Noap Guuti saqeqatigaa — Videoliaq qanoq sananeqartoq

„ULLAARNGANIILLI eqqartortarpaa. Ullup ingerlanerani pingasoriarluni sisamariarluniluunniit isiginnaartarpaa innartinnanilu isiginnaaqqittarlugu,“ anaanaasoq Californiamiu ernini marlunnik ukiulik pillugu allappoq. Sunaana pigaa? Videoliaq Noa vandrede med Gud pivaa. * Nangippoq: „Pinnguariarnialruni anileraangami kaattani tigusarpaa oqarluni umiarsualiorniarluni.“

Anaanaasoq alla allappoq: „Qujanarsuaq, piffissaq asanninnerlu Noa pillugu videoliap sananeqarneranut atorassigik. Ernerma pingasunik ukiullip filmi tamangajaat alanngaarsinnaavaa, aamma nipaa ilanngullugu. Tassaavoq videoliaq nuannarinerpaasaa, ullormut arlaleriarluni isiginnaarumasarpaa.“

Niviarsiaraq Daniellemik atilik allappoq: „Filmi nuannaraara, Noallu maligassiaa maleruarusuppara. Neriuppunga meeqqanut amerlanerusunik videoliorumaartusi.“

Paasinartumik oqaluttuanik Biibilimeersunik filmiliussagaanni piffissaqarluartariaqarpoq. Sunali pillugu?

Noa pillugu filmi qanoq sananeqarpa?

Filmip immikkoortuisa ilaat immiunneqartinnagit assiliartassaasaluunniit ilaat qalipanneqartinnagit, atuakkiortup Biibilimi oqaluttuaq tunngavigalugu pisimasut naatsumik allaatigai. Siunnersuusiaq tamanna tunngavigalugu storyboard najoqqutassarlu suliarineqarput. Storyboard tassaavoq titartagannguit arlallit immikkoortut oqaluttuallu tulleriiaarnissaannut aalajangerniarnermi eqqumiitsuliortut iluaqutigisartagaat. Inuppaaluit, ilaatigut eqqumiitsuliortut, oqaloqatigiissutigaat Noa pillugu oqaluttuaq qanoq oqaluttuarineqarsinnaasoq — immikkoortuni sorlerni isiginnaartitsisartut atorneqassanersut, sorlernilu qalipakkat atornissaat pitsaanerussanersoq. Isiginnaartitsisartut atorneqaraangata oqaluttuaq meeqqanut takorlooruminarnerussarpoq. Tamatuma takutippaa Biibilimi inuit ukiut tusindilikkuutaat matuma siorna ilumut inuusimasut Jehovamullu kiffartorsimasut. Taava filmiliornermi suna tullinnguuppa?

Maanna Noa ilaqutaalu isiginnaartitsissutissami inuttalersorneqarput. Atisassaat titartarneqarput ilusilersorneqarlutillu filmillu immikkoortui assigiinngitsut qanoq qalipaateqassanersut aalajangerneqarput. Eqqumiitsuliortulli Noa ilaqutaalu titartarsinnaanngilaat qalipassinnaanagillu isiginnaartitsisartut atisassatik atisimallugit qanoq isikkoqarnersut takusimatinnagit. Qalipakkat immikkoortunut isiginnaartitsissutigineqartunut naapertuuttariaqarput. Sumili filmip immikkoortui taakku immiunneqarsinnaappat?

Danmark toqqarneqarpoq, tassani Peqatigiiffiup immikkoortortaqarfiani qatannguteqarmat isiginnaartitsinermi atortussat sananerannut misilittagalinnik, tassanilu illup iluani immiussisoqarsinnaammat. Filmiliortussat USA-mit Pattersonimit qatanngutit qallunaat peqatigalugit immiussisiniarlutik Danmarkiliarput. Videoliassap imaa saqqummiunneqarpoq. Tamatuma filmip oqaatsinut allanut saqqummersinneqarnissaa pisariinnerulersippaa, teknikki dubbingimik taaneqartoq pisariusoq atorneqartariaqanngimmat, tassa oqaatsit nutserneri piffissamut eqqorluinnartumut inissittariaqanngimmata. Immikkoortulli titartakkat pisariusut qanoq suliarineqarsimappat?

Qalipakkat assiliivillu immikkut ittoq

Storyboard atorlugu eqqumiitsuliortut imilersarisanik hundredelikkuutaanik qalipaapput. Teqeqqorissuusariaqanngillat. Ilaat qaarajupput allallu tumaasaallutik, apeqqutaalluni sumit isigalugu assiliivimmik assilineqassanersut. Assilissat annerit sanimut 56 centimeterinik ammullu 76 centimeterinik angissuseqarput, amerlanersaalli sanimut 28 centimeterinik ammullu 38 centimeterinik angissuseqarlutik.

Qalipakkat assiliinerinut assiliivik immikkut ittoq motion controlimik taaneqartoq atorneqartariaqarpoq. Isorartusuusaartitsiniarluni assilissat pingasunngorlugit qaleriissinneqarput — salliit, qiterliit tunorliillu. Taamaalilluni orpiit, nagguaatsup niuisa allalluunniit akornanni takusaqartoqarsinnaavoq isorartutitsisumik. Assiliivik qarasaasiamit aqunneqarpoq, taamaalilluni assiliivik sangujartuaartillugu qanillisaaserluguluunniit immikkut malunnaateqartinniarlugu  assiliisinnaatillugu. Taamaattumik isiginnaartut nunami angalaartutut misigisinnaapput, uffa assiliivik kisimi ’angalaaraluartoq’.

Napasuliaq Alapernaarsuiffiup Peqatigiiffia titartakkat piviusut sananeqarnissaannut inuttassaqarnanilu aningaasaateqanngimmat, periaaseq siuliani allaatigineqartoq, titartakkat isiginnaartitsisartullu imminnut kattunneri periaasiuvoq naammaginartoq. Videoliaq taanna meeqqanut pingasut aqqaneq-marlullu akornanni ukiulinnut sananeqarpoq, taakkualu katiterineq taamaattoq nuannaraat. Videoliami erseqqissarneqarpoq Noap maligassiaa qanoq ilinniarfigisinnaagipput. Videop puuata tunuani apeqquteqarpoq angajoqqaat meeqqaminnut pingaarnersiuillutik uteqqiiniarneranni iluaqutigisinnaasaannik.

Videoliami sunniutillit assigiinngitsut allat, soorlu Ulersuup aallartilernerani siallernerujartuinnarnera qarasaasiaq atorlugu sananeqarpoq. Paasinarsivoq Noa pillugu videoliap sananeqarnerani piffissaq isumassarsillaqqinnerlu atorfissaqartinneqarsimasut.

Biibilimi oqaluttuat allanngorneq ajormata videoliaq Noa vandrede med Gud (Noap Guuti saqeqatigaa) ukiorpassuarni tulliuttuni meeqqat inuusuttullu ajoqersorneqarnerannut iluaqutaajuarumaartoq. Meeqqat angajoqqaatillu pingaartitsillutik videoliallu tamatumunnga assingusut allat amerlanerusut kissaatigalugit hundredelippassuarnik allassimapput. Ilaat allappoq: „50-inik ukioqarpunga, meeqqakkalu qangali mikisuujunnaarsimapput. Isumaqarpungali angajoqaat ullumikkut mikisunik meerallit oqaluttuanik Biibilimeersunik arlalinnik videoteqaraluarpata iluaqutaasorujussuussagaluartoq.“ (gE 8/3 2000)

[Quppernerup ataani ilanngussaq]

 [Qupp. 25-mi diagrammi/​assiliartaq]

(Allassimasut qanoq inissisimanersut naqitami takuneqarsinnaavoq)

Assiliivik motion controlimik taaneqartoq atorneqarpoq titartakkat ’uummassuseqartinniarlugit’

[Qupp. 22, 23-mi assiliartat]

Siullermik storyboard sananeqarpoq

[Qupp. 23-mi assiliartat]

Immikkoortut isiginnaartitsisartunik immiussat amerlanersaat Danmarkimi immiunneqarput

[Qupp. 24, 25-mi assiliartat]

 Eqqumiitsuliortut 230-nik assigiinngitsunik titartaallutik qalipaallutillu assilialiorput

[Qupp. 25-mi assiliartat]

Qarasaasiamik katiterinerup, sunniutillit assigiinngitsut, oqaluttuap, nipilersuutitaata nipitaatalu videoliaq naammassilluartippaat