Biibili qanoq oqarpa?

Jesus pallorfigineqartussaava?

UKIUT ingerlaneranni kristumiuunerartorpassuit Jesus Kristus Guutitut ajugaqanngitsutut pallorfigisarsimavaat. Jesusip nammineq pingaartitsineq pallorfiginninnerlu Jehovamuinnaq sammitippaa. Assersuutigalugu Jesus Diaavulumut pallorfiginneqquneqaraluarami ima oqarsimavoq: ’[Jehova] Guutit pallorfigissavat kiffartuullugulu taanna kisiat.’ (Matîuse 4:10) Kingusinnerusukkut ajoqersukkani peqqusimavai: ’Nunamiusorlu ataatassinnik taassanngilarsi, ataaseq Ataatagigassiuk, qilammiittoq.’ — Matîuse 23:9.

Arnamut Samariamiumut Jesusip oqaluttuaraa Guuti qanoq pallorfigineqartussaasoq, tassa anersaakkut ittumik ilumoortumillu. ’Pallorfiginnittut taamaattut Ataatap piumavai,’ oqarpoq. (Juánase 4:23, 24) Aap, taamaallaat Guutimut ataqqinnittumik pallorfiginnittoqarsinnaavoq. Allamik pallorfiginninneq guutipilussiornerussaaq, tamannalu allakkani hebriiarisuuni griikerisuunilu assuarineqarpoq. — 2 Moses 20:4, 5; Galâsiamiut 5:19, 20.

Immaqa ilaat oqarumassapput: „Biibilimi allassimannginnami Jesus aamma pallorfigisussaagipput? Eprîarit 1:6-imi Paulus oqannginnerpa: ’Guutillu inngiliisa tamarmik [Jesus] pallorfigissavaat’?“ Guutipilussiorneq pillugu allassimaffik taanna Biibili najoqqutaralugu qanoq paasisariaqassava?

Biibilimi pallorfiginninneq

Siullermik paasisariaqarparput Paulusip pallorfigisaqarneq qanoq isumaqartikkaa. Oqaaseq Griikerisooq proskyneʹō atorpaa. Unger’s Bible Dictionary-imi oqaaseq nassuiarneqarpoq, nutsiinnavillugu isumaqartoq „ataqqinninniarluni nersualaariniarluniluunniit allap assaanik kunissineq.“ An Expository Dictionary of New Testament Words-imi W.E. Vine oqarsimavoq oqaaseq isumaqartoq „ataqqinninniarluni iliuuseq inummuugaluarpat Guutimuugaluarpalluunniit“. Biibilip nalaani oqaaseq proskyneʹō akimasumut sikiffiginninnivimmut atorneqartarpoq.

Assersuutigalugu taaneqarsinnaavoq Jesusip kiffaq pillugu assersuusiaa naalakkaminut akiitsukkaminik akiliisinnaajunnaartumut. Uani griikerit oqaasiat atorneqartoq, tuluttut nutsigatoqaq King James  Version naapertorlugu allassimavoq: „Kiffaq taamaattumik nunamut pallorpoq [kunngilu] pallorfigalugu (proskyneʹō), oqarluni: Naalagaq kamajuillutit pinnga tamaasa ilinnut akilerumaarpakka.“ (Matîuse 18:26; uagut allanneri uingasunngorlugit erseqqissarpavut.) Kiffaq pallorfiginnninnermik iliuuseqartutut oqaatigineqarsinnaava? Naamerluinnaq! Naalakkamisut qullersamisullu kunngip pisassaanik ataqqinninnini naalanninilu takutiinnarpaa.

Biibilip nalaani Kangia-qiterlermi ataqqinnilluni taamaaliorneq nalinginnaasimavoq. Jakobip qatanngunni Esau naapikkiartoramiuk arfineq-marloriarluni nunamut pallortarsimavoq. (1 Moses 33:3) Josefip Egyptenimi kunngikkunni atorfia ataqqiniarlugu qatanngutai saavanut nunamut pallorput. (1 Moses 42:6) Tamanna eqqarsaatigalugu paasisinnaavarputtaaq ullorissat najoqqutaralugit siulittuiniartartut Jesus ’inoorlaaq juutit kunngiat’ nassaarimmassuk qanoq pisoqavissimanersoq. King James Version naapertorluguli allassimavoq „nunamut pallortut pallorfigalugu (proskyneʹō)“. — Matîuse 2:2, 11.

Ersarilluinnarpoq oqaaseq proskyne’õ Biibilimik nutserisartut ilaasa „pallorfigaa“-mik Jehova Guutip pisassaatut kisiat atortarsimanngikkaat. Oqaaseq aamma inummik ataqqinninnermut atorneqartarsimavoq. Biibilimik nutserisartut ilaasa paatsuuineq tamanna pinngitsoortinniarlugu oqaaseq proskyneʹō Eprîarit 1:6-imeersoq ima nutsertarsimavaat: ’nersorpaa’ (The New Jerusalem Bible), ’ataqqivaa’ (The Complete Bible in Modern English), ’pallorfigaa’ (Biibili kalaallisuunngortitaq atortussaatitaq), imaluunniit ’ataqqinnilluni sikiffigaa’ (Ny Verden-Oversættelsen).

Jesus ataqqineqartariaqarpoq

Jesus taamatut ataqqineqartariaqarpa? Aap, taamaalluinnarpoq! Paulus hebriiarinut allakkamini nassuiaavoq Jesus ’tamanik kingornussisutut naalagaanersuup qutsinnermiittup talerpiata tungaanut ingissimasoq’. (Eprîarit 1:2-4) Taamaattumik ’Jesusip aqqani seeqqut tamarmik qilammi nunamilu nunallu ataani ittut seeqqumiassasut, oqqallu tamarmik Jesus Kristus nassuerutigissagaat Naalagaasoq, Guuti ataataq naalannarseqqullugu’. — Filípimiut 2:10, 11.

Tupinnarluinnartumik iliorluni Jesus Kristus qutsissisitaalluni inissisimaffini tamatumunngalu nassatarisaanik pissaaneqartitaangaarnini nunarsuarmik paratiisinngortitsinermut atungajalerpai. Guutip siulersuineratigut utertitsissumillu Jesusip pilliuteqarnermigut naapertuilluarluni aqutsinerminut naalatsigitittut aliasuutaannit anniaataannillu tamanit aniguisissavai. Qinngaqqunnanngila ataqqillugu naalallugulu maleruaanissatsinnut? — Tussiaat 2:12; Jesaja 9:6; Lúkarse 23:43; sarĸúmersitat 21:3, 4.

„Guuti tamakkiisumik tunniusimaffigineqarnissaminik piumasaqartoq“

Biibililli erseqqissumik takutippaa pallorfiginninnerput — ima isumaqartillugu upperisarsiornikkut ataqqinninnerput tunniusimanerpullu — Guutimuinnaassasoq. Mosesip tassaanerarpaa ’Guuti tamakkiisumik tunniusimaffigineqarnissaminik piumasaqartoq’. Biibilittaaq oqaaqqissaarpaatigut ’pallorfigissagipput qilammillu nunamillu immamillu ermillu puilasarfinik pinngortitsisoq’. — 5 Moses 4:24, NV; sarĸúmersitat 14:7.

Jesusili pallorfiginninnermut ilumoortumut pingaarutilerujussuuvoq ataqqineqartariaqarlunilu. (2 Korintumiut 1:20, 21; 1 Timûtiuse 2:5) Taanna Jehova Guutimut qanillinissatsinnut aqqutissatuaavoq. (Juánase 14:6) Tamatumunnga naapertuuttumik kristumiut ilumoortut silatusaassapput Jehova Guuti ajugaqanngitsoq kisiat pallorfigigunikku. (gE 8/4 2000)