Biibili qanoq oqarpa?

Jesusip Betlehemimi tikeraartui kunngiuppat pingasut?

JESUSIP inunngornerata kingorna anguterpaaluit nuimasut Kangianeersut tikipput Jesus juutit kunngiattut nersorumallugu. Ulloq manna tikillugu tikeraarneq tamanna silarsuarmi tamarmi inuppassuarnit juullisiortartunit nalliuttorsiutigineqartarpoq.

Sumiiffiit ilaanni Jesusimut inoorlaamut Kangianiit pajullutik tikeraartut nersutaatit nerriviusaliami kunngiunerarneqartarput pingasut. Nunani allani meeqqat „kunngit pingasut illernartut“-ut atisillutik aqqusinikkut ingerlaartarput. Allaammi ukiut 2000-it missaat qaangiukkaluartut angutit taakku immikkut ittut sumi tamaani inunnik eqqaaneqartuartarput. Angutilli taakku kikkuuppat?

Kunngiuppat?

Pisimasoq tamanna Biibilimi Mattæusip iivangkiiliuani allassimavoq. Tassani ima allassimavoq: „Jesusili erniummat . . . ata, ullorissat najoqqutaralugit siulittuisartut ullut ilaanni Jerusalemimut pipput oqarlutik: ’Inoorlaaq Juutit kunngiat sumiippa? Ulloriaa pavani takugatsigu pallorfigiartorparput.’“ (Matîuse 2:1, 2, New American Bible) Sooruna Biibilimik nutsikkami tassani tikeraat taakku kangianeersut ullorissat najoqqutaralugit siulittuisartunik taaneqartut kunngitut taaneqaratik?

Biibilimi tassani griikerit oqaasiat maʹgos qasseersiutaasoq atorneqarpoq. Biibilimik nutsikkani allani imatut nutserneqartarpoq „ilisimasut“, „ullorissat najoqqutaralugit siulittuisartut“ imaluunniit „ulloriarsiortut“ imaluunniit taalluaannarlugu „angakkuartartut“. Oqaatsimi tassani pineqartoq tassaavoq ullorissat inissisimaffii najoqqutaralugit allanik siunnersuisartoq siunissamillu siulittuisartoq. Tassa Biibilimi oqaluttuarineqarpoq Betlehemimut tikeraat taakku siulittuisartuusut, anersaarsiortartut, taamaaliornerlu Guutip maajugaa. — 5 Moses 18:10-12.

Aammami kunngiuppat? Taamaassimagaluarpat Biibilimi allassimassagunaraluarpoq. Matîuse 2:1-12-mi oqaaseq ’kunngi’ sisamariarlugu atorneqarpoq. Oqaaseq taanna ataasiarluni Jesusimut pingasoriarlunilu Herodesimut tunngatinneqarpoq, sumiluunniit angakkuartartut kunnginik taaneqanngillat. The Catholic Encyclopedia-mi tassunga tunngatillugu allassimavoq: „Ilagiinni ajoqersuisuunerit siulliunerit arlaannaataluunniit angakkuartartut kunngiuneranngilaat.“ Aamma Biibilimi kunngiunerarneqanngillat.

Inuit pingasuuppat?

Biibilimi angakkuartartut qassiunerat eqqaaneqanngilaq. Maligassarsiat inuit sungiusimasaat, nersutaatinut nerriviusaliani aamma juullisiutinik tussiarnermi ersersinneqartartut, naapertorlugit inuit pingasuupput. Pissutaagunarpoq tunissutit assigiinngitsut pingasuunerat. Tunissutit taakku pillugit Biibilimi ima allassimavoq: ’Illerfitik mapperlugit pajugutinik tunivaat: Kuultimik tipigissaammillu qaqortumik morramillu.’ — Matîuse 2:11.

Silatusaarneruali angakkuartartut pingasuunerassallugit, tunissutit assigiingitsut pingasuuneri piinnarlugit? Israelimi tikeraaq akimasoq alla pillugu allaatigineqartoq missisulaariartigu. Sabap kunngiata arnap kunngi Salomon tikeraaramiuk „balsamimik, kuulterpassuarnik ujaqqanillu erlinnartunik naammattunik“ tunivaa. (1 Kunngit 10:2) Tunissutit assigiinngitsut pingasut tassani eqqartorneqaraluartut Sabap kunngia arnaq kisimi tunisisutut eqqaaneqarpoq. Taamaammat tunissutit qassiunerisa pisumi tassani ersersinngilaat Salomonimut tikeraat pingasuusut. Taamatuttaaq Jesusimut tunissutit pingasuunerat tunisisullu qassiunerat imminut attuumassuteqanngillat.

 The Catholic Encyclopedia-mi allaatigineqarpoq: „Iivangkiiliuni angakkuartartut qassiunerinik taasaqartoqanngilaq, oqaluffeqarfiillu ileqqutoqaanni tamatumunnga tunngatillugu ersarissoqanngilaq. Ilagiinni ajoqersuisuunerit siulliunerusut ilaasa angakkuartartut pingasuunerarpaat; qularnanngitsumik isumaat tunissutit amerlassusiinik sunnerneqarsimavoq.“ Qinerlerfissiami nangilluni eqqaaneqarpoq eqqumiitsulianik qalipaasartut assigiinngitsut Jesusimut tikeraat angakkuartartut marluutittaraat, pingasuutittaraat, sisamaatittaraat, aap aallaat arfineq-pingasuutittaraat. Kinguaariinnik oqaluttuarsiat ilaat naapertorlugu allaat aqqaneq-marluupput. Angakkuartartut qassiunerat imaaliallaannaq aalajangiunneqarsinnaanngilaq.

Qaluttuaq eqqunngikkaluarluni nuannarisaasoq

Amerlanerit upperisaannut akerliusumik angakkuartartut Jesus inunngormat Betlehemiliaqqaaratik Jerusalemiliaqqaarsimapput. Jesus inunngormat najuussimanngillat. Kingornali Betlehemiliarput, Biibilimilu allassimavoq ’illumut iserlutik naalungiaq . . . naapikkaat’. (Matîuse 2:1, 11) Ersarippoq angakkuartartut Jesus tikeraarmassuk ilaqutariit illuinnarmut nuussimasut. Nersutaatit nerrivianniittoq naninngilaat.

Jesus inunngormat kunngit pingasut taassuminnga ataqqinnittut pillugit oqaluttuaq nuannarisaasoq Biibili naapertorlugu eqqunngilaq. Soorlu siusinnerusukkut taaneqartoq Biibilimi ajoqersuutigineqanngilaq Jesusimut tikeraat angakkuartartut kunngiusut, kisianni ullorissat najoqqutaralugit siulittuisartuusut anersaarsiortartut. Biibilimi oqaluttuarineqanngilaq qassiunersut, aammattaaq Jesus inunngornerata nalaani nersutaatit nerrivianniitillugu tikeraarsimanngilaat kingusinnerusukkulli ilaqutariit illuinnarmiilereersut tikeraarsimallugit.

Naak kunngit pingasut allallu pillugit jullimi oqaluttutoqqat inunnit nuannarisaasut Biibilimi eqqartorneqartumut naapertuutinngikkaluartut oqaluttualiat ajoqutaanngitsutut isigineqarnerat nalinginnaavoq. Kristiumiunulli pingaaruteqartorujussuuvoq pallorfiginninnerup eqqunngitsortaqannginnissaa. Jesus aamma taamatut isiginnittaaseqarsimavoq. Ataataminut qinunermini ima oqarpoq: ’Oqaatsisit sallusuissutaapput.’ (Juánase 17:17) Aammattaaq oqarsimavoq: ’Pallorfiginnittut ilumoortut Ataataq pallorfigissavaat anersaakkut ittumik ilumoortumillu; pallorfigisinimi taamaattut Ataatap piumavai.’ — Juánase 4:23. (gE 8/12 99)

[Qupp. 29-mi assiliartaq]

„Ilisimasut pallorfiginninnerat“, Italia