Inuusuttut aperipput:

Qanoq ilillunga Internetip navianartui ingalassinnaavakka?

TAKORLOORIARUK silarsuup atuakkanik atorniartarfiisa annersaanniittutit. Atuakkat, aviisit, katalogit, assilissat immiussallu assigiinngitsorpassuit akornanniipputit — sammisassat tamangajammik nanineqarsinnaapput. Paasissutissat nutaanerpaat atuakkiarpassuillu ukiunit hundredelinnit qaangiuttunit pisut tiguinnariaapput.

Paasissutissat taamaattut ajornanngitsumik Internetimi pissarsiarisinnaavatit. Inuk computerimi saavani issialluni computerit allat taakkuninngalu atuisut, silarsuarmi sumiittulluunniit, paasissutissanik paarlaasseqatigisinnaavai. * Atuisut nioqqutissanik pisisinnaanngorlutillu tuniniaasinnaanngorput, aningaaserivik aqqutigalugu suliassanik aaqqiisinnaanngorput, oqaloqatigiissinnaanngorput nipilersukkanillu immiussanik nutaanerpaanik tusarnaarsinnaanngorlutik — tamakku tamarmik angerlarsimaffimmi akornusersuisoqarani pisinnaapput.

Tupinnanngilaq paasisimasallit ilaat isumaqarmata ukiup matuma naanerani Internetimik atuisut 320 millioninngorsimassasut. Internetimik atuineq nunani amerlasuuni nalinginnaalersimavoq. Inuusuttut millionilippassuit atuinissaminnut periarfissaqalersimapput atuarfiit atuakkanillu atorniartarfiit atuineq sunniuteqarluartumik siuarsarmassuk. USA-mi inuusuttuaqqat 12-it 19-illu akornanni ukiullit 65 procentingajaasa online-kiffartuussiviit atoreersimavaat atuisutulluunniit pisartagaqalersimallutik.

Interneti eqqortumik atorneqaraangami Interneti iluaqutaasunik paasissutissiisinnaavoq silassaq, angalanerit allallu pillugit. Internetikkut atuakkat, biilit atortuisa kingoraartissaat allarpassuillu pisiarineqarsinnaapput. Aamma amerlasuut atuarfimmi suliassaminnut atortarpaat.

Naak Interneti iluaqutaasinnaagaluartoq, aamma atuakkanik atorniartarfittut sulisoqanngitsutut allanillu isigisoqarfiunngitsutut oqaatigineqarsinnaavoq. Suut tamaasa misissorneqarsinnaapput allanit marserneqartutut misigisimanani. Aammattaarli tamannaavoq Internetip navianaatiginerpaasa ilaat. Sooq? Tassami Web-imi quppernerit amerlaqisut ileqqorissutsikkut ajortunngornartunik anersaakkullu aseroriartuutaasunik imaqarmata. Taamaattumik kristumiut inuusuttut Internetimik atuinermikkut ussernartorsiorsinnaapput. Alapernaatsuuvugummi, tamannalu Satan Diaavulup itsarsuarli atornerluttarsimavaa. Ersarippoq Satanip Evap alapernaassusia atoraa ’peqqusersuullunilu salloqittarlugu’. — 2 Korintumiut 11:3.

Aammattaarli inuusuttut kristumiut paasissutissanit ajoqutaasunit tammartinneqariaannaapput anersaakkut peqqissusertik sernisorniarlugu aalajangersimanngikkunik. Better Homes and Gardens-imi allaaserisaq ima allappoq: „Interneti pissanganartuuvoq, tassanilu inuit pikkorissut  ingerlavissaq aalajangertarpaat paasissutissallu nutaanerpaat siaruarterlugit; kisianni meeqqanik kinguaassiuutitigut atornerluisut, peqquserluttuliortut, ilumoortuusaarniartut inuillu nuanninngitsumik pissusillit aamma atornerluttarpaat.“

Angut inuusuttoq Javierimik atilik * oqarpoq: „Web-imi quppernerit ilaat uissuumminartuupput tassanngaannarlu mianersoqquseqqaaratik saqqummeriataartarlutik.“ Nangipporlu: „Ussassaarniarpaatsit, tigusariniarpaatsit aningaassatinnillu arsaarniarlutit.“ Angut inuusuttoq kristumiu Johnimik atilik nassuerpoq: „Kanngunartunik isiginnaarluni aallartikkaanni unitsinnissaat sapernarsisarpoq — uerinartuuvoq.“ Inuusuttut kristumiut ilaasa Web-omi quppernerit aseroriartornartut akulikitsumik iserfigisarpaat, taamaaliornikkullu sualuttumik ajornartorsiulertarput. Allaat ilaasa Jehovamut attaveqarnertik ajoqusersimavaat. Tamanna qanoq ililluni pinngitsoortinneqarsinnaava?

’Suunngitsunik isiginnaarneq’

Ilaannikkut Web-imi quppernerit adressiata pasinarsitillarpaa ingalanneqartariaqartunik imaqartoq. * Ussatit 22:3 minanersoqqusivoq: „Silatuup perluk qanilliartortoq malugisarpaa qimarnguffissarsiortarlunilu, isumaatsorli soqutigittaalliuinnartarpoq tamannalu ajunaarutigisarlugu.“

Web-imi quppernerup adressia tassaavoq naqinnerit tulleriiaat isernissamut atorneqartussat. Adressit ilaasa imaraat oqaatsit tassani suut nassaassaanerinik paasinarsisitsisut.

Amerlanertigulli ajornartorsiutaavoq Web-imi quppernerit isornartunik imallit nalaatsornerinnakkut takuneqartarmata. Imminut ilisarititsivik immaqa kannguttaatsunik amiilaarnartunillu assiliartaqarpoq, taakkulu peqqissaartumik suliarineqarsimapput illit uterfigeqattaarlugit misissuinerunissannut ussassaarniarlutit. *

Illit aalajangereerpiuk qupperneq taamaattoq takusoorukku qanoq iliussanerlutit? Kristumiu qanoq iliortariaqartoq nalunanngilaq: Erniinnarluinnaq qimattariaqarpaa — imaluunniit browseri qamillugu. Tussiaasiortoq imatut qinusoq ilaaruk: ’Isikka alartikkit piunngitsut isiginiaqqunagit.’ (Tussiaat 119:37, nutsigaq pisoqaq; naleqqiuguk Job 31:1.) Eqqaamajuk naak inunnit takuneqarsinnaanngikkaluartugut isiginnaarrneqartartugut. Biibilip eqqaasippaatigut ’suut tamarmik taassuma isaanut saqqumillutillu uleersimasut, tassa naatsorsuiffigisassatta’. — Eprîarit 4:13.

Web-imi quppernerit ileqqorissutsinnut ajoqutaasut uterfiginiarnagit aalajangerninnut nakussatsinneqarsinnaavutit angajoqqaatit kristumiulluunniit inersimalluartut allat oqaloqatiginerisigut. Aammattaarli marrarmut maagarnartunut morsuleruit aatsaat niaquinnanngoreeruit ikioqqullutit nillianavianngilatit, ilaa?

Internetikkummi najortigiinneq?

Internetimik atuisut silarsuarmit tamarmeersut toqqaannartumik attaveqatigiissinnaapput chatrooms atorlugit. Suliffeqarfiit chat atortarpaat Internetikkut ataatsimiinnernut atuisunullu kiffartuussinermut. Chatteriaatsit ilaasa atuisut teknikkimut tunngasunik paarlaasseqatigiinnermut periarfissalerpaat, soorlu biilinik iluarsaassinermut programmiliornermullu. Chattimut programmit ilaasa ikinngutigiit ilaqutariillu oqarasuaatikkut oqaloqatigiinneq akisooq atunngikkaluarlugu periarfissalerpaat. Periarfissap taassuma silassorissumik atornissaanut pissutissaqarluarpoq, kisianni aamma navianartoqarpoq.

Chatrooms tamanut ammasut atornissaannut mianersornissamut pissutissarpassuaqarpoq, tassanimi navianartut amerlanerusinnaammata. Atuakkiortup Leah Rozenip uparuarpaa: „Inuusuttuaqqat teknikkimut tunngasunik silassorissut nalunaaquttap-akunnerpassuini takornartat kinaassutsiminnik isertuisut nunamit tamarmeersut, ilami nunarsuarmit tamarmeersut, chatteqatigisarpaat. Ajoraluartumik inuusuttuaqqat chatteqataasa takornartat ilaat tassaasinnaapput inersimasut  pissusiusoq paarlallugu kanngunartuliorumatuut kinguaassiuutinut tunngasunik siunertarisaminnut meeqqanik ujaasisut.“ Allaaserisaq Popular Mechanics-imiittoq mianersoqqusivoq chatrooms tamanut ammasut atoraanni „mianersuulluinnartartariaqartoq“. Atit adressillu takornartamut tunniukkukkit ajornartorsiutinut sualuttunut aallaqqaataasinnaavoq. Sooq imminut taamatut nalorninartorsiortissavit?

Navianartoq arriitsumik malunniukkiartuaartoq uaniippoq tassanngaannaq takornartanik najoqqutassianik Biibilimeersunik ataqqinninngitsunik assuarnartunik ilagisaqaleriataarnermi. * Ilisimatuutut misissuisut oqarput inuusuttuaqqat chatroomini oqaloqatigiissutiginerusaraat pingaartumik kinguaassiuutinut tunngasut. Taamaattumik Biibilimi 1 Korintumiut 15:33-mi mianersoqqussut naleqquppoq: ’Tammarnaveeritsi; ajortut ikinngutigalugit ileqqut ajunngitsut aserortarput.’ Computeri aqqutigalugu ilagisartakkat ajortut navianarput. Sooq inuusuttut Guutimik mianerinnittut naviattaallutik imminnut taamatut nalorninartorsiortissappat?

Isumannaallisaanerit

Navianartut Internetimut atassuteqartut eqqarsaatigalugit mianersortumik atorneqartariaqarpoq. Assersuutigalugu ilaqutariit ilaasa computeritik inimi ataatsimoorussami, soorlu inersuarmi, inissisimavaat, immaqalu aatsaat allanik angerlarsimasoqartillugu Internetip atorneqarsinnaaneranik malittarisassaqarlutik. Angajoqqaavit taama killilerpatsit suleqatigisariaqarpatit. (Ussatit 1:8) Najoqqutassat ersarissut ilinnut asanninnerannut takussutissaapput.

Atuarfimmi suliassannut Interneti atortariaqarukku qanoq sivisutigisumik atornerlugu maluginiaruk. Piffissaq qanoq sivisutigisoq atussanerlugu siumut aalajangereeruk, nalunaaqutarlu sianertussiariuk piffissaq taanna naappat eqqaasinneqarniassagavit. Tom imatut siunnersuuteqarpoq: „Qanoq iliussanerlutit siumut pilersaarutigereeruk, suna ujarniarnerit paasilluaqqaaruk, taannarpiaannarlu qimannagu allamik sammisaqarnak — allat soqutiginartut suulluunniit takkutissagaluarpataluunniit.“

E-mailimik atuigaanni aamma mianersortariaqarpoq. Inuusuttut kristumiuusut sianigeqqissaartariaqarpaat e-mailerpassuarnik atuartarnerup piffissaajaatiginnginnissaa, ingammik immaqa paasissutissanik soqutaanngitsunik eqqunngitsunilluunniit imaqarpata. E-mailinik nassiussinermi tigusinermilu imminut aqussinnaanngikkaanni piffissaq naleqaqisoq ilinniagassanut anersaakkullu suliassanut atorneqartariaqaraluartoq atulussinnarneqassaaq.

Kunngi Salomon oqarpoq: „Atuakkiat saqqummerartut ingasalluinnarput, eqqarsaatersorpallaarnerlu timimut qasusaataaginnartarpoq.“ (Nalunaajaasup oqaasii 12:12) Oqaatsit tamakku aamma Internetimut naleqqussinnaapput. Paasissutissanik ujarlernerit ima aallutsigeqinagu Biibilimik atuarnissat imaluunniit kristumiut nalunaajaasarnerannut peqataasarnissat sumiginnalerlugu. (Matîuse 24:14; Juánase 17:3; Evfisumiut 5:15, 16) Eqqaamasariaqarpattaaq computerikkut attaveqaqatigiinneq ajunngissinnaagaluartoq kristumioqatinik toqqaannartumik oqaloqateqarneq taarserneqarsinnaanngimmat. Internetimik atuinissat pisariaqartivikkukku taava silassorissumik atuinissat aalajangiulluinnaruk. Web-imi quppernerit ulorianartut ingalassimakkit, Internetimullu piffissaq atorpallaarniaqinagu. „Uummatit paariuk“, Internetimillu inussiaatinngornaveerit. — Ussatit 4:23. (gE 22/1 2000)

[Quppernerup ataani ilanngussat]

[Qupp. 14-mi issuagaq]

„Web-imi quppernerit ilaat uissuumminartuupput tassanngaannarlu mianersoqquseqqaaratik takkussinnaallutik“

[Qupp. 15-mi assiliartaq]

Ilaqutariit ilaasa computeritik inimi ataatsimoorussami inissisimavaat