersaartuussaaq’

Paulusip Timoteusimut agdlagkat siugdlit 2:12-imi, ilanngutassiap matuma aallaqqaataata tungaani issuarneqartutut, eqqaagamiuk arnat ’malunnarnaveersaartuussasut’, imaappa arnanut akeqqersimaartuusoq? Naamik! Oqarami ’arnat malunnarnaveersaartuussasut’ ilagiinni ajoqersuineq anersaakkullu oqartussaassuseqarneq eqqarsaatigaa, angutip arnallu akornanni pissutsinik Guutimit aalajangerneqarsimasunik taaneqareersunillu pissuteqartoq. *

Tamanna isumaqanngilaq arnat inunnik allanik sallusuissummik Guutimeersumik ilinniartitsisinnaanngitsut. Paulusip arnat utoqqaat kajumissaarsimavai arnanik inuusuttunik ’ajoqersuilluassasut’, tassa suna ajunngitsuusoq ilinniartitsissutigissagaat. Eunikep Loisillu Timoteus ajoqersorsimavaat, taamaalillutillu anaananut kristumiuusunut meeqqanik Guutip aqqutigeqqusaanik ajoqersuinikkut maligassiuilluarlutik. (Títuse 2:3-5; 2 Timûtiuse 1:5) Ullumikkut Jehovap Nalunaajaasuisa ilagiivini arnaqarpoq hundredetuusintilikkuutaanik Eunikep Loisillu maligassiaannik malinninnermikkut anersaakkut annertuumik nalerisimaarutissaqartunik. Aap, nutaarsiassaq nuannersoq kikkunnut tamanut oqaluussissutigisarpaat angutinillu arnanillu ajoqersuganngortitsiortorlutik. — Tussiaat 68:12; Matîuse 28:19; Filípimiut 4:2, 3.

Maanna qanoq isumaqalerpit? Paulusip allagai ataatsimut eqqarsaatigissagaanni taassuminnga arnanut akeqqersimaartuuneraaneq tunngavissaqarpa? (gD 8/7 94)

[Quppernerup ataani ilanngussaq]