Qanoq ilillutit pujortarunnaarsinnaasutit

PUJORTARUNNAARNEQ sikkilernermut ilinniarnertulli ippoq. Misiliinermi siullermi iluatsittoqarajunngilaq. Misileeqattaareerluni aatsaat iluatsinnissaa piareersimaffigisariaqarpat. Pujortaleqqinneq ajorsarnertut isigeqinagu, ilinniarfissatulli isigiuk kingualaarneq kinguneqarluarsinnaavoq. Siunnersuutit misilittarneqarluarsimasut illit aamma iluaqutigisinnaasatit tullinnguupput.

Piumassuseqangaarnermik ineriartortitsigit

■ Tupatorunnaarnerup ilungersunartortaasa tamarmik imminut akilersinnaanerinik imminut qularunnaarsittariaqarputit. Taamaatitsiniarlutit pissutiginiakkavit pitsaaqutai tamaasa ilanngullugit allattukkit. Pujortarunnaareeruit allattukkanik taakkuninnga misissuineq aalajangiussisimaannarnissannut iluaqutigissavat. Guutimut iluarisaajumaneq piumassuseqartitsinerpaajuvoq. Biibilimi allassimavoq Guuti uummatikkut, tarnikkut, nukinnik isummamillu tamakkiisumik asassagipput. Tupa pinngitsoorsinnaanngikkutsigu taamaaliorsinnaanngilagut. — Mákorse 12:30.

■ Qaqugukkut aamma sooq pujortartarnerlutit paasiniarlugu pujortartarnerit misissoruk. Ullup ingerlanerani cigarettit pujortakkavit qaqugukkut sumilu pujortarsimanerlugit allattorneri immaqa pitsaassaaq. Pissutsit pujortarnermut ussernartorsiorfigisinnaasatit siumut ilisimanissaannut iluaqutigisinnaavat.

Ullormik aalajangiigit

■ Qaqugu pujortarunnaarniarlutit ulluleruk qaammatisiutinnilu allallugu. Ulloq tamaviaarnanngitsoq aalajangeruk. Ulloq nallerpat tassanngaannaq, ikiliartortitseqqaarnak, pujortarunnaartariaqarputit.

■ Arsakoorfiit, innerit ikittaatillu piikkit. Atisatit tupasunniiakkit.

■ Tupatorunnaarniarninni suleqativit, ikinngutivit ilaquttavillu ikiuiniarnerat tapersersuiniarnerallu ilassiuk. Eqqanni pujortartoqannginnissaanik oqarnissat annilaangassutigissanngilat.

■ Ullormi pujortarunnaarfiginiakkanni sammisassaqarnissat pilersaarutigiuk. Pujortarfioqqusaanngitsunukarsinnaavutit soorlu katersugaasivimmut isiginnaartitsisarfimmulluunniit. Nalunnguarnikkut, sikkilernikkut pisuttuarujussuarnikkulluunniit timigissarit.

 Pinaveersaarnerup malunniutai qanoq qaangerneqarsinnaasut

Pujortartorujussuuguit cigarettip pujortakkavit kingulliup nalunaaquttap-akunnialui qaangiutiinnartut pinaveersaarnerup malunniutai malugissagitit ilimanarpoq. Malunniutit makkuusinnaapput: puffajaneq, naammagittaanneq, narrajaneq, annilaanganeq, isumatsangaarsimaneq, sinissaaleqineq, eqqissiveqannginneq, nererusunneruneq tupagunnerlu. Immaqa nakorsap malunniutinik tamakkuninnga atoruminarsitsisinnaasumik tunisinnaavaatit. Aammattaaq akiuunninni ajugaanissannut iluaqutigisinnaasannik nammineq iliuuseqarsinnaavutit.

■ Kaloriakitsunik nerigit, sapaatip-akunnerini artornartuni siullerni imermik imerujussuartarit. Ilaasa naatitanik soorlu guleruuanik bladsellerinillu ooqanngitsutorneq iluaqutigisorisarpaat. Timigissarneq puallarnermut sianiutinullu nipaallisaatitut akiuutaasinnaavoq.

■ Sumiiffiit pissutsillu pujortarnissannut ussernartorsiortitsisinnaasut ingalassimaniakkit.

■ Uerinaveersaarnerup nalaani utoqqatsissutipalaat akiukkit. Makku atorneqartarneri nalinginnaapput: ’Artornatua qaangerniarlugu ullumikkuinnaq pujortarpunga!’ ’Pujortartarneq ileqqopilutuaraara!’ ’Tupatorneq taama ulorianartiginavianngilaq, pujortartorujussuit ilaat 90-it sinnerlugit ukioqalertarput.’ ’Toqu pissuteqartariaqarpoq.’ ’Pujortaqqusaanngikkuma inuuneq suunngilaq.’

■ Pujortarneq ussernartorsiorfigiliivikkukku, taava utaqqilaarit. Pujortaguleriasaarneq minutsit qulit ingerlaneranni qaangiukkajuppoq. Ilaannikkut pujortaqqusaajunnaavinneq eqqarsaatigiinnarlugu sapernarsorisinnaavat. Taamaakkuit ullut ataasiakkaakkit.

■ Guuti kiffartorfigerusukkukku ikioqqullutit qinnuigisinnaavat. Pinngortitsisitta asannittup piumasaminut naapertuuttumik inuunerminnik aaqqiiniartut ’pisariaqarfiagut ikiorsinnaavai’. (Eprîarit 4:16) Tupinnartumilli pisoqarnissaa ilimageqinagu. Qinnutitit naapertorlugit iliuuseqartariaqarputit.

Pujortarunnaarsimasuujuaannarit

■ Qaammatit pingasut siulliit artornarnerpaapput, tamatumali kingorna ajornanngippat pujortartut ilaginaveersaartariaqarpatit pujortarnissannullu ussernartorsiortitsisinnaasut ingalassimaniarlugit.

■ Ukioq ataaseq sinnerluguluunniit pujortarsimanngikkuit ilaannikkuinnaq pujortarsinnaasoreqinak.

■ „Cigarettimik ataasiinnarmik“ pujortarnissat ussernartorsiorfigeqinagu. Ataasiinnaq arlalinnik pujortarnermik kinguneqarsinnaavoq, sivitsunngitsorlu taamaatitsiniarlutit ilungersuutitit asuliinnassapput. Cigarettimik ataatsimik pujortartoorneq suli ataatsimik pujortarnissamut pissutissaanngilaq. Pujortaleqqikkuit asooruteqqiinnassavat.

Pujortartartut millionilikkuutaat pujortarunnaarsimapput. Aalajangeriataarsinnaassuseqaruit nikallujuillutillu aamma illit iluatsitsisinnaassaatit. (gE 22/3 2000)