Ikummatissaq sipaartarpiuk imaluunniit maangaannartittarpiuk?

TULUIT-NUNAANNI ITERITSI!-P ILANGUTASSIORTUANIT

IKUMMATISSAQ 1 milliard dollarit missaani nalilik, illoqarfimmi Chicagotut atsigisumik ikummatissaqartitsisinnaasoq, ukiut tamaasa USA-mi maanngaannartinneqartarpoq. Qanoq ililluni? Atortorissaarutit soorlu qarasaasiat, telefaxit, videomaskinat, TV, nipilersuutit allaallu kaffiliorfiit, qamiusaannarlugit qimanneqartarput. Taamaaliortarput nalunaaqutartaasa eqqaamannissinnaaneri atornissaminnullu inissinneqarneri tammaqqunagit, imaluunniit atortorissaarutit atoriaannaaniassammata.

Naatsorsuisoqarsimavoq Tuluit-Nunaanni ikummatissaq atortorissaarutinut qamiusaannaqqasunut ukiumut atorneqartartoq innaallagissiorfiit innaallagissiortariaqarnerat pissutigalugu tonsit millionit affaasa missaannik kiammik ungusisumik gassiliortartoq. Gassi taanna nunarsuup silaannartaanut ingerlasarpoq nunarsuullu kiannerulerneranut pisooqataagunarluni. „Inuusuttut atuisut akornanni mingutsitsinaveersaarneq pingaartinneqaraluartoq, taamaallaat ikittuinnaat takusinnaavaat innaallagissiorneq nunarsuullu kiatsikkiartornera imminnut attuumassuteqartut,“ Londonimi aviisimi The Times-imi allassimavoq.

Eqqarsaatigilluarneqarsimanngilaq atortorissaarutit innaallagissamoortut amerlanerit qamiusaannaqqatillutik atorneqarnermisulli innaallagissamik atuitigisut. Assersuutigalugu satelliti-TV-mik tigooraasoq 15 wattinik atuisarpoq, qamiusaannaqqatilluni atuinera wattimik ataasiinnarmik minnerulluni. Atortorissaarutit sananerlutat aamma atuinerusarput. CD-mik nipilersuutip misissorneqarsimasup qamiusaqqatilluni 28 wattit atorsimavai, allallu assingusumik pisinnaasallip 2 wattiinnaat atorsimallugit. Maannali qarasaasiamut-chip-imik sanasoqarsimavoq oqaatigineqarporlu innaallagissamik atuinermik 10 wattimiit 1 wattimut, aap allaat qamiusaqqatillugu 0,1 wattimut appartitsisinnaasumik. Neriuutigineqarsinnaavoq nunarsuarmi sumi tamani suliffissuaatillit chip-i taanna, 18 koruuninik nalilik, nalinginnaasumik atortuulersissagaat, taamaalillutillu mingutsitsinermik akiuinermut ingerlatseqataalerlutik. Taamaattoqannginnerani qanoq iliortoqarsinnaava?

Tuluit-Nunaanni avatangiisinut ministeri oqarpoq: „Atortorissaarutit tamarmik immikkut innaallagissamik atuineri immaqa soqutaarpasinngikkaluarput. Tuluit-Nunaannili atuisut 60.000.000-ugatta atuineq annertoorujussuanngussaaq.“ Angerlarsimaffinni atortorissaarutit ilaat soorlu nillataartitsiviit soorunami qamiinnarneqasinnaanngillat. Pitsaassaarli qulliit atortorissaarutillu atorneqanngitsut qamiusaannarnagit qaminnissaat ileqquliukkaanni. Aningaasatiguinnaq sipaarutaassanngilaq, aammali nunarsuatsinnut pisariaqanngitsumik mingutsitsisoqassanngilaq. (gE 8/11 99)